«Lester» - Angliya chempioni! Ayyor «tulki» haqidagi ertak haqiqatga aylandi. Keling bugun yana bir karra jamoaning tarixiy g'alaba yo'lida bosib o'tgan «bekatlar»iga e'tibor qaratsak.... 1-qadam: Ranerining tayinlanishi Uzoq vaqt davomida Klaudio Rane­ri omadsiz murabbiylar qatorida yurishga mahkum etildi. Misol uchun, faoliyati davomida hali biror marta chempionlik unvonini qo'lga kiritolmagandi. Bu borada italiyalik mutaxassisga na «Inter», na «Yuventus» va na «Monako» yordam beroldi. Gretsiya termasi va «Valensiya»dagi ishlari ham qoniqarsiz xotima topdi. Murabbiy nufuzidan batamom judo bo'lgan mutaxassisning «Lester»ga kelishi ko'pchilikni ajablantirdi. Xarri Rednapp va Gari Linekerdek allomalar Ranerining Angliyada hech narsaga erisholmasligini bashorat qilishgandi. Ana shu «noshud» hozirda APLning bosh qahramoni, matbuot anjumanlarining to'ri uniki, barcha uning har bir iborasiga diqqat bilan quloq soladi. Raneri qandaydir bir yil ichida omadsiz murabbiy «tamg'a»sini daho mutaxassis unvoniga aylantirdi. 2-qadam: Okazaki, Xut, Fuks, Kante xaridi «Lester»ning transfer faoliyati Ranerining murabbiylikka tayinlanishidan ham pastroq baholandi. «Tulkilar» 8 mln. funt evaziga «Maynts»dan Okazakining xarid qilishdi. Hech kimga tanish bo'lmagan 7 mln.li frantsuz N~Golo Kante, «Stok»dan 3 mln.ga sotib olingan Robert Xut va «Shalke»dan erkin agent sifatida o'tgan Kristian Fuks asosiy tarkib o'zagini tashkil etishdi. Ularning har qaysi biri chempionlik mavsumida kamida 30 martadan maydonga tushishdi. 3-qadam: Ilk turda Advokaat ustidan g'alaba Mavsumning dastlabki turida «Lester» Dik Advokaatning «Sanderlend»ini 4:2 hisobida mag'lubiyatga uchratdi. O'shandayoq APLning bo'lajak yulduzlari nur socha boshladilar. Chempionatning eng yaxshi to'puraridan biriga aylangan Jeymi Vardi gol muallifiga aylandi. Mavsumning eng yaxshi futbolchisi unvoniga loyiq topilgan Riyod Mahrez «dubl»ga erishdi. Mark Olbrayton esa o'z hisobiga 3(1}2) ballni yozib qo'ydi. 4-qadam: Birinchi o'ringa ko'tarilish Karvonboshilik tizginini «Lester» 21 noyabr oqshomida, «Nyukasl» ustidan qozonilgan yirik g'alaba (3:0)dan so'ng qo'lga oldi. Keyinchalik etakchilik bir necha bor qo'ldan chiqarildi. Lekin asosiy ta'qibchilar - «Tottenxem» va «Manchester Siti»ning bir nechta samarasiz o'yinlaridan keyin 1-o'ringa o'rnashib olindi. «Qarg'alar» ustidan erishilgan zafardan keyin ular mo''jiza ro'y berishi mumkinligiga astoydil ishona boshlashdi. 5-qadam: «Manchester siti» va «Liverpul» ustidan qozonilgan g'alaba «Lester» birinchi davrada chempionlik uchun asosiy raqobatchilari bo'lgan jamoalarga qarshi ancha kamtarona to'p surdi. «Arsenal»dan 2:5 va «Liverpul»dan minimal hisobda engildi. «Tottenxem» va «MYu» bilan murosa yo'li tanlandi. Biroq ikkinchi davra nisbatan omadliroq bo'ldi: Robert Xutning individual harakati asosiy ta'qibchi - «Tottenxem»ni 1:0 hisobida tiz cho'ktirdi, keyin «shaharliklar» «tulkilar» «o'lja»siga aylanishdi. 6-qadam: Terma jamoalar e'tirofi Musobaqada jarayonida «Lester» futbolchilariga nafaqat jamoaviy muvaffaqiyatlar, balki ulardagi shaxsiy o'sish ham qo'shimcha kuch, ilhom bag'ishladi. Jamoaning eng yaxshi to'purari Vardi 2015 yili may oyida terma jamoadan taklif olib, 7 iyun kuni Irlandiyaga qarshi bahsda ilk marta maydonga tushdi. Milliy jamoa safidagi ilk golini esa yaqinda Germaniya bilan bo'lgan bahsda nishonladi. Hozirda Jeymi Ueyn Runi va Xari Keynning asosiy raqobatchisi sifatida Evro-2016 turniriga qizg'in tayyorgarlik ko'rmoqda. Roy Xojson Denni Drinkuoterni ham o'z jamosiga taklif etgan. N~Golo Kante esa Frantsiya terma jamoasi tarkibida Rossiyaga qarshi o'rtoqlik uchrashuvida maydonga tushdi. 7-qadam: Vardi - superto'purar, Mahrez - eng yaxshi futbolchi Mavsumning eng yaxshi futbolchisi sovriniga da'vogarlar ro'yxatidan «Lester»ning o'ziga xos triosi - Vardi-Mahrez-Kante joy olishgandi. Ochig'i, ularning har biri unvonga loyiq edilar. Oxir-oqibat, mavsumning eng sermahsul o'yinchisi - Mahrez g'olib sifatida e'tirof etildi. Jazoirlik yarim himoyachi 34 marta maydonga tushib, 17ta gol va 10ta samarali uzatmani amalga oshirdi. Bu APLdagi eng yuqori ko'rsatkich! Vardi xususida to'xtaladigan bo'lsak, undagi fantastik taraqqiyot haqida juda ko'p yozildi. Darvoqe, yo'q joydan gol paydo qiladigan «tulki» to'purarda APLning eng yaxshi merganiga aylanish imkoniyati yo'q emas. Bu ishda unga chempionlik unvoni qo'shimcha kuch bag'ishlab, madad bo'lsa, ajabmas. 8-qadam: Raqobatchilar 100 qadamga chekinishdi «Lester»ning chempionligi xususidagi bahsda raqobatchi jamoalarning qarama-qarshi tomonga odimlashganini tilga olish o'rinli. Aniqrog'i, shu hayratomuz mavsumda ularning o'zlari raqobatchi rolini ma'qul ko'rishdi. «Chelsi» uzoq vaqtgacha turnir jadvalining tubidan ko'tarilish uchun kurashdi. Boshqa grandlarning ishtiroki nisbatan muvaffaqiyatliroq bo'lsada, «Lester»­chalik qat'iyat ko'rsatishmadi. «MYu» bilan «Liverpul»ga barqarorlik etishmadi, «Man.Siti» ChL bahslariga g'arq bo'lib, APLni unutdi. «Arsenal» esa doimiy omadsiz jamoa ekaniga iqror bo'lib, 4-pog'ona bilan kifoyalandi. Vaholanki, ta'qibchilar unga chempionlik yo'lini bo'shatib berishgandi. Nihoyat, «Tottenxem» ham «tulkilar» ortidan chopishni to'xtatdi. Agar «shporlar» «Vest Bromvich» bilan kechgan o'yinda ochko yo'qotishmaganida, vaziyat yanada chigallashgan, so'nggi turlarning shiddati kuchliroq bo'lishi aniq edi. Davomi InterFUTBOL gazetasi blogida
— deya xabar beradi uff.uz nashri.