"Real" bosh murabbiyi Joze Mourino 33 yoshli futbolchi Alvaro Arbeloa haqida juda iliq fikr bildirdi.
"Arbeloa men uchun shunchaki futbolchi emas, balki haqiqiy do'stdir. Futbolchi qanday qilib do'st bo'lishi mumkin? O'z kasbiga bo'lgan ishtiyoqi, klubiga bo'lgan sevgisi, jamoaga hamda uning oldiga qo'yilgan vazifaga bo'lgan sadoqati va o'zi bilan har kuni ishlaydigan insonlarga nisbatan bo'lgan hurmat bilan do'st bo'ladi.
Klub tarixida buyuk futbolchilar ko'p bo'ladi. Arbeloa balki bu toifadan emasdir, ammo shubhasiz "Real"ga, uning muxlislariga, murabbiylari va jamoadoshlariga borini va hatto yo'g'ini ham berib yuborgan o'yinchilar sirasidandir.
Arbeloa haqida men faqat minnatdorchilik so'zlarini aytishim mumkin. U 16 yillik murabbiylik faoliyatim davomida men bilan ishlagan eng muhim futbolchilardan biri bo'lib qoladi. U yaxshi futbolchi va ajoyib inson", - deydi Mourino.
— deya xabar beradi uff.uz nashri.