“Nasaf-2” jamoasi o'z maydonida Sarqandning “Dinamo” jamoasini qabul qildi.

Uchrashuvni jamoalar ehtiyotkorlik bilan boshlashdi. Birinchi bo'limning 10 daqiqasi teng kurashlar ostida kechgan bo'lsa, qolgan daqiqalardan “Dinamo” jamoasi asta sekin bosimni oshirib, hujumlarga zo'r berdi. Jamoamiz himoyalanishga majbur bo'ldi.

Birinchi bo'limning 27-daqiqasida jamoamiz raqib jarima maydoni yaqinida jarima to'pi tepish huquqini qo'lga kiritishdi. Jarima zarbasi tepilgach, to'pni egallab olgan mehmonlar tezkor qarshi hujum uyushtirishdi. Bu vaziyatda himoyachilarimiz raqiblarga qarshilik qilishda xatoga yo'l qo'yishdi. Natijada Jonibek Kuchimov darvozabonimiz bilan birga-bir vaziyatga chiqib ketdi va hisobni ochishga erishdi – 0:1.

Ushbu goldan so'ng o'yin shiddati yanada oshdi. Endi jamoalar navbat bilan hujumlar uyushtira boshlashdi. Gol urish uchun qulay vaziyatlar bo'lsada, birinchi bo'limda darvozalarga boshqa gollar kiritilmadi. Ana shu hisob bilan jamoalar tanaffusga chiqib ketishdi.

Ikkinchi bo'lim “Dinamo”ning xavfli hujumi bilan boshlandi. Darvozaga berilgan zarbani G'olib G'aybullaev darvoza chizig'ida qaytarib qolishga erishdi.

Bunga javoban jamoamiz tomonidan uyushtirilgan tezkor qarshi hujumda o'yinchilarimizda hisobni tenglashtirish uchun aniqlik etishmadi.

Ikkinchi bo'limning qolgan daqiqalarida “Dinamo” jamoasi yana hujumlarga zo'r berdi. Albatta bu hisobda ham o'z aksini topdi. Uchrashuvning 72 va 79-daqiqalarida mehmonlar yana ikki marta gol kiritishga erishishdi. Ikkinchi bo'limda maydonga tushgan Amirjon Safarov o'z jamoasining ikkinchi goliga mualliflik qilgan bo'lsa, 79-daqiqada Alisher Xoliqov jamoasining o'yindagi uchinchi golini kiritdi. Alisher Xoliqov ham ikkinchi bo'limda maydonga tushgan edi.

Shunday qilib, o'z oldilariga yana oliy ligaga qaytishni maqsad qilgan “Dinamo” jamoasi “Nasaf-2” jamoamizni mag'lubiyatga uchratdi.

“Nasaf-2” jamoamiz navbatdagi uchrashuvni 18 may kuni yana o'z maydonida o'tkazadi. Jamoamizga bu safar Jizzaxning “Zomin” jamoasi ro'baru keladi.

O'zbekiston Birinchiligi-2016, 9-tur.
15 may 2016 yil. “Nasaf” FM sun'iy maydoni. 17:00da

“Nasaf-2” (Qarshi) – “Dinamo” (Samarqand) 0:3 (0:1)
Gol: Jonibek Kuchimov, 29’-0:1, Amirjon Safarov, 72’-0:2, Alisher Xoliqov, 79’-0:3.
“Nasaf-2”: 1.Javohir Komilov (s), 5.Dilshod Saitov, 8.Xudoyorxon Sag'dullaev, 10.Amir Xoshimov (42.Jahongir Musurmonov 82), 16.G'olib G'aybullaev (23.Shohruh Safarov 90+2), 19.Asliddin Abdiev, 20.Otabek Komiljonov, 22.Elbek Otaqulov (18.Shohruh Ne'matov 77), 27.Oybek Bozorov (32.Farrux Absalomov 78), 28.Jurabek Mannonov, 34.Sherzod Nasrullaev.
Zaxira: 9.Botirjon To'raev, 17.Muzaffar Omonqulov, 33.Ziynatillo Ikromjonov.

“Dinamo”: 1.Mixail Naumov, 2.Mirkomil Lokaev, 5.Firdavs Abdusalimov, 7.Omadjon Tayloqov, 8.Jasur Azimov (23.Komil Sharafutdinov 74), 9.Viktor Klishin (20.Amirjon Safarov 63), 10.Azamat Bobojonov (18.Alisher Xoliqov 58), 11.Saidjamol Davlatjonov (14.Doston Ibragimov 70), 15.Lazizjon Nuriddinov (4.Xakimxon Olimxonov 79), 17.Aleksey Nikolaev (s), 24.Jonibek Kuchimov.
Zaxira: 27.Shuhrat Murodov, 19.Islom Sharipov.
Ogohlantirish: Javohir Komilov 58, G'olib G'aybullaev 75.
Bosh hakam: Dmitriy Pislegin (Toshkent).
Qanot hakamlari: Jalgasbay Sarsenov, Bektursin Kannazarov (ikkalasi ham Nukusdan)
Zaxira hakami: Ravshan Abdivohidov (Qarshi)
Nazoratchi: Andrey Tambovtsov (Toshkent).
— deya xabar beradi uff.uz nashri.