Oldinroq Rossiya chempionatida to'p surgan o'zbekistonlik futbolchilar haqidagi maqolaning birinchi va ikkinchi qismlarini e'tiboringizga havola etgan edik. Bu safar uchinchi qism bilan tanishib chiqishingiz mumkin.
21. Davron Fayziev
O'ynagan jamoalari: “TsSKA” (2000-2001), “Alaniya” (2002)
Fayziev 2000 yili Samarqandning “Dinamo”sidan Moskvaning “TsSKA”siga o'tib ketdi. U ikki mavsum davomida ushbu jamoa tarkibida Rossiya chempionatida 23 ta uchrashuvda maydonga tushdi. Davron Moskvadagi 2 yillik sarguzashtlardan keyin Vladikavkazning “Alaniya”siga o'tib, bu klubda 1 yilda 12 marta maydonga tushdi. U 2003 yili Namanganning “Navbahor” jamoasiga yo'l oldi va Rossiyadagi faoliyatiga “nuqta” qo'ydi.
22. Nikolay Shirshov
O'ynagan jamoasi: “Rostov” (2000-2005)
Terma jamoamiz tarixidagi eng sermahsul himoyachi hisoblanadigan Shirshov 2000-2005 yillar davomida “Rostov” safida Rossiya chempionatida 120 uchrashuvda maydonga tushib bir gol urdi. U jamoaning haqiqiy etakchilaridan biri edi. Nikolay “Rostov”dan ketganidan keyin, Rossiyaning quyi divizion jamoalaridaa to'p surdi.
23. Ulug'bek Baqoev
O'ynagan jamoalari: “TsSKA” (2000), “Torpedo-ZIL” (2001-2002)
“Buxoro” safida tanila boshlagan Baqoev 2000 yili Moskvaning “TsSKA” jamoasiga o'tdi. Biroq Ulug'bek Moskvada o'z o'yinini topa olmadi. 7 uchrashuvda birorta ham gol ura olmagan hujumchi, keyingi mavsumni “Torpedo”da o'tkazdi. Afsuski bu jamoada ham Baqoevning ishlari yurishmadi – 20 uchrashuvda 0 gol. Shundan keyin u yana “Buxoro”ga qaytishga qaror qildi.
24. Vladimir Radkevich
O'ynagan jamoasi: “Rotor” (2002-2004)
Radkevich 2002 yili “Neftchi”dan “Rotor”ga yo'l oldi. Volgogradliklar tarkibida uch mavsum mobaynida 81 uchrashuvda ishtirok etib, 4 ta gol urgan Vladimir shundan keyin Rossiya quyi ligasi vakillari safida to'p surib, 2010 yili faoliyatini jonajon jamoasi “Neftchi”da yakunladi.
Davomi Furqat Yusupov blogida.
— deya xabar beradi uff.uz nashri.