Qozog'istonning Almati shahrida dzyudo kurashi bo'yicha o'tkazilgan Gran Pri turniri yakuniga etdi. Dunyoning 83 davlati vakillari ishtirokida o'tkazilgan mazkur musobaqada XXXI yozgi Olimpiada o'yinlarining yo'llanmalari uchun reyting ochkolar ham o'ynaldi.
Qizg'in kechgan musobaqalar yakunlariga ko'ra uch nafar hamyurtimiz Diyorbek O'rozboev (-60 kg), Sharofiddin Lutfullaev (-60 kg) va Soib Qurbonov (-100 kg) bronza medallarini qo'lga kiritdilar.
Diyorbek O'rozboev saralash bahslarida Misr, Shveytsariya va Qirg'iziston vakillarini engib, yarim finalda mezbonlar vakili Rustam Ibraevga imkoniyatni boy berdi. Bronza medali uchun kechgan bellashuvda Diyorbek Qozog'iston terma jamoasining yana bir a'zosi Asxat Telmanovni mag'lub etdi.
Sharofiddin Lutfullaev esa saralash bahslarida Yaman, Belarus va Qozog'iston sportchilari ustidan zafar quchib, yarim finalda Elios Manzi (Italiya)ga yutqazdi. Bronza medali uchun kechgan bellashuvda Sharofiddin qozog'istonlik Alibek Imashevdan ustun keldi va u ham uchinchi o'rinni egalladi.
Og'irlik vazni 100 kg.gacha bo'lgan polvonlar bahsida ishtirok etgan Soib Qurbonov saralash bosqichida Sloveniya va Estoniya vakillarini mag'lub etib, ozarbayjonlik Elxan Mammadovga imkoniyatni boy berdi. O'tish turniri orqali bronza medali uchun bahslarni davom ettirgan Soib Qurbonov dastlab 2015 yilgi Osiyo chempionati sovrindori Saidjalol Saidov (Tojikiston)ni, uchinchi o'rin uchun kechgan bellashuvda esa Kuba vakili, 2014 yilgi Jahon chempionati kumush medal sovrindori Xose Armenterosni mag'lub etdi.
Eslatib o'tamiz, mazkur Gran Pri turnirida oltin medal sohibi 300 reyting ochkoga, kumush medal sovrindori 180 reyting ochkoga va nihoyat uchinchi o'rinni egallagan polvonlar 120 reyting ochkosiga ega bo'ladilar. Bundan tashqari beshinchi o'rin egalari 60 reyting ochkoni, 7 o'rinni band etgan sportchilar esa 48 reyting ochkoni qo'lga kiritishlari mumkin.
Shavkat Jalilov
O'zbekiston Milliy Olimpiya qo'mitasi matbuot xizmati
— deya xabar beradi uff.uz nashri.