O'zbekiston milliy terma jamoasining JCh-2018 3-saralash bosqichidagi raqibi – Xitoy milliy terma jamoasi iyun oyida ikkita o'rtoqlik uchrashuvi o'tkazish borasida kelishuvga erishdi.
Xitoy Futbol Uyushmasi xabariga ko'ra, Gao Xunbo bosh murabbiyligidagi Xitoy terma jamoasi dastlab, 3 iyun kuni Trinidad va Tobago terma jamoasiga qarshi o'rtoqlik uchrashuvini o'tkazsa, 7 iyun kuni Qozog'iston milliy terma jamoasiga qarshi o'ynaydi. Har ikkala uchrashuvga ham Xitoy mezbonlik qilishi tasdiqlandi.
Eslatib o'tamiz, Xitoy milliy terma jamoasi JCh-2018 3-saralash bosqichi "A" guruhida O'zbekiston terma jamoasiga raqiblik qiladi. Mazkur guruh bahslari doirasida O'zbekiston hamda Xitoy terma jamoalari o'rtasidagi ilk o'ying shu yilning 11 oktyabr kuni Toshkentda o'tkaziladi. Terma jamoalarning guruh bosqichidagi ikkinchi o'yiniga esa, 2017 yilning 31 avgust kuni Xitoy mezbonlik qiladi.
Avvalroq xabar berilganidek,  Samvel Babayan bosh murabbiyligidagi O'zbekiston terma jamoasi ham iyun oyida bir qator o'rtoqlik uchrashuvlarida maydonga tushishi rejalashtirilgan. Ulardan biri 8 iyun kuni Avstriyadagi yig'in davomida Kanada terma jamoasiga qarshi bo'lib o'tadi.
— deya xabar beradi uff.uz nashri.