Turkiyaning Istambul shahrida sport kurashlari bo'yicha o'tkazilgan ikkinchi jahon saralash musobaqasida ishtirok etgan mamlakatimiz polvonlari yurtimizga qaytib keldilar.
Ma'lumki, ushbu nufuzli musobaqaning erkin kurash bo'yicha bo'lib o'tgan musobaqasida muvaffaqiyatli ishtirok etgan ikki nafar sportchimiz Abbos Rahmonov va Bekzod Abdurahmonov shu yilning 5-21 avgust kunlari Rio-de-Janeyro shahri (Braziliya)da o'tkaziladigan XXXI yozgi Olimpiada o'yinlariga yo'llanma oldilar.
Og'irlik vazni 74 kg.gacha bo'lgan polvonlar bellashuvida Vatanimiz sharafini himoya qilgan Bekzod Abdurahmonov barcha raqiblari ustidan g'alaba qozonib, oltin medalga sazovor bo'lgan bo'lsa, vazni 57 kg.gacha bo'lgan sportchilar bahsida ishtirok etgan Abbos Rahmonov finalga qadar kechgan bellashuvlarni g'alaba bilan yakunlab, kumush medal sovrindori bo'ldi.
Toshkent xalqaro aeroportida g'olib sportchilarimizga Respublika sport jamoatchiligi, sportchilarning oila a'zolari, jamoadosh do'stlari hamda OAV xodimlari peshvoz chiqdilar.
Shavkat Jalilov
O'zbekiston Milliy Olimpiya qo'mitasi matbuot xizmati
— deya xabar beradi uff.uz nashri.