O'ta noyob iqtidor sohibi bo'lmish Neymar o'zining fantastik o'yinlari bilan muxlislar qalbini zabt etdi, aql bovar qilmas darajadagi fintlari qarshisida ojiz qolgan raqiblar esa uni o'zlariga nisbatan hurmatsizlik qilganlikda ayblashadi. Braziliyalik hujumchining ayrim qiliqlari u haqdagi yorqin taassurotlarni yo'qqa chiqarishi ham hech gap emas.
Darhaqiqat, kataloniyaliklar Neymarni Messining vorisi va «Barselona»ning kelajagi sifatida «ettinchi osmon»ga olib chiqib qo'yishgan. Bunday e'tibordan taltayib ketgan futbolchi rahbariyatdan 5 baravar ko'proq ish haqi talab qilgach, uning jamoada uzoq vaqt to'p surishiga eng ashaddiy muxlis ham shubha bilan qaraydigan bo'lib qoldi. Axir hatto Messi ham bu darajadagi erkalikka jur'at etolmaydi. Boz ustiga, Neymar o'z jamoasiga qanchalik manfaat keltirishidan qat'iy nazar, uning ayrim harakatlarini umuman oqlab bo'lmaydi.
Neymar va Barragan: Tarsaki, shisha va sharmandalik
«Barselona»ning o'z uyida «Valensiya»ga imkoniyatni boy berganiga chidolmagan Neymar raqiblaridan, ayniqsa, himoyachi Barragandan o'ch olishga urindi: futbolchilar maydonni tark etib ulgurmaslaridan Neymar uning yuziga tarsaki tushirdi, tribunalar ostidagi yo'lakda himoyachiga qarata suv to'la idishni uloqtirdi. Lekin o'yin jarayonida darvozani aniq nishonga ololmaganidek, shisha ham mo'ljalga tegmadi. Mish-mishlarga ko'ra, Neymarning asabiylashishiga Antonio sababchi bo'lgan: «Nima gap, boyvachcha, maoshingni qirqib tashlashdimi?» Xo'sh nima uchun Barragan Neymarga nisbatan shunday munosabatda bo'ldi? Braziliyalik raqibi bilan avvalgi to'qnashuvi tufayli. Yodingizda bo'lsa, fevral oyidagi «Valensiya» aynan shu «Kamp Nou»da 0:7 hisobidagi sharmandali mag'lubiyatni qabul qilib olgandi. O'sha uchrashuv lavhalaridan birida Antonio Neymar bilan to'p uchun kurashgan, hakam himoyachi tomonidan qoida buzilganini tushuntirishga uringandi. Neymar esa raqibiga shunday degandi: «Chakagingni o'chirsang, yaxshiroq bo'ladi. Men sendan 10 baravar ko'proq ish haqi olaman!» Har holda, hujumchining lablarida ispaniyalik jurnalistlar shunday iborani o'qishgandi.
Darhaqiqat, braziliyalik futbolchi haq, u Antoniodan 10 baravar ko'proq daromad oladi. Agar «Barsa» uning talabini qondirsa, tafovut 50 barobarga etishi mumkin. Ammo Barragan undan alamini olish uchun kim qancha soliq to'layotganiga sha'ma qilishi kifoya bo'lardi. Braziliyalik yulduzning oilasi uchun soliqlar - yoqimsiz mavzu.
Neymar va soliqlar: Soliqlar, qanaqa soliqlar?
Ma'lumki, zamondoshlarimizning ko'pchiligi soliqlarni yoqtirishmaydi, lekin ularni o'z vaqtida to'lashadi. Neymar esa bu borada o'ta qat'iyatli - u soliqlarni yoqtirmaydi ham, to'lamaydi ham. Anchadan buyon bu shunchaki taxminiy da'vo edi. Lekin 18 martdan keyin buni baralla aytish mumkin: San-Paulu sudining hukmiga ko'ra, Neymar firibgarlik va soliq to'lashdan bosh tortganlikda ayblanib, barcha hisob raqamlari «muzlatildi» va futbolchiga 46 mln. evro miqdorida jarima jazosi belgilandi. Ta'kidlash joiz, bu faqat Braziliyadagi huquq-tartibot mahkamalari tomonidan futbolchining 2012-2014 yillardagi faoliyati yuzasidan belgilangan jazo chorasi, xolos. Shundan so'ng Neymarlar oilasining moliyaviy dunyoqarashi o'zgardi, degan xulosaga kelish noto'g'ri bo'lardi. Ularni Ispaniya qonunchiligi ham qoniqtirmayapti. «Agar soliq to'g'risidagi muammolarga barham berilmasa, o'g'lim «Barselona»ni tark etishga majbur bo'ladi. Braziliyada hech qachon bunday qiyinchiliklarga duch kelgan emasmiz. Umid qilamanki, Ispaniyadagilar ham bizga xayrixohlik bildiradilar», - dedi Neymarning otasi. Qiziq, Ispaniyadagi muammolar ko'lami Braziliyadagidan jiddiyroq bo'lsa, jarima ham ko'proq bo'larkanda!
Neymar: Tupuk va qo'pol odobsizlik
Bundan bir necha yil avval Neymar yosh yigitcha bo'lib, sochni hurpaytiradigan moslamadan foydalanardi (Maugliga xos soch turmagi yodingizga tushdimi?). Lekin yosh bo'lishiga qaramay, Braziliya terma jamoasidan taklif olgandi. Meksika termasiga qarshi o'rtoqlik uchrashuvida u raqib himoyachisi Severo Mesening yuziga tupurgan, bunga javoban Mese Neymarni turtib yuborgandi. Oqibatda, hujumchi o'sha zahoti maydonga quladi va negadir yuzini changallab oldi. Biroq hakam uning nayrangiga uchmadi va haqli ravishda sariq kartochka bilan jazoladi. To'g'ri, ancha avval yuz bergan mojaroni eslashdan ne foyda, shundan beri Neymar o'zgarib ketdi, deya e'tiroz bildirishga haqlisiz. Chindan ham shunday - Neymar o'zgardi - faqat salbiy tomonga. «Barsa» «Selta»ni burdalab tashlagan kunni (6:1) muxlislar yaxshi bilishadi - Suaresning «xet-trik»i, Messi penaltini jamoadoshiga to'p uzatish orqali amalga oshirgani. Mana shu «tomosha»ni Neymarning vatandoshi bo'lmish Roberto Karlos raqibga nisbatan hurmatsizlik sifatida jiddiy tan­qid ostiga olgandi. Afsuski, o'sha oqshom Neymar bundan-da xunukroq tah­qirlashni amalga oshirdi: jarima zarbasini amalga oshirish uchun tayyorgarlik jarayonida u «Selta» yarim himoyachisi Ugo Maloga qarata burun qoqdi. Uchrashuv hakami Alexandro Ernandes bu odobsizlikni ko'rmay qoldi. Shu sababli ushbu qo'pollik qaydnomaga ham kiritilmadi va Neymar jazolanmadi. Lekin muxlislarda o'ziga nisbatan kuchli nafrat o'yg'otdi.
Davomi InterFUTBOL gazetasi blogida.
— deya xabar beradi uff.uz nashri.