Muxlislar tasavvuridagi chinakam futbol yorug' va shonli xotiralar bilan hamisha hayratomuzdir. Xotirasi uyg'oq, tarixi tirik futbolning kelajagi, albatta, munavvardir. Qaysiki futbol manqurtlashsa, qadrini yo'qotishi muqarrar. Qaerdaki xotiralar mudrasa, u erda futbol rivojlanmaydi, qadr topmaydi.
Xotira va qadrlash - mohiyatan muazzam tushunchalardir. Umumfutbol xotirasi va qadri shu ulkanlikning uzviy bir qismi, shubhasiz. Xo'sh, futbol xotirasi uyg'oq va nurafshon ekanligini qanday bilamiz? Albatta, unga umumiy munosabat orqali! Futbolga nisbatan bir butun milliy munosabatda esa qadr tuyg'usi yashaydi. Yo'q, futboldagi jonbaxshlik va tiriklikni har doim ham natijalar belgilayvermaydi. Ana, «Aston Villa» Angliyadagi sao­datmand xotiraga sodiq jamoalardan biri ekanligini «Nyukasl»ga qarshi kechgan bahsda isbotladi.
Jamoaning APLni tark etishi allaqachon barchaga ma'lum bo'lgan. «Nyukasl»ga esa elitada qolish uchun ochko juda-juda zarur edi, ya'ni ayrim muxlislar iborasi bilan aytganda, «Aston Villa» shu o'yinda yutqazsa yoki yutqazib bersa, asakasi ketmasdi. Lekin birmingemliklar bu kabi istaklarga qarshi o'laroq va ba'zi taxminlarni tan olmay, «Nyukasl»ga yutqazishmadi. Ajoyib an'a­nasi bilan mashhur jamoa APL bilan xayrlashib ketar ekan, o'zi va futbol qadrini ulug'ladi. «Aston Villa» kabi manfaat iskanjasiga tushib qolmagan jamoalargina o'z qadrlarini er qilishmaydi, inqiroz damlarida ham boshlarini baland tutishadi. To'g'ri, har qanday jamoa natijalar vositasi ila muxlislar qalbiga kirib boradi. Ishqi­bozlar esa ko'nish, ko'ndirish ruhidagi natijalardan qoniqmaydilar, shunday yakun uchun kechgan bahslarni yoqtirmaydilar.
 Shu ma'noda aytsak, OChLda «Lokomotiv»ning o'zi bilan birga «Al-Nasr»ni guruhdan «pley-off»ga olib chiqishi ko'pchilikka ma'qul kelmadi. Butun bahs davomida har ikki jamoa 0:0 hisobi uchun to'p surayotgani shundoqqina bilinib turdi. Bu kabi o'yin, ya'ni futbol kimga kerak? Har ikki jamoa manfaati asosiga moyil, raqobatdan xoli bahs kimni qiziqtiradi? Futbolda natija uchun o'ynaladigan uchrashuvlar ko'p uchraydi, ammo raqib bilan ruhan bir-birini qo'llab-quvvatlash kam kuzatiladi va hech qachon oqlanmaydi.
Afsuski, «Lokomotiv» shunday yo'l tutdi. Bunday foydali natijadan ko'ra, aslida «Bavariya» kabi yutqazmoq afzaldir. EChL yarim finalida «Atletiko» muxlislarni qoyil qoldirdi. «Bavariya» esa har qancha hurmatga loyiq ekanligini yana bir bor isbotlab, avvalgidan ham yuksaklashdi. Futbol tom ma'nodagi raqobat bilan tirik. Yorug' xotiralardan xoli jamoa, murabbiy va futbolchilar bu tiriklik ta'mini hech qachon his qilolmaydilar.
 «Chelsi» o'z uyida «Tottenxem»ga 0:2 hisobida yutqaza turib, durangga erishganida, ba'zi muxlislarning ko'ngli g'ashlandi. Emishki, «aristokratlar» «Lester»ning muddatidan avval chempion bo'lishiga sharoit yaratibdilar. Ehtimol, shundaydir, lekin buning uchun «Chelsi»ni qoralash no­o'rin. Nima, «ko'klar» keyingi turlardagi «intriga» uchun «shporlar»ga yutqazishlari kerakmidi?! Qani bunda mantiq? APLdagi har bir o'yin keskinligi va murosasizligi bilan go'zaldir. Shu bois, «MYu» safarda «Norvich»ni ayab o'tirmadi. «Norvich» muxlislari yuzidagi mungdan yuraklar zirqiradi. Biroq na iloj, mag'lubiyatni tan olmoqlik ham mardonavorlikdir. Mag'lubiyatga, durangga ko'nmoqlikdan futbolni O'zi asrasin.
Ko'nmoqlik - o'z-o'zini kamsitishdir, o'z qadrini toptashdir, xotiraga nisbatan hurmatsizlikdir. Agar «Lokomotiv» OChL guruh bosqichini yorqin o'yin bilan yakunlaganida, Andrey Miklyaev ortiqcha ehtiyotkorlikka berilmaganida, raqibdan xavfsiramaganida, undan norozi bo'lishmasdi muxlislar. Mana, endi klubni olqishlashga til bormayapti. Holbuki, «temiryo'lchilar» boshqa jamoalarimiz amalga oshirolmagan ishni uddalashdi. O'ylaymizki, «Lokomotiv» OChL doirasidagi bosh­qa barcha bahslarni ko'tarinki kayfiyatda o'tkazadi. Muxlislar yopiq himoyaviy uslub bilan manfaatlar birlashgan o'yinni bir-biridan juda yaxshi farqlashadi. Futboldagi «O'yin unutiladi, natija esa qoladi» aqidasi faqat uzoq muddatlar uchun aytilgan.
Klublarimizni OChL doirasidagi nursiz o'yinlari yaqin kelajakda muxlislar yodidan chiqmaydi. «Lokomotiv»ning muhim natijasi va mag'lubiyatsiz seriyasi ham ularga tasalli bo'lolmaydi. Haqiqiy tasalli mag'lubiyat va durangga shunchaki, ko'nmaslikdir. Yo'q, bu xulosa g'alabaga ham daxldor. «Al-Jazira» ustidan qozonilgan 3:0 hisobidagi g'alaba «Paxtakor»ni qoniqtirdi, jamoa shunga ko'ndi. Vaholanki, hisob bundan-da yirikroq bo'lishi mumkin edi. Jamoa shunchaki, buni istamadi, kuchini «Navbahor»ga qarshi kechadigan o'yin uchun asradi. Natijada o'yindagi yorqinlikka soya tushdi. O'tgan shanba oqshomidagi uchrashuvda ham «sherlar»ning maydondagi xatti-harakatlarida shunday holat kuzatildi.
Uchrashuvdagi yirik hisob esa «lochinlar»ning no'noq parvozi bilan bog'liqdir. Biz o'yin chog'i sherning haybatini ko'rmadik, na'rasini eshitmadik. Umuman olganda, uchrashuv davomida kuchni tejashga intilish, shu tariqa maydonda kurash ruhini pasaytirib yuborish yaxshilikka olib kelmaydi. Muxlislar uchun bunday o'yinlarning qizig'i yo'q. Rotatsiya jamoa kuchini asrash va uni kelgusi o'yinlarga teng taqsimlash uchun eng yaxshi yo'ldir. Masalan, Manuel Pellegrini «Real»ga qarshi uchrashuvdan avval shunday ishga qo'l urdi, ya'ni «Sautgempton» bilan bahs­ni Serxio Aguero, Yaya Ture, Vensan Kompani kabi etakchilarsiz o'tkazishdan cho'chimadi.
Garchi jamoasi mag'lubiyatga uchragan, EChL finaliga chiqolmagan bo'lsada, u to'g'ri yo'l tanladi. Chunki «Manchester Siti» barcha uchrashuvlarda oxirgi lahzalargacha kurashadi, mag'lubiyatga ko'nmaydi. Ha, bu o'rinda ko'nmaslik muhim. Uyg'oq xotira va o'z qadr-qimmatini bilish esa ko'nmaslikning asosidir.
Davomi InterFUTBOL gazetasi blogida.
— deya xabar beradi uff.uz nashri.