Pashshalar savashin qoldir go'dakka,
Yo'lbarssan, yo'lbarslar jangini qidir! Hayotda har kimning o'z narxi, matlabi va bajaradigan yumushi bo'ladi. Sherga sichqonlar bilan arqon tortishish yarashmaydi. Bo'rilar ilon bilan musobaqalashmaydi. Burgut zahcha bilan uzoqqa uchish o'ynamaydi.  
Jahon futbolida shunaqa holatlar guvohi bo'lyapmizki, go'yoki sher tulki bilan o'lja talashayotgandek, sirtlon yumronqoziq bilan tortishayotgandek, tavba!
“Manchester Yunayted” “Lester”ning chempionligini kechiktirgani bilan maqtanib yuradigan zamonlarga keldik, nimasini aytasiz?! Lui van Gaal bo'lajak chempion bilan ikki marta 1:1 o'ynaganiga shodlanib o'tirsa-ya, tavba! “Qizil iblislar”ni bu maqomda uchratishimiz juda-juda xunuk holatdir. G'alati!
Manchesterliklar ustozi aslida ushbu durangdan umuman shod bo'lmagan. Klub EChL yo'llanmasidan mahrum bo'ldi, keyingi yil qit'aning eng nufuzli turnirida ardoqli yigitlarni ko'rmaymiz. Mana buni fojia desa bo'ladiki, Fergyusondan keyingi eng yomon davr aynan Lui van Gaalga tegishli bo'lib tarixdan o'rin oladi.
Hozirgi “MYu”ning inqirozi boshqa bir qator superklublarnikidan bir jihati bilan farq qiladi, jamoa moliyaviy tomondan berk ko'chaga kirib qolmagan, transferlarga yaxshigina sarflagan. Tarkib e'tibori bilan ham yomonmas. Oddiy, tekis yo'lda hech qanday sababsiz motori ushlab qolgan mashinaga o'xshaydi bugungi “MYu”.
Biz bu inqirozni Serning ketishiga bog'lashdan yiroqmiz. Jamoa shotlandiyalik mutaxassissiz yashashga allaqachon o'rganishi va ko'nikishi kerak edi. Fergyusonni bog'lab qo'ymaganini har holda biladi “myu”chilar. Lekin bu inqiroz baribir o'sha insondan keyin boshlanganini qayd etsak o'rinli bo'lardi. Uzoq yillar davomida klubdan faqat zafarlar bilan yonma-yon zikr qilib kelingan inson ketgach, shunaqa inqiroz bo'lishi taxmin qilingandi baribir. O'sha taxminlar o'zini oqlayotgani yomon, xolos.
Xo'sh, “MYu” o'ziga kela oladimi? O'zi, umuman jamoa keyingi EChLda o'ynamasa, grandlar safiga qayta oladimi? Tuzukroq murabbiyning kelishi ham endi qiyinlashadi. Mourinoning kelishiga ishonmayman endi. “Lester”ga qarshi o'yin tugashi bilanoq klub rahbariyati shu savollarga javob topish uchun o'z xonasiga kirib ketgandir. Lekin haliyam hal qilinmaganiga ishonaman. Xullas, “qizil iblislar” o'z muxlislarini o'rtamiyona deb ko'niktirib qo'ymaguncha, nimadir qilish kerak. Qandaydir jiddiy ishga qo'l urishi kerak rahbariyat!!!
“MYu”ni xursand qiladigan bir narsa bor, u ham bo'lsa, taqdirdosh jamoaning borligi – “Chelsi”! Abramovichga tegishli klub ham “kimnidir chempionligiga to'g'anoq bo'lish”dek “sharafli” vazifani bo'yniga olganiga ancha bo'lib qolgan. London derbisida “Chelsi”ning asosiy ishi – hamshaharlarini chempionlikdan to'sib qolish! Hamshahar ham “Arsenal” emas, butunlay uchinchi jamoa bo'lib kelgan “Tottenxem”...
“Chelsi”ning ochko olishiga qarab qolgan jamoaga qarang - “Lester”! “MYu” va “Chelsi” chempionlik kurashida ishtirok etish o'rniga chempionni aniqlab berish maqomiga tushib qolishgani dahshat, haqiqiy dahshat!!!
“Arsenal” haqida ham gapirib ketaylik, a?! Londonliklardagi inqirozning nomi bitta insonga bog'liq – Arsen Venger. Frantsiyalik mutaxassis chindan ham jamoada charchadi. Bitta joyda ko'karib ketdi bechora. Ketishi kerakligini anglab etdi, anglab etishi uchun to'rtinchi o'rin. O'zining suyukli raqami – 4-o'rin! Venger yomon murabbiy emas, lekin oxirgi payt jamoa yangilanish yo'liga kirishi kerakligi yaqqol ko'rinib turibdi. Yangi qon kerak. Har holda, “Arsenal”da “MYu”ga o'xshab bir insondan keyin jiddiy inqiroz ko'zga tashlanmasa kerak. Chunki Venger ketayotgan paytdayoq jamoani berk ko'chaga qamab ketmoqda. Undan keyin kelgan odam Moyesu van Gaallar singari malomat qilinmaydi, deb o'ylayman.
Yuqoridagi she'rga monand keladigan voqealar faqat Angliyada emas. Italiyada ham shunaqa “pashshalarni quvib yurgan sherbachchalar” bor. Misol uchun, “Milan”!!! “Qizil qoralar” allaqachon o'z muxlislarini o'rtamiyonaligiga ishontirib, ko'niktirib bo'ldi. “Inter”dek ajoyib va tarixan boy jamoa ham hozirda zaiflik belgisiga aylangan. Jamoaning yulduzli davrlarini sog'ingan ko'pchilik. “MYu”dan farqli ravishda Italiyada moliyaviy tomondan-da inqirozlar mavjud. Haliyam.
Angliya superklublari bilan Milan jamoalarini taqqoslashdan yiroqman shuning uchun. Ularning holati va ayni paytdagi inqirozi butunlay boshqa tomonlarda yotibdi. Milan shahri klublarining ishi Italiya futboliga bog'liq jihatlar bilan izohlanadi. “Yuventus”ning tirilishi natijasida balki bu jamoalar ham o'zlariga kelib olishar, biroq hozircha “Milan” qandaydir “Frazunone”lar bilan durang o'ynab, o'yin tugaganida ochko olgani uchun qo'lini ko'tarayotgani achinarli holat.
Bizning avlod shu jamoalarning yuksaklarda parvoz qilgan davrini ko'rib ulg'aygan. Balki shuning uchun ham bugungi inqirozlarni xazm qilolmayotgandirmiz. Ehtimol shuning uchun ham ularning yana elitaga kirishlarini istayotgandirmiz. Nima bo'lgan taqdirda ham “buyuk qaytishlar” har qanday muxlisga yoqadi. Hatto ularning raqiblariga ham.
... Futbol shunisi bilan go'zal, albatta. Buyuk jamoalarning pastki o'rinlarda dovdirab yurishi har doim ham bo'laveradigan ish emas. Maqolani tugatar ekanman, o'zimizning oliy ligamiz turnir jadvaliga ham bir qur nazar tashlashga qaror qildim. Beshinchi o'rindagi bir jamoaga ko'zim tushdiyu, bizda ham shunaqa voqealar bo'lib turarkan-da, deb qo'ydim:) Xayrulla Hamidov
— deya xabar beradi uff.uz nashri.