“O'zbekiston Temir yo'llari” aktsionerlik jamiyati hamda “Lokomotiv” futbol klubi rahbariyati kelajagimiz bo'lgan yoshlarni har tomonlama etuk, sog'lom bo'lib etishishlari uchun O'rta Osiyoda birinchi bo'lib 3 yoshdan 6 yoshgacha bo'lgan bolalar uchun “Loko-Junior” maktabini ochish uchun tanlov e'lon qilgan edi.
Har jabhada birinchi bo'lishga, o'zbek futbolining xaqiqiy “lokomotivi – boshlovchisi” bo'lishga harakat qilayotgan “Lokomotiv” o'zbek futboli ixlosmandlariga ajoyib sovg'a tayyorladi.
1 maygacha belgilangan tanlovning dastlabki kunlaridanoq ota-onalar qiziqish bildirib o'z farzandlarini ushbu maktabga olib kelishdi. Tanlov yakunlagan bo'lsa-da, ota-onalar farzandlarini klubimizga olish kelishyapti. Shu sababli “Lokomotiv” PFK rahbariyati may oyi so'nggida yana bir marta tanlov e'lon qilishni rejalashtirmoqda.
O'zbek futbol muxlislariga ma'lumki “temiryo'lchilar” Angliyaning “Flitfud Taun”, Eronning “Sepaxon” klublari bilan o'zaro hamkorlik memorandumini imzolagan. Ushbu memorandumga asosan murabbiylar o'zaro tajriba almashish, futbol darsliklarini ikki tomonga taqdim etishi belgilangan.
Hali maktabga ham chiqishga ulgarmagan yosh bolalar uchun xorijlik mutaxassislar ko'magida Gollandiya futbol maktablari sxemasi asosida mashg'ulotlar belgilandi.
“Lokomotiv” futbol maktabi 3 yoshdan boshlab bolalarni o'z maktabiga qabul qiladi. Bu bolalar barcha futbol sirlarini bizning “Loko-Junior” maktabida o'rganishadi va boshqa bolalarga qaraganda tezroq klubimiz asosiy tarkibiga qo'shilishadi.
Bugun “Loko-Junior” maktabi rasman o'z faoliyatini boshladi. Dastlabki mashg'ulotlar rasmiy tus oldi va barcha bolakaylar bugungi mashg'ulotda birgalikda ishtirok etdilar. Ertadan boshlab 3 va 4 yoshli bolalar bir guruxda, 5 va 6 yoshli bolalar alohida guruhda mashg'ulotlarni davom ettirishadi.
Hozircha bolalar haftaning dam olish kunlari – shanba va yakshanba kunlari mashg'ulotlarda qatnashmoqda. Keyinchalik mashg'ulot haftasiga 3 martadan davom ettiriladi.
Prezidentimiz tomonidan farzandlarimizni to'g'ri yo'ldan sog'lom, barkamol va aqlli bo'lib etishishiga barcha sharoit yaratib berilyapti. Kelajakda shu bolalar nafakat “Lokomotiv”, balki O'zbekiston terma jamoasi sharafini xalqaro maydonlarda ham munosib himoya kilishadi.
— deya xabar beradi uff.uz nashri.