Ayni damda yurtimizda bayram shukuhi hukmronlik qilmoqda. “9 may – Xotira va Qadrlash kuni” arafasida Qo'qonda qo'shaloq bayram. Bugun va ertaga futbol muxlislarini ajoyib o'yinlar kutib turibdi. Bugun o'rinbosarlarimiz “Bunyodkor” yoshlariga qarshi maydonga tushadi. Mazkur bahsga bo'lgan qiziqish juda yuqori. “Bunyodkor” o'rinbosarlari ortda qolgan etti turdan keyin biror marta mag'lubiyatga uchramagan yagona jamoa bo'lib turibdi. Ushbu uchrashuvda vakillarimiz kichik “Qaldirg'ochlar”ning mag'lubiyatsiz seriyasiga barham berish bilan birga turnir jadvalidagi o'rinlarini ham yaxshilab olish imkoniyatiga ega bo'lishadi. Ertaga esa asosiy tarkib vakillari maydonga tushadi. “Bunyodkor” Osiyo Chempionlar ligasida muvaffaqiyatsiz ishtirok etgan bo'lsa-da, Oliy liga bahslarini kutarinki ruhda o'tkazmoqda. Sergey Lushan shogirdlari ayni damda peshqadamlar qatorida borishmoqda. Jamoamiz a'zolari mazkur uchrashuvga jiddiy tarzda tayyorgarlik ko'rishdi. Bu vaqtda esa raqibimiz Qatarda “Lahviya”ga qarshi o'yinda ishtirok etdi. Bu narsa bo'lajak uchraushuvda bizga asqotishi mumkin. Har ikki o'yinda ham “Qo'qon-1912” jamoasi vakillariga omad tilab qolamiz. Aytgancha, uchrashuv hakami haqida ham ikki og'iz. Dushanba kuni o'tkaziladigan bellashuvni nafaqat mamlakatimizning balki, butun dunyoning eng taniqli referilaridan biri, Osiyoning besh karra eng yaxshi hakami Ravshan Ermatov boshqarib boradi. Ravshan Ermatov Jahonning 2015 yilgi eng yaxshi hakami deb tan olingan. Shuningdek, 38 yoshli hakamimiz turli yillarda hukumatimiz tomonidan «O'zbekiston iftixori» ko'krak nishoni, «El-yurt hurmati», «Buyuk xizmatlari uchun» ordenlariga sazovor bo'lganini ham e'tirof etish joiz.
— deya xabar beradi uff.uz nashri.