Serbiya superligasida faoliyat yuritayotgan Husniddin G'ofurov bilan suhbatni boshlar ekanman, birinchi savolim u to'p surayotgan «Yavor» futbol klubining bugungi holati to'g'risida bo'ldi.
— Husniddin, keling, avvalo jamoangiz «Yavor» FK haqida suhbatlashsak. Bugunga kelib jamoaning ahvoli qanday?
— Chempionatimizda 16 ta jamoa qatnashadi. Jamoamiz bugun chempionatda 9-o'rinda turibdi. Oldinda hali 3 ta tur uchrashuvi bor. Shundan so'ng jamoalar ikkiga bo'linib, pley-offda qatnashadi. Yuqori sakkiztalikka kirishga muvaffaq bo'lgan jamoalar sovrinli o'rinlar uchun o'zaro bahs olib borishsa, qolganlar ligada jon saqlash uchun kurashadi. Biz hozirda yuqori o'rinlar uchun kurashmoqdamiz, buning uchun esa, eng avvalo, sakkiztalikka kirishimiz zarur.
— Serbiya haqida gapirib bersangiz. Bu mamlakatning yurtimizga o'xshash tomonlari ham bor bo'lsa kerak?
— Yo'q, to'g'risini aytsam, o'xshash joylarini sezmadim. Bilmadim, balki menga shunday tuyulgan bo'lishi mumkin.
— Ko'chalarda sayr qilib yurgan chog'ingizda, muxlislar sizni tanib qolib, sizdan dastxat so'ragan vaqtlar ham bo'lganmi?
— Men yashayotgan shaharcha kichkina va tabiiyki, bu erda deyarli hamma bir-birini taniydi. Siz aytganday ba'zida ishqibozlar dastxat so'rab turishadi.
— Bizning mahallalarimizga o'xshab ketar ekan–da?
— Ha, shunaqa desa ham bo'ladi. Hamma bir-birini taniydi.
— Ko'pincha «Facebook» ijtimoiy tarmog'ida suratlaringizni joylashtirasiz va unda serbiyaliklar o'z tilida turli izohlar qo'yishadi. Serblar–ku, mayli, lekin siz ham ularning tilida nimalarnidir yozib qo'yishingiz meni taajjubga soladi. Demakki, til borasida sizda hech qanday muammo yo'g'–a, shundaymi?
— Buni bu qadar hayratlanarli, deb atamagan bo'lardim. Bu oddiy hol. Ancha vaqtdan buyon bu erda yashab kelmoqdaman, shunga bo'lsa kerak, hozirda serb tilini mukammal o'rganganman. Bemalol so'zlasha olaman.
— Serb tili rus tiliga o'xshab ketadi–ya?
— Ha, o'xshash so'zlari bor.
— Jamoangiz so'nggi o'yinni kim bilan o'tkazdi? Siz qancha vaqt o'ynadingiz?
— Chempionat doirasida «Metalak» klubiga qarshi 27-turda bellashdik. Uchrashuvda 1-0 hisobida g'alaba qozondik. Adashmasam, 65 daqiqa maydonda to'p surdim, keyin meni almashtirishdi.
— Ishlar yaxshimi, ishqilib? Bosh murabbiyning sizga bo'lgan ishonchi balandmi?
— Ha, hammasi yaxshi. Har o'yinda asosiy tarkibda maydonga tushyapman.
Davomi Tafsilot.Uz blogida.
— deya xabar beradi uff.uz nashri.