Farg'onada Universiada musobaqalariga qizg'in tayyorgarlik ko'rilmoqda.
Prezidentimiz rahnamoligida an'anaviy o'tkazib kelinayotgan uch bosqichli sport o'yinlari yoshlar o'rtasida sog'lom turmush tarzini targ'ib qilish, ularning har tomonlama barkamol bo'lib voyaga etishini ta'minlashda muhim ahamiyat kasb etmoqda. Mazkur noyob tizim xalqaro miqyosda yangi pedagogik texnologiyalar sifatida e'tirof etilib, ko'plab davlatlar tomonidan katta qiziqish bilan o'rganilayotir.
Musobaqalarning har bir bosqichi iqtidorlarni kashf qilish barobarida, ularning tajribasini oshirish va yirik xalqaro turnirlarga tayyorgarlik ko'rishga ko'maklashadi. Negaki, “Umid nihollari”, “Barkamol avlod” va Universiada musobaqalari xalqaro Olimpiada mezonlariga to'liq rioya qilingan holda o'tkaziladi.
“Universida – 2016” sport o'yinlari munosabati bilan viloyatda keng ko'lamli obodonlashtirish, bunyodkorlik ishlari amalga oshirilmoqda. Jumladan, yangi sport inshootlari barpo etilib, ko'plab sport majmualari ta'mirlandi. Farg'ona shahrida yopiq suv sporti saroyi foydalanishga topshirildi.
Farg'ona davlat universitetida sport-sog'lomlashtirish majmuasi qad rostladi. Farg'ona Olimpiya zaxiralari kollejining sport zallari ham ta'mirdan chiqarildi. Farg'ona politexnika institutining 4 talabalar turar joyi va 600 o'rinli oshxonasida qayta ta'mirlash ishlari amalga oshirildi. Ko'kalamzorlashtirish ishlari doirasida 1400 dan ortiq tup ko'chat o'tqazilib, archa, kashtan, hind sireni, farbitsiya singari manzarali va butasimon daraxtlarga uyg'un holda ravon yo'laklar barpo etildi.
– Bugungi yoshlarimizga havasim keladi, biz bunday sport bayramlarini tasavvur ham qilolmasdik, – deydi Farg'ona politexnika institutining jismoniy tarbiya va sport kafedrasi mudiri G'ulomjon Yormatov. – Bu e'tiborga munosib bo'lishga intilayotgan yoshlar saralash bahslarida ijobiy natijalarga erishdi. Futbol bo'yicha finalga yo'llanma olgan terma jamoa safida talabalarimizdan S.Mirzaev, B.Aminjonov, F.O'rinboev, R.Ayvazov bor. Sh.Usmonov, D.Muhammadjonovlar esa erkin kurash bo'yicha viloyat sharafini himoya qiladi. Sportchilarning kayfiyati a'lo. Zero, sportda biror natijaga erishish uchun nafaqat jismoniy, balki ruhiy tayyorgarlik ham katta ahamiyatga ega. Yoshlarimiz yuqori natijalar bilan bu yilgi Universiada tarixidan munosib joy olishiga ishonamiz.
Ayni paytda viloyat terma jamoasi final bosqichiga qizg'in tayyorgarlik ko'rmoqda.
– Sport jonu dilim, – deydi Farg'ona davlat universiteti jismoniy madaniyat fakulteti 1-kurs talabasi, tennis bo'yicha viloyat terma jamoasi a'zosi M.Ikromova. – 2012 yili maktab o'quvchilari o'rtasida Navoiy viloyatida o'tkazilgan “Umid nihollari” musobaqasida uchinchi, 2015 yil akademik litsey va kasb-hunar kollejlari o'quvchilari o'rtasida Namangan viloyatida bo'lib o'tgan “Barkamol avlod” musobaqasida ikkinchi o'rinni egalladim. Murabbiylarim R.Arazmetov, Sh.Abdurahimov bilan musobaqaga puxta hozirlik ko'rmoqdaman. Endi navbat oltin medalga, buning uchun astoydil kurashaman.
“Universiada – 2016” tashkilotchilari tomonidan talabalarning bo'sh vaqtini mazmunli o'tkazishi uchun sharoit yaratishga ham alohida tayyorgarlik ko'rilmoqda. Jumladan, musobaqa qatnashchilari uchun kontsert dasturlari namoyish etiladi, madaniy-ma'rifiy tadbirlar uyushtirilib, diqqatga sazovor joylarga sayohatlar tashkil qilinadi.
Muxtasar aytganda, talaba-yoshlarning ushbu sport bayramini yuksak saviyada o'tkazish, ishtirokchilarga unutilmas taassurotlar tuhfa etish uchun barcha zarur choralar ko'rilmoqda.
Manba: UzA
— deya xabar beradi uff.uz nashri.