Uch million kishi yashaydigan ulkan shahar — poytaxtimizdagi stadionlarda o'yin bo'lgan kuni televizorga qaragim kelmaydi, uni yurtimizda yashayotgan minglab xorijliklar ham ko'rayotganini ko'z oldimga keltirib, uyalib ketaman. 35 ming tomoshabin sig'adigan «Paxtakor» stadioni huvillab yotadi, Evropa-yu Yaponiyalardagi zamonaviy arenalar bilan bemalol raqobatlasha oladigan «Bunyodkor»da ham shu ahvol. Nega? Muxlislar qachondan boshlab jamoalarimizdan bunday ko'ngli qoldi? Hatto bundan 15-20 yillar avval, o'sha «Neftchi»-yu «Navbahor»lar, «Nurafshon»u «Paxtakor»lar chempionlik uchun kurashib yurgan paytlarda ham muxlislar stadionni to'ldirib o'tirardi-ku! Holbuki, o'yingohlarimizda bugungidek sharoitlar yo'q edi. Lekin odamlar «Paxtakor»ga, futbolchilarga, futbolimiz kelajagiga ishonardi.
Bu gaplarni o'qib, ayrimlarda «Bu bola nega «Paxtakor»ga yopishib oldi?» degan savol paydo bo'lishi tabiiy. Oldindan aytib qo'yay, men O'zbekistonning har bir jamoasiga muxlislik qilaman, ularning xalqaro maydondagi zafarlaridan suyunaman, mag'lubiyatidan kuyunaman. Biroq kuni kecha milliy axborot manbalarimizda «Paxtakor» klubi murabbiyi Grigoriy Kolossovskiyning «Lokomotiv» — «Paxtakor» o'yinidan so'ng aytgan gaplarini o'qib, rosti, juda ranjidim. Keling, uning intervyusidagi gaplarini birgalikda ko'rib chiqamiz.
«Bugun faqat «Lokomotiv»ga qarshi emas, balki 15 nafar futbolchisi bor jamoa bilan o'ynadik. O'yinimiz bilan bizni hisobdan chiqarishga erta ekanligini ko'rsatdik. Biz hali qaytamiz, bizni hisobdan chiqarmang»,— deydi mutaxassis.
Bu bilan u nima demoqchi bo'lganini tushungandirsiz, taqsirim aytmoqchilarki, «Lokomotiv»ga muxlislar + 3 nafar hakam ko'maklashdi». Ma'lumot uchun: o'yin bosh hakami O'zbekiston iftixori, jahonning 2015 yildagi eng yaxshi hakami Ravshan Ermatov edi. Bu bilan Grigoriy amaki O'zbekistoning eng kuchli hakamining halolligini, vijdonliligini, xolisligini o'zicha shubha ostiga olyapti.
Janob Kolossovskiyning keyingi gaplariga quloq tuting: «Uchrashuv davomida biz yaxshiroq harakat qildik. To'g'ri yo'nalishda ekanimizni isbotladik. Texnik va taktik tarafdan futbolchilarimiz juda yaxshi o'ynashdi. Hali chempionatda o'z maydonimizda «Lokomotiv» bilan o'yinimiz bor. O'shanda kimning qanday o'ynashini ko'rasiz. O'yinimiz sizga yoqadi deb o'ylayman. Muxlislar stadionni «Paxtakor chempion» degan hayqiriqlar bilan tark etishdi. O'yinimizga berilgan munosib baho uchun minnatdorlik bildiramiz.
Bizni stadionda juda yaxshi qo'llab-quvvatlab turgan ishqibozlarga jamoa nomidan rahmat aytamiz».
Odatiy gaplar. Buni to'g'ri tushunsa bo'ladi, har qanday murabbiy o'z jamoasining yonini olishi tabiiy. Biroq gap ohangiga diqqat qilgan kishi Grigoriy akaning biroz qizishib ketganini, mag'lubiyatdan qattiq alamzada bo'lganini ilg'aydi. Xo'p, bu holat ham tushunarli, futbol ehtiroslarga boy o'yin ham deylik. Ammo bu nega endi bir taraflama hukm chiqarishga, mag'lubiyatida o'zini emas, o'zgalarni ayblashiga olib kelishi kerak?
Kolossovkiy Ermatovni nima uchun tanqid qilgan deb o'ylaysiz? «Paxtakor»ga yon bosmagani uchunmi?
Muhtaram Grigoriy amaki, mabodo bexabar bo'lsangiz, Ravshan Ermatovning faoliyati bilan jinday tanishib chiqishingizni maslahat bergan bo'lardik. Agar hovuringizdan tushib, yotig'i bilan fikrlay boshlagan bo'lsangiz, o'zingiz ham amin bo'lishingiz aniq: Ravshan aka maydonda hech qachon, hech kimga yon bosmagan, kimnidir nohaq jazolamagan. Chunki u g'ururi baland, bilimli, eng muhimi, halol inson!
Agar sizning gumoningizcha (bu puch gumon ekanini futbolga ozgina qiziqqan odam ham bilsa kerak), Ermatov «Lokomotiv» jamoasiga «yon bosgan» yoxud «sotilgan» bo'lsa, aytib qo'yaylik: bu sog'lom fikrga mutlaqo zid, o'rinsiz, ham asossiz shubhadan boshqa narsa emas.
O'zbekistonlik referi, o'zingiz ham havas bilan kuzatib borsangiz kerak, Osiyo chempionlar ligasi, qit'a chempionatlaridan tashqari, ko'z tegmasin, jahon chempionatlari uchrashuvlarini ham muntazam boshqarib keladi. Bilasizmi, FIFA ularga bunaqa o'yinlar uchun qancha ish haqi to'laydi?..
Davomi Tafsilot.Uz blogida.
— deya xabar beradi uff.uz nashri.