“Navbahor” va “Qo'qon-1912” jamoalari o'rtasidagi uchrashuvdan so'ng o'tkazilgan matbuot anjumanining birinchi qismida jurnalistlarning savollariga mehmonlar ustozi Murod Ismoilov javob qaytardi: - O'yinni jamoamiz yaxshi boshlagandi.
Hattoki, hisobni ochishga ham erishgandik. Afsuski, himoyachilarimiz berilgan ko'rsatmalarimizni bajara olishmagani yoki tushunishmagani uchun kerakli natija qo'lga kiritilmadi. Futbolchilarimiz aynan biz aytgan xatolarga yo'l qo'yishdi. Standart vaziyatlardan o'tkazilgan uchta gol hammasini hal qildi. Ikkinchi bo'limni ham yigitlar yomon boshlashmagandi. Lekin, o'sha oddiy vaziyatlardagi xatolarimiz pand berdi. Bunday sovg'alardan Pishur samarali tarzda foydalanib, qahramon bo'ldi.
Yosh futbolchilarimizdan Iqbol Malikjonov va Oybek Rustamovlardan xursand bo'lganligimni aytib o'tishni istardim. Rustamov birinchi o'yinini o'tkazdi. Malikjonov ham yomon o'ynagani yo'q. Yosh futbolchilarimizni harakatlaridan ko'nglim to'ldi. Kelgusida, ushbu yigitlarimiz jamoaning etakchilaridan biri bo'lib etishishadi degan umiddaman. Ularda ko'pchilik futbolchilarimizda etishmayotgan ruhiyat bor. Fursatdan foydalanib, “Navbahor” jamoasini qo'lga kiritilgan g'alaba bilan tabriklayman.
Har ikki jamoaga ham navbatdagi uchrashuvlarda omad tilayman. Bugun jamoamizga g'oliblikka bo'lgan ruh etishmadi. O'yin borasida gap ketganida, futbolchilarimiz bir-birlarini tushunib, o'yindagi bog'liqlikni shakllantirishmoqda. O'z darvozamizdan bir-ikkita to'p o'tkazib yuborganimizdan keyin oxirigacha kurasha olmayapmiz. Oldingi turda “Bunyodkor” bilan o'tgan o'yinda ham hisob 0:2 etgan paytda bahsni yakunlanishiga ancha vaqt bo'lishiga qaramay, oxirigacha kurasha olmagandik.
Tarkibda yigitlarni o'z ortidan etaklay oladigan etakchi futbolchi etishmayapti. Aslini olganda Namanganga yaxshi niyat bilan kelgandik. Afsuski, futbolda shunaqasi ham bo'lib turar ekan.
— deya xabar beradi uff.uz nashri.