"Paxtakor" murabbiyi Grigoriy Kolossovskiy O'zbekiston chempionati 9-turi doirasida "Lokomotiv"ga qarshi kechgan o'yindan so'ng (0:1) o'tkazilgan matbuot anjumanida uchrashuv hakamligi haqida keskin fikr bildirdi. Bu haqida "Paxtakor" klubining tvitterdagi sahifasida xabar berilgan.
"Bugun faqat “Lokomotiv”ga qarshi emas, balki 15 nafar futbolchisi bor jamoa bilan o'ynadik. O'yinimiz bilan bizni hisobdan chiqarishga erta ekanligini ko'rsatdik. Biz hali qaytamiz, bizni hisobdan chiqarmang.
Uchrashuv davomida biz yaxshiroq harakat qildik. To'g'ri yo'nalishda ekanimizni isbotladik. Texnik va taktik tarafdan futbolchilarimiz juda yaxshi o'yin namoyish qilishdi. Hali chempionatda o'z maydonimizda “Lokomotiv” bilan o'yinimiz bor.
O'shanda kimning qanday o'ynashini ko'rasiz. O'yinimiz sizga yoqadi deb o'ylayman. Muxlislar stadionni "Paxtakor chempion" degan hayqiriqlar bilan tark etishdi. O'yinimizga berilgan munosib baho uchun minnatdorchilik bildiramiz.
Bizni stadionda juda yaxshi qo'llab-quvvatlab turgan ishqibozlarga jamoa nomidan rahmat aytamiz", - deydi murabbiy.
Eslatib o'tamiz, "Lokomotiv" - "Paxtakor" o'yinini (1:0) FIFA referisi Ravshan Ermatov boshqarib borgan edi.

— deya xabar beradi uff.uz nashri.