Xabaringiz bor, “Uzreport TV” telekanali orqali Evropa Chempionlar ligasining o'yinlari “jonli” efirda namoyish etilmoqda. 3-tur o'yinlarini sharhlab borish uchun Rossiyaning taniqli sport jurnalisti Denis Kazanskiy tashrif buyurdi. U mamlakatimizdagi futbol muxlislari bilan yaqindan tanishish va fikr almashish maqsadida bir guruh fanatlar bilan uchrashuv o'tkazdi. Futbol muxlislariga yaxshi ma'lumki, Denis Kazanskiy Angliyaning “Manchester Yunayted” klubi muxlisi hisoblanadi. Shu sababli “Uzreport TV”ning anjumanlar zalida “Manchester Yunayted” muxlislari bilan o'tgan uchrashuv Kazanskiy uchun ham juda qiziqarli tarzda o'tdi. Muxlislar taniqli sport sharhlovchisiga Evropa Chempionlar ligasi, Angliya futboli, jumladan, “Manchester Yunayted” klubi haqida o'zlarini qiziqtirgan savollar bilan murojaat qilib, uning fikrlari bilan qiziqishdi. Shuningdek, suhbat davomida sharhlovchilik kasbi mavzusiga ham to'xtalib o'tildi. Kazanskiy sharhlovchilik kasbining o'ziga xos tomonlari haqida fikr yuritar ekan, o'zining faoliyatida ro'y bergan qiziqarli voqealardan misollar keltirib o'tdi. O'zlarining sevimli sharhlovchilari bilan bo'lib o'tgan mazkur uchrashuv o'zbekistonlik futbol muxlislarida katta taassurot qoldirib, ular uchun unutilmas voqeaga aylanishi tabiiy. Uchrashuv so'nggida muxlislar Denis Kazanskiyga milliy qadriyatlarimiz aks etgan esdalik sovg'alar taqdim qilishdi va birgalikda fanatlar qo'shig'ini kuylashdi.
— deya xabar beradi uff.uz nashri.