Malayziya chempionatida to'p surayotgan hamyurtimiz Lutfulla To'raev qisqa fursat ichida «Felda Yunayted»ning asosiy tarkib futbolchisiga aylanib ulgurdi. So'nggi o'yinlarda yarim himoyachi to'purarlik mahoratini ham namoyish etmoqda.
Hozirda uning jamoa­si turnir jadvalida peshqadamlik qilyapti. Yodingizda bo'lsa, «Felda Yunayted»da «Paxtakor»ning sobiq sardori Boyan Miladinovich ham o'ynagandi. Biz «Kelantan Kota-Baru» klubiga qarshi kechgan va «Felda»ning g'alabasi (2:0) bilan yakunlangan uchrashuvdan so'ng Lutfulla To'raevdan intervyu oldik. Aytgancha, bu o'yinda hisobni aynan hamyurtimiz ochdi va Malayziya chempionatidagi gollari sonini 4taga etkazdi.
- Lutfulla, navbatdagi g'alaba bilan tabriklayman. Suhbatimiz avvalida «Kelantan»ga qarshi kechgan o'yin haqidagi fikrlaringiz bilan o'rtoqlashsangiz.
- Tabrik uchun rahmat. Malayziya chempionati o'zining qizg'in pallasiga kirib boryapti. Asosiy raqibimiz - «Johor» klubi ham bizni izma-iz ta'qib etmoqda. Shu bois, «Kelantan»ga qarshi kechadigan o'yin-da ochko yo'qotishga haqqimiz yo'q edi. Birinchi bo'lim yakunlanishi arafasida Karlos Filo, ikkinchi bo'lim boshida Fransis Forki gol urib, jamoamizga navbatdagi uch ochkoni keltirishdi.
- Malayziya chempionatida to'p surayotganingizga bir necha oy bo'ldi. Yangi muhitga moslashib oldingizmi?
- Albatta, o'zim kutganimdan ham tezda kirishib ketdim. Jamoadoshlarim bu borada menga yordam berishdi.
- Aslida, ushbu chempionatga yo'l olishingiz qanday amalga oshgandi?
- O'tgan yili menga Malayziyada faoliyat yurituvchi futbol agentlaridan biri qo'ng'iroq qilib, «Shu chempionatda o'ynash niyating bormi?», deb so'ragandi. Men esa, agar oldiga yuksak vazifalarni qo'yadigan klub bo'lsa, taklifni ko'rib chiqishga tayyorligimni aytgandim.
- Sizni ko'rikdan o'tkazishdimi yoki to'g'ridan-to'g'ri shartnoma taklif qilishdimi?
- «Felda Yunayted» klubida ishlaydigan murabbiylar o'yinimni ko'rish uchun Toshkentga kelishgandi. Harakatlarimni bevosita stadionda kuzatgach, shartnoma taklif qilishdi. O'sha agent bilan Toshkentda gaplashib oldik va dekabr oyida Malayziyaga borib, shartnomaga imzo chekdim. Hech qanday ko'rik mashg'ulotlarisiz «Felda» safiga borib qo'shildim.
- Aynan shu klubda to'p surgan Boyan Miladinovich bilan maslahatlashdingizmi?
- O'tgan yili agent bilan ilk suhbatimizdan keyinoq Boyan bilan gaplashgandim. Bu jamoa to'g'risida ma'lumotlar oldim. Malayziyadagi hayot tarzi, sharoitlar, klubdagi ichki muhit, chempionatining saviyasi haqida so'radim. U menga hech ikkilanishsiz shartnoma imzolashni tavsiya qildi.
- Sharoitlar siz kutgandek bo'lib chiqdimi?
- Yangi klubim menga har tomonlama ma'qul keldi.
- Yashash tarzi qanday ekan? Alohida uy, mashina berishdimi?
- Albatta. Stadionga yaqin hududdan xonadon ajratishdi. «Honda» rusumli mashinam bor. Bu borada nolishga haqqim yo'q.
- Oilangiz siz bilan birgami?
- Ha, ularni ham olib kelganman. Oila a'zolaringiz yoningizda bo'lsa, o'zingizni uyingizdagidek his qilar ekansiz. Bu borada ko'nglim xotirjam.
- Bizning oliy liga bilan taqqoslaganda, Malayziya chempionatining saviyasi haqida nima deysiz?
- Oliy ligamiz darajasi yuqoriroq. Malayziya chempionati elitasida 12ta klub ishtirok etadi. O'zimizning chempionatga o'xshab ikkita davrada o'yinlar bo'lib o'tadi.
- Lekin moliyaviy tomondan yaxshiroq bo'lsa kerak?
- Bu savol yopiqligicha qolaversin (kulib), hamma biladi-ku!
- Sizni shartnomaning moliyaviy tomoni to'liq qanoatlantiradi, shundaymi?
- Yuz foiz. Aks holda, bu erga kelmasdim.
- Klubdagi legionerlar haqida qanday fikrdasiz? Bu nomga mos o'yin ko'rsatishyaptimi?
- «Felda» murabbiylar shtabi legionerlar uchun belgilangan limitdan to'liq foydalanishgan. Mendan tashqari yana uch nafar - Liberiya, Nigeriya va Braziliyadan kelgan futbolchilar bor. Ular saviya bo'yicha mahalliy o'yinchilardan sezilarli darajada farq qiladilar. Lekin malayziyalik futbolchilar ham chakki emas.
- «Felda Yunayted» O'zbekiston chempionatida medallar uchun kurasha olarmidi?
- Menimcha yo'q. Kuchli oltilikka kirishi mumkin.
- Jamoangiz oldiga chempionlik vazifasi qo'yilganmi?
- Shubhasiz, faqat birinchi o'rin. Bu maqsadga erisha olamiz, deb o'ylayman. Lekin oson bo'lmaydi. Asosiy raqib - «Johor» klubi bilan bir xil ochko jamg'arganmiz. Bizda ikkita mag'lubiyat bor, ular esa hali yutqazishmagan. Chempionatdagi mag'lubiyatga uchramagan yagona jamoa ham aynan «Johor» bo'lib turibdi.
- Malayziya stadionlarining holati, futbolga bo'lgan e'tibor, muxlislari haqida ham ma'lumot bering.
- Bu mamlakat Osiyo chempionatiga mezbonlik qilgan. Tabiiyki, stadionlari jahon talablariga to'liq javob beradi. Tomoshabinlar tashrifi ham yaxshi. Futbol kunlari katta bayram bo'ladi. Markaziy o'yin-larda xuddi Evropaga borib qolgandek taassurot uyg'onadi. Stadiondagi muhit - super. Boshqa so'z topa olmadim. Muxlislar jamoalarini oxirigacha qo'llab-quvvatlashadi. O'yinlar ham ishqibozlar uchun qulay paytda o'tkaziladi. Aksariyat uchrashuvlar soat 21:00da boshlanadi.
- Murabbiy bilan munosabatlaringiz qanday? Til masalasida muammolar yo'qmi?
- Munosabatimiz a'lo darajada. Jamoamiz ustozi - mahalliy mutaxassis Irfan Bakti. Murabbiy va futbolchining bir-birini tushunishi futboldagi birinchi muvaffaqiyat hisoblanadi. Til masalasida esa dastlab ozgina qiynaldim, ammo hozir hammasi joyida.
- Ingliz tilida gaplashyapsizmi?
- Xuddi shunday.
- Shartnoma qancha muddatga imzolangan?
- Bir yilga tuzganman.
- Uzaytirish istagi bormi?
- Shunday niyat yo'q emas. Hammasi ko'ngildagidek davom etsa, shartnomani uzaytiramiz. Birinchi galda o'z oldimizga qo'yilgan vazifalarni bajarib olaylik. Chempionlik va kubokda g'alaba qozonish bosh maqsadimiz sanaladi.
- Malayziyaga kelish oldidan sizda boshqa takliflar ham bormidi?
- Yo'q. Bo'lganida ham ko'rib chiqmasdim. Chunki Malayziyaga kelishim o'tgan yilning yozidayoq deyarli aniq bo'lib ulgurgandi.
- O'nta o'yinda ikkita mag'lubiyat qayd etibsizlar. Bu o'z oldiga chempionlik vazifasini qo'ygan jamoa uchun ko'p emasmi?
- Biroz ko'pdek tuyulyapti (kuladi). Lekin hamon chempionat peshqadami bo'lib turganimiz kishini xursand qiladi. Asosiy raqib - «Johor»ga 1:2 hisobida imkoniyatni boy berganmiz. O'sha o'yinda 45 daqiqa mobaynida maydonda bir kishi kam bo'lib harakat qilgandik. Futbolchimiz qizil kartochka olganidan keyin mag'lubiyatga uchradik. «Perak» klubiga qarshi kechgan o'yindagi mag'lubiyatimizga o'zimiz sababchimiz. Himoyada yo'l qo'yilgan xatolar bizga qimmatga tushgandi. O'sha uchrashuvda 2:3 hisobida yutqazdik. Ikkala bahsda ham raqiblarimizga bitta to'p farqi bilan mag'lub bo'ldik.
- O'zbekiston chempionatida o'ynagan pozitsiyangizda harakat qilyapsizmi?
- Murabbiy biroz o'zgarish qilgan. Hujumchi ortida to'p suryapman.
- Vohid Shodiev bilan ham ko'rishib turibsizmi?
- U biroz uzoqroqda yashaydi. Ko'rishmasak ham, tez-tez telefonda gaplashib turibmiz.
- Sizning jamoangizdan farqli o'laroq, Shodievning klubi va o'ziga omad etishmayapti...
- Afsuski, shunday bo'lyapti. Lekin ishlashda davom etish kerak. O'ylaymanki, hali ular o'z o'yinlarini topib olishadi va hammasi yaxshi bo'ladi.
- O'zbekiston chempionatini ham kuzatib boryapsizmi?
- Albatta. Do'stlarim bilan har kuni bu borada gaplashib turamiz. Taassurotlar juda yaxshi. Chempionat qiziqarli boshlandi. «Buxoro», «Metallurg», «Qizilqum» jamoalari ajoyib start olishdi. Oxirgi tomosha qilganim «Lokomotiv» - «Al-Nasr» o'yini bo'ldi. Undan avval «Paxtakor» - «Al-Jazira» va «Bunyodkor» - «Paxtakor» uchrashuvlarini ko'rdim. Klublarimizning OChLdagi ishtiroki biroz omadsiz bo'ldi. Birgina «Lokomotiv» klubi guruhdan chiqish vazifasini uddaladi. «Paxtakor» bunga juda yaqin kelgandi. Lekin guruhdagi parallel o'tgan ikkinchi o'yinda «Traktorsozi» klubi kutilmaganda mag'lubiyatga uchradi. «Paxtakor»ning 10 ochko bilan ham guruhdan chiqa olmaganligi juda alamli bo'ldi. «Bunyodkor» va «Nasaf»ga esa bu yil omad kulib boqmadi. Tabiiyki, sobiq jamoam «Lokomotiv»ga muxlislik qilaman. Ularning uzoqroqqa borishlariga ishonaman.
- Toshkent derbisida amaldagi chempionning yirik hisobda mag'lubiyatga uchraganini qanday izohlaysiz?
- «Bunyodkor» o'tgan yili ham «Paxtakor»ni mag'lub etgandi. «Qaldirg'ochlar» o'sha kuni juda yaxshi futbol namoyish qilishdi. Lekin yirik hisob bo'lishini kutmagandim.
- «Qizilqum», «Metallurg», «Buxoro» jamoalari ko'rsatayotgan yorqin o'yinlar vaqtinchalikmikan?
- Menimcha, bu natijalar tasodifiy emas. «Metallurg» klubi oldindan yaxshi o'yin namoyish etib kelgan. Bekobodliklar uchun kuchli klublardan ochko tortib olish yangilik emas. «Buxoro» esa mavsumlar oralig'ida tarkibiga kuchli futbolchilarni qo'shib oldi. «Qizilqum» klubiga kelsak, ular mana shu trio orasida hayron qoldirishyapti.
- Xabaringiz bor, O'zbekiston milliy terma jamoasining JCh-2018 uchinchi saralash bosqichidagi raqiblari ma'lum bo'ldi. Xo'sh, mundialga chiqish imkoniyatlarimizni qanday baholaysiz?
- Fikrimcha, bugunga kelib raqib tanlaydigan vaqtdan o'tdik. Guruhdagi jamoalarning kuchidan qat'iy nazar, barcha uchrashuvlarda g'alaba qozonishimiz shart, deb o'ylayman. Imkoniyatlar bundan avvalgi JCh saralashlarida ham bo'lgan. Faqat undan foydalanish muhim masala.
- Yangi klubingizda ham 13-raqamga sodiq qolibsiz. Sizda raqam tanlash imkoniyati bormidi?
- Mendan bu haqda so'rashganida, aynan 13-raqamli futbolkani tanlaganman.
- Bu raqam sizga omad keltirganmi? Irim qilmaysizmi?
- Yo'q, irimlarga ishonmayman. Yoshligimdan 13-raqam ostida o'ynaganman. Bilmadim, menga shu raqam yoqadi. O'ziga yarasha yutuqlarga erishdim.
- Kimlar bilan yaqindan do'stlashib oldingiz?
- Hamma bilan birdek munosabatdamiz. Ko'z tegmasin, jamoamiz juda ahil.
- Lutfulla, futboldan boshqa qiziqishlar ham bormi, ya'ni xobbingiz?
- Bo'sh vaqtimda bilyard o'ynab turaman.
- Futbolni tanlaganingizga afsuslangan vaqtlaringiz bo'lganmi? Masalan, stadionda muxlislar bilan gap-so'zlarda yoki boshqa holatlarda?
- Yo'q. Hech qachon afsuslanmaganman.
- Umuman, futbolni tanlashingizga kim yoki qaysi voqea sabab bo'lgan?
- Bolalikdagi qiziqishlar sabab futbolni kasb sifatida tanladim. Birinchi murabbiyim - Aleksandr Delevron, o'tgan yili vafot etdilar.
- O'zingiz bolaligingizda orzu qilgan jamoada o'ynadingizmi?
- O'zbekistonning eng kuchli klublarida to'p surdim. Orzuimdagi jamoa esa bu - «Real».
- Faoliyatingizdagi eng esda qolarli o'yin va gol?
- «Mash'al»ning o'rinbosarlar tarkibida «Navbahor»ga qarshi kechgan uchrashuvda chamasi 30 metrlar uzoqlikdan deyarli bir-biriga o'xshaydigan ikkita gol urganman. O'sha o'yinda biz 2:1 hisobida g'alaba qozongandik.
- Eng yoqimsizi-chi?
- E'tiborga molik jihati shundaki, eng yoqimsiz o'yin ham aynan o'sha bo'lgan. Bahsning 69-daqiqasida jarohat olib, maydonni tark etganman. Keyin tashxis natijalari oyog'im singanligini ko'rsatgan. Bu 2003 yilgi mavsumning so'nggi turi edi. Baxtimga chempionat yakunlangandi. Kamoliddin ALIMOV suhbatlashdi Manba: "IneterFUTBOL" gazetasi
— deya xabar beradi uff.uz nashri.