Sport malikasi hisoblanmish engil atletikada XXXI yozgi Olimpiada o'yinlariga qo'lga kiritilgan yo'llanmalarimiz soni 9taga etdi.
Navbatdagi yo'llanmaga Xitoyning Shanxay shahrida o'tkazilgan “Brilliant liga”ning ikkinchi bosqichida Nadiya Dusanova ega bo'ldi.
Balandlikka sakrash sektorida Vatanimiz sharafini himoya qilgan Nadiya 1 m. 94 sm. natijani qayd etdi va kumush medal bilan birga “Rio-2016” o'yinlarining yo'llanmasi uchun belgilangan me'yorni bajardi. Mazkur musobaqada ishtirok etgan yana bir yurtdoshimiz Svetlana Radzivil 1 m. 88 sm. ko'rsatkich bilan 4-o'rinni egalladi. Birinchi o'rin Sent-Lyusiya vakili Levern Spenserga, bronza medali esa xorvatiyalik Ana Simichga nasib etdi.
Ma'lumot uchun. Xalqaro toifadagi sport ustasi Nadiya Dusanova 2010 yili Guanchjou (Xitoy)da bo'lib o'tgan Osiyo o'yinlarida kumush, 2014 yili Inchxon shahri (J.Koreya)da o'tkazilgan Osiyo o'yinlarida esa bronza medaliga sazovor bo'lgan. 2010 yili qit'aviy Jahon kubogida bronza, 2013 yili Osiyo chempionatida oltin medalni qo'lga kiritgan.
Shu tariqa, "Rio-2016" o'yinlariga yo'llanma olgan sportchilarimiz soni 80taga etdi. Shundan 55 nafari Olimpiada o'yinlariga yo'llanma olgan sportchilardir.
Shavkat Jalilov
O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.