Bundesliganing 5 nafar kashfiyot futbolchisi. Germaniya - futbol sohasida yoshlar bilan ishlash tizimi yaxshi yo'lga qo'yilgan mamlakat. Nemis diyorida har yili o'nlab yangi-yangi vunderkindlar ko'zga tashlanishadi. Evropaning etakchi klublari o'z skautlarini bejiz shu mamlakatning turli burchaklariga yuborishmaydi. Xullas, bugun bundesliga-2015|2016ning asosiy kashfiyotlari haqida alohida gaplashamiz.
Yulian Vaygl
Klubi: «Borussiya» Dortmund
Yoshi: 20
Pozitsiyasi: yarim himoyachi
Yulian Bad-Aybling shaharchasida tug'ilgan. Unda uzoq vaqt jismoniy ko'rsatkichlar masalasida muammolar borligi ko'rinib turdi, shunga qaramay, ko'pincha himoyada o'ynab, gavdasi nisbatan katta tengdoshlaridan sira qolishgani yo'q. Zero, yigitcha o'ta jonkuyar va maydonda bu xususiyati unga juda qo'l keladi. Vaygl 11 yoshida futbol bilan professional darajada shug'ullana boshladi - «Rozenxaym 1860» jamoasida. Ko'p o'tmay, o'smir yigitni «Myunxen 1860»ga taklif etishdi.
U shuningdek, «Bavariya» ko'rigida ham qatnashgan, ammo muvaffaqiyatsiz. Yulian «sherlar» safida qolganidan sira afsuslanmasa kerak. Chunonchi, u keyinchalik klub tarixidagi eng yosh sardorga aylandi. Xullas, Vaygl «Myunxen 1860»ni ilk marta ikkinchi bundesliga bahsida maydonga boshlab tushgan vaqtda 18 yoshli yigitcha edi. To'g'ri, sardorlik missiyasi uzoqqa cho'zilmadi. Gap shundaki, Yulian jamoadosh do'stlari davrasida yoqimsiz voqeaga aralashib qoldi: futbolchilar alamli mag'lubiyatdan so'ng  mahalliy barda rosa ko'ngilxushlik qilishdi. Oqibatda Markus fon Alen  yosh iqtidorni sardorlik bog'ichidan mahrum etdi. Vaygl shu-shu tartib-intizomga qat'iy amal qilishga o'rgandiki, buni fon Alen ham alohida tilga oldi. Endi esa talabchan Tomas Tuxel undan xursand va asosan «Tarbiyasi ideal yigit», deya maqtamoqda. «Borussiya» o'tgan yoz myunxenliklar etakchisini 2,5 mln. evroga sotib oldi.
Mana, ushbu xarajat qisqa vaqtda to'la oqlandi. Zero, Vaygl bir urinishda dortmundliklar tarkibidan joy olib, maydon markazida Ilkay Gyundogan va Sven Bender kabi tajribali futbolchilar oldida yomon taassurot qoldirmadi. O'yinning ba'zi jabhalari bo'yicha esa hattoki, har ikki tan olingan tayanch yarim himoyachisidan ham yaxshiroq ko'rindi. Xususan, birinchi to'p oshirish masalasida. Umuman, Yulianning zargarona va aniq uzatmalariga shunchaki, havas qilish mumkin. Deylik, Menxengladbaxning «Borussiya»siga qarshi kechgan debyut o'yinida bu borada 96 foizli natija qayd etgandi. Vaygl hozir «Iduna Park»da o'zini mutlaqo qulay sezmoqda. Ha, yarim himoyachi dastlab shovqinli Dortmundga moslashishda ancha qiynaldi.
Lekin vaqt o'tishi bilan yangilangan «Borussiya»da o'z o'rni borligini isbotlay boshladi. Yurgen Kloppning 7 yillik ajib davridan so'ng yanada yorqinroq jamoa shakllantirish g'oyat mushkul, lekin joriy mavsum buning ilojsiz ish emasligiga umid uyg'otdi. «Sariq-qoralar» fanatlari esa hozirdan Yulian Vayglga alohida ishonch bilan qarashyapti. Yozda Evropaning eng ilg'or klublari «Borussiya»ga yosh futbolchi xususida murojaat etsalar, ajabmas. Biroq yarim himoyachining o'zi hozircha hech qaerga shoshilmayapti - avvalo, «Borussiya»da yorqin iz qoldirmoqchi. Dortmund klubi sport direktori Mixael Tsork aynan shunday yondashuvni ma'qullaydi, albatta va yigitchani maqtashni ham unutmayapti: «Vaygl - joriy mavsumning eng yoqimli «syurprizi». U Yulianning uzoq yillar davomida Dortmund jamoasi sharafini munosib himoya qilishiga shubhalanmayapti.
Jonatan Ta
Klubi: «Bayer» Leverkuzen
Yoshi: 20
Pozitsiyasi: himoyachi
Jonatanning otasi Kot-d~Ivuardan. Ta 5 yoshidan boshlab XIX asrda asos solingan afsonaviy «Altone 93» maktabida to'p surgan. Bolaligidan baquvvat bo'lgan futbolchini murabbiylar himoya chizig'ida sinab ko'rishgan. O'shandayoq mutaxassislar unda etakchilik sifatlari borligini payqashgan. Futboldagi haqiqiy ta'limni 13 yoshidan boshlab «Gamburg» akademiyasida olgan.
«Dinozavr»larning ikkinchi jamoasi ustozi Rodolfo Kardoso iste'dodli himoyachini asosiy tarkibga tavsiya etdi. Biroq na Torsten Fink, na Mirko Slomka bu o'spirin xizmatiga ehtiyoj sezishdi. Faqatgina Bert van Marveyk Germaniyadagi faoliyati davomida Jonatanning o'yinini Vesterman-Juru tandemi bilan uyg'unlashtirdi. Ammo gollandiyalik murabbiy ketgach, Ta o'yin amaliyotisiz qolib ketdi va ijara asosida «Fortuna»ga jo'natildi.
Dyusseldorfda uning ishlari yomon kechmadi: ikkinchi bundesligada tajriba to'pladi, jamoasining ligada qolishiga ko'maklashdi. Jonatanga qadrdon jamoasida imkoniyat berishni xohlashmadi va uni 10 mln. evro evaziga «Bayer»ga sotishdi. Agar mavsum avvalida Emer Toprak va Tin Edvay jiddiy jarohat olishmaganida, Taning Leverkuzenda muvaffaqiyat qozonishi so'roq ostida qolardi, balki. Rojer Shmidt bosh murabbiy sifatida Jonatan va Papadopulosga ishonch bildirdi. Bu tandem ishonchni oqladi. Gretsiyalik himoyachi keyinchalik zaxira o'rindig'iga «mixlangan» bo'lsa, Jonatan asosiy tarkibdagi o'rnini saqlab qoldi. Keyinchalik Ta Germaniya yoshlar termasi sardoriga aylandi.
Joshua Kimmix
Klubi: «Bavariya» Myunxen
Yoshi: 21
Pozitsiyasi: himoyachi|yarim himoyachi
Kimmix mo''jazgina Rotvayl shaharchasida tug'ilgan. 12 yoshidayoq Joshuaning to'p bilan muomala qilish bobidagi mahorati namoyon bo'la boshladi. Shunda oilaviy kengashdan so'ng yigitchani «Shtutgart» akademiyasida sinab ko'rishga qaror qilindi. Kimmix jamoaga ortiqcha qiyinchiliklarsiz moslashdi, Tomas Shneyder, Mark Kinle, Ilya Arachich singari murabbiylar bilan ishlashga ulgurdi. O'smirlar bundesligasida o'ynadi, ammo kattalar jamoasida debyu­tini nishonlash unga nasib etmadi.
Iqtidorli futbolchi «Red Bull» safida Germaniyaning quyi divizionlarini zabt etishga kirishdi. Leyptsigda bosh murabbiy Aleksandr Tsorniger Joshua uchun optimal pozitsiya tanlashga intildi: markaziy yarim himoyaning hujumga yaqin qismiga qo'ydi, so'ngra orqaroqqa - tayanch hududiga surdi, qanotlarda sinab ko'rdi - hamma joyda Kimmix o'zidan yorqin taassurot qoldirdi. «Buqalar» ikkinchi bundesligagacha ko'tarilishdi, tineyjerning muvaffaqiyatini esa myunxenlik skautlar diqqat bilan kuzatishayotgandi. Joriy mavsum avvalida «Bavariya» futbolchining shartnomasini 8,5 mln. evro evaziga «Shtutgart»dan sotib oldi.
Asosiy himoyachilar jarohat olishgach, Pep Gvardiola Alaba-Kimmix tandemini tajribadan o'tkazishga qaror qildi. Avstriyalik futbolchini hamma universal sifatida tanisa, 176 sm. bo'yga ega Joshuani mudofaa markazida tasavvur qilish qiyin edi. Ammo Kimmix yuqoriga sakrashi va to'pni olib qo'yishdagi faolligi evaziga bu kamchilikni yopishga erishdi. Aynan uning ishonchli harakatlari «Yuventus»ni mag'lub etishda «Bavariya»ga asqotdi. O'shandayoq Gvardiolaning yoshlar bilan ishlash salohiyati yana bir bor namoyon bo'ldi.
Jarohatlar chindan-da «Bavariya»­ni qiyin ahvolga soldi, ammo zaxiralar o'rindig'ining kengligi va yoshlarning ishonchli harakatlari myunxenliklarga bundesligadagi etakchilikni saqlab qolish va Chempionlar Ligasi yarim finaliga qadar etib borish imkoniyatini taqdim etdi.
Mahmud Doud
Klubi: «Borussiya» Menxengladbax
Yoshi: 20
Pozitsiyasi: yarim himoyachi
Germaniya yoshlar termasi yarim himoyachisining tug'ilgan joyi - Suriyaning Amuda shahri. Bolakay bir yoshga to'lmasidan Doudlar oilasi Germaniyaning Dyusseldorfiga ko'chib o'tdi. Mahmud futboldagi dastlabki qadamlarini aynan shu erda, mahalliy «Resrat» jamoasida tashladi. Keyinchalik «Fortuna» akademiyasida professional tarzda shug'ullana boshladi. 14 yoshga to'lganida uning iqtidorini Menxengladbaxning «Borussiya» klubi vakillari payqab qolib, Mahmudning ota-onasini yangi jamoa bilan shartnoma imzolashga ko'ndirdilar. Doud ikki yil avval asosiyda porlashi mumkin edi, ammo 17 yoshli o'spirin jiddiy jarohat oldi.
Jamoa bosh murabbiyligiga Andre Shubert tayinlangach, futbolchilarga o'zlarini ko'rsatish nisbatan osonroq kechdi. Yangi ustoz boshchiligida 20 yoshli daniyalik himoyachi Andreas Kristensen asosiy tarkibdan muqim joy egalladi. Torgan Azarning o'yini ochilib ketdi. 19 yoshli Niko Elvedi esa asosiydan Yulian Korbni «siqib chiqardi». Doudga kelsak, Shubert undan Kristof Kramerning o'rinbosari sifatida foydalandi. Suriyalik iqtidor egasi Granit Jako bilan «ayg'irlar» o'yinini tashkil eta boshladi. Mahmud so'nggi «pas»ni berish xususiyatini yaxshi o'zlashtirgan (uning hisobida 8ta golli uzatma bor), maydon markazida ham ancha faol.
Doud kelasi mavsum Angliyaga ko'chib o'tishi mumkin: hozirdanoq Manchesterning ikki klubi va London grandlari uning uchun pul sarflashga tayyorlar. Qolaversa, Mahmud tez orada Germaniya termasida porlasa, aslo ajablanmaymiz.
Mitchell Vayzer
Klubi: «Gerta» Berlin
Yoshi: 22
Pozitsiyasi: vinger
Mitchell-Eli uchun futbolga bo'lgan mehr otadan qolgan meros. Uning otasi Patrik Vayzer 1990 yillarda bundesliga va Liga 1 jamoalarida tayanch chizig'ida to'p surgan. Vayzerlar oilasi Frantsiyadan Germaniyaga qaytgach, bir necha yil Braunshveygda yashashdi. O'sha erda 6 yoshli Mitchell mahalliy «Ayntraxt» klubi sektsiyasiga a'zo bo'ldi. Otasi o'g'liga faoliyatini bir vaqtlari o'zi o'ynagan «Kyoln»da davom ettirishni tavsiya qildi. Mitchell 17 yoshida «echkilar»ning yoshlar jamoasida o'zining dastlabki sov-rinini qo'lga kiritdi. Oradan bir yil o'tib, «Bayer»ga qarshi bahsda birinchi va oxirgi marta asosiy tarkibda to'p surdi.
Yoshlar termasidagi muvaffaqiyatli ishtirokidan so'ng Vayzerni «Bavariya» 500 ming evro evaziga sotib oldi. «Yoshlik chog'ingizda «Bavariya»da professionalga aylanish - ajoyib. Myunxenga yulduzlarga termulib o'tirish uchun kelmadim. Bu men uchun katta imkoniyat», - degandi Mitchell o'zining ilk intervyularidan birida. Ammo Aren Robben va Frank Riberi kabi «nahanglar» bilan raqobatlashish oson emasdi. Yarim yildan so'ng klub rahbariyati iqtidorli yigitchani so'ndirmaslik maqsadida uni amaliyot o'tash uchun «Kayzerslautern»ga jo'natdi.
Ammo Franko Fode jamoasida ham Mitchellning ishlari qovushmadi. Vayzer ikkinchi bundesligada 13ta o'yin o'tkazgach, Myunxenga qaytdi. «Bavariya» bilan tuzilgan shartnoma shu yilning boshida yakunlanar, so'ngra Mitchell ergin agentga aylanardi. «Gerta» prezidenti Verner Gegenbauerning aqlli qarori bo'lmaganida, yosh iqtidor egasining faoliyati tugashi ham mumkin edi. Uddaburon mutasaddi uni tekinga qo'lga kiritdi. Mitchell Berlinda nafaqat Pal Dardai jamoasiga moslashishni uddaladi, balki o'zining eng yaxshi sifatlarini ham namoyon eta bildi: tezlik, fintlar, «podkatlar»... Hattoki, vengriyalik murabbiy Vayzerdan har qaysi qanotda bir xil o'yin namoyish etadigan universal sifatida foydalandi.
Balki Mitchell shoshilgandir, «Bavariya»ga o'tish chog'ida hisob-kitobni to'g'ri qilmagandir. Ammo poytaxt klubi safiga qo'shilgach, faoliyatini yuksak darajada davom ettirish imkoniyati tug'ildi. O'.UMAROV tayyorladi Manba: "InterFUTBOL" gazetasi
— deya xabar beradi uff.uz nashri.