Ozarbayjon poytaxti Boku shahrida dzyudo kurashi bo'yicha “Ulkan toj” turkumiga kiruvchi yirik xalqaro turnir boshlandi.
Dunyoning 76 davlati vakilari ishtirokida o'tayotgan mazkur musobaqada XXXI yozgi Olimpiada o'yinlarining reyting ochkolari ham o'ynalmoqda.
Odatdagidek bellashuvlar engil vazn toifalaridan boshlandi va dastlabki kun o'tkazilgan saralash bahslarida ikki nafar hamyurtimiz Sharofiddin Lutfullaev va Diyorbek O'rozboev tatamiga chiqdilar.
Og'irlik vazni 60 kg.gacha bo'lgan polvonlar musobaqasida ishtirok etayotgan har ikki polvonimiz ham saralash bellashuvlarida munosib ishtirok etib, sovrinli o'rinlar uchun kurashni davom ettirmoqdalar.
Jumladan, Sharofiddin Lutfullaev saralash bahslarida Italiya, Belarus va Braziliya terma jamoasi a'zolarini mag'lub etib yarim finalga chiqdi. Birozdan so'ng, final yo'llanmasi uchun kechadigan bellashuvda Sharofiddin mo'g'ilistonlik Boldbatar Ganbat bilan kuch sinashadi.
Diyorbek Lutfullaev dastlabki ikki bellashuvda Bolgariya hamda Gonkong vakillarini mag'lub etib, yarim final yo'llanmasi uchun kechgan bahsda Amartuvshin Dashdava (Mo'g'iliston)ga imkoniyatni boy berdi va o'tish turniri orqali bronza medali uchun kurashni davom ettiradigan bo'ldi. Endi Diyorbek o'tish musobaqasining dastlabki bellashuvida ozarbayjonlik Ilgar Mushkievga qarshi tatamiga chiqadi.
Har ikki polvonimizga ham bo'lajak bellashuvlarda omad va zafarlar tilab qolamiz.
Shavkat Jalilov
O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.