Odatda, evropaliklar Janubiy amerikaliklarga nisbatan ko'proq sovrin olishadi. Bu borada «Yil murabbiyi-2015» sovriniga da'vogarlik qilgan argentinalik mutaxassis, Chili termasining sobiq ustozi Xorxe Sampaoli FIFA.com saytiga bergan intervyusida o'z fikrlarini bildirib o'tdi.
- Nima uchun Janubiy Amerika futbolida faoliyat olib borayotgan insonlar xalqaro miqyosda kamroq nom qozonishadi?
- Hamma gap g'oliblarni aniqlash uchun o'tkaziladigan so'rovlarda. Osiyo, Afrika va boshqa mintaqalar Evropa futboliga bog'lanib qolishgan. Janubiy Amerika ular uchun uzoqlik qiladi. Bunday mintaqalar e'tiborini qozonish uchun klublar o'rtasidagi jahon chempionatida «Barselona»ni mag'lub etish lozim. Chili terma jamoasi bilan qilgan ishlarimiz ko'p narsani anglatadi. Bu boshqa mamlakatlar ko'z o'ngida ko'tarilishimizga yordam berdi.
- Nominatsiyalar haqida eshitganingizda qaerda edingiz?
- Chilida. Karaxt ahvolga tushib qoldim. Hatto, bunga ishona olmadim. Shu bilan birga, xursand ham bo'ldim. Nimagadir futbolchilik faoliyatimda xalaqit bergan jarohatlarni esladim. Albatta, futbolchilar haqida ham o'yladim. Axir ularsiz xech nima qila olmasdim.
- Aksariyat murabbiylardan farq­li o'laroq, o'zingiz professional darajada deyarli futbol o'ynamagansiz. Yuqori saviyali futbolchilar bilan til topishish qiyin kechmaydimi?
- Men hamma narsaga biroz boshqacha ko'z bilan qarayman. O'yinchilar futbol haqida sutkasiga 24 soat o'ylashimni bilishadi. Shuningdek, havaskorlar darajasida bo'lsada futbol o'ynaganman. Bugungi kunda millionlar o'yinida ayrim muhim narsalar inobatga olinmaydi. Men esa o'sha narsalarni futbolchilarga yaxshi tushuntira olaman.
- Nimaga chap qo'lingizda bunday tatuirovka bor?
- Agar odamlar aytganiga e'tibor qaratganimda hech qachon murabbiy bo'la olmasdim. Futbolchilik faoliyatimda muvaffaqiyat qozonish bobida kimlardandir ortda qolganman. Lekin rahbarlikka boshqa yo'l topdim. Agar boshqalarning gapini inobatga olganimda, hozir Kasildadagi bankda ishlayotgan bo'larmidim. Bu ham qandaydir inqilobni anglatadi. Hamma bir narsani aytsa, sen boshqasini qilging keladi. Hayotga hamisha shunday ko'z bilan qaraganman. Qolaversa, romantikman. Shu bois ham ayni ko'rinishdagi tatuirovkani ma'qul ko'rdim.
- O'tmishi har xil, yosh va tajribali futbolchilar bilan ishlash qanday kechyapti?
- Har bir shogirdim bilan individual yondashishga harakat qilaman. Ularning hammasi har xil. Lekin barchasi uchun futbol quvonch ulashadi. Shogirdlarim mas'uliyatni o'z bo'ynilariga olishlari, mag'lubiyatdan cho'chimasliklarini istayman. Chili terma jamoasi futbolchilari buni tezda tushunib etishdi. Shu bois ham ular o'yinga hayot-mamot jangiga kirishayotgandek tayyorlanadilar.
- Chilining «Kopa Amerika»da g'olib chiqishi uchun qanday ishlarni amalga oshirdingiz?
- Marselo Belsaning falsafasidan nimanidir o'zlashtirdim. Maydonga tushganda jahldor bo'lish bilan birga to'pni nazorat qilishga ham e'tibor qaratdik. Jamoaning o'ziga bo'lgan ishonchi ortdi. Shundan so'ng har bir uchrashuvda tashabbusga ega bo'ldik va natijada g'alaba qozondik. Endi Chili termasi har qanday raqibga munosib qarshilik ko'rsata oladi.
Davomi InterFUTBOL gazetasi blogida.
— deya xabar beradi uff.uz nashri.