Bugun Toshkentning «Lokomotiv» klubi Osiyo Chempionlar Ligasi nimchorak final bosqichidan o'rin olgan ilk uchrashuvda maydonga tushadi. «Pley-off»ga chiqqan yagona klubimiz Saudiya Arabistonida «Al-Hilol» mehmoni bo'ladi. Eh, guruhning so'nggi turida Eronning «Traktorsozi» klubi aynan shu «Hilol»ga yutqazmaganida, bugun «Toshkent derbisi» guvohiga aylanardik. Ya'ni «Lokomotiv» uzoq safarga bormay, shundoqqina «Paxtakor» markaziy stadionida  o'ynardi. Qolaversa, har qanday holatda ham, bitta jamoamiz musobaqada kurashni davom ettirish huquqini qo'lga kiritardi. Har holda, biz uchun ana shu ikkinchi variant ma'qul edi. Lekin amalda boshqacha bo'lib chiqdi va endi OChLda barchamiz «Loko»ga muxlislik qilamiz.
«Lokomotiv» va «Al-Hilol» jamoalari shu paytgacha o'zaro ikki marotaba to'qnash kelishgan. Statistika saudiyaliklar tomonida: o'tgan yili guruh bosqichida o'tkazilgan har ikki o'yinda «Al-Hilol» g'alaba qozongandi. Ar-Riyodda 3:1, Toshkentda 1:2 hisobi qayd etilgan. Lekin endi umumiy vaziyat mutlaqo boshqacha. «Temiryo'lchilar» oldingi mavsum bilan taqqoslaganda, tarkiblarini sezilarli tarzda kuchaytirib olishdi. Buni guruh o'yinlari ham tasdiqladi. «Lokomotiv» 6ta o'yinda mag'lubiyatga uchramagan yagona jamoa bo'ldi. Bu an'ana davom etishidan umidvormiz.
Darvoqe, jamoa «pley-off» bos­qichida ilk bora ishtirok etyapti. Zero, «Loko» o'tgan yili guruhda qolib ketgandi. Hozirda yarim himoya vakillari - Server Jeparov, Temur Kapadze, Kaxi Maxaradze, Sanjar Shoahmedov va Sardor Mirzaev jamoa muvaffaqiyatlariga sezilarli darajada hissa qo'shishyapti. Marat Bikmaev va Temurxo'ja Abduxoliqov esa hujumda yaxshi o'yin namoyish etishyapti. Darvozada tajribali Ignatiy Nesterov jonbozlik ko'rsatmoqda. Islom To'xtaxo'jaev boshchiligidagi himoya chizig'i ham chakki emas. Mana, Mirko Yelichich va Andrey Miklyaev shogirdlari milliy chempionatda etakchilik qilish­yapti. Shularni inobatga olgan holda, bugun «Lokomotiv»dan ijobiy natija kutishga haqlimiz. Lekin «Al-Hilol» ham nonini oldirib qo'yadigan jamoalardan emas. Buni unutmaslik kerak. Poytaxt Ar-Riyod shahrida o'tkaziladigan ilk o'yinda baribir, mezbonlar favorit sanalishadi.
Biz bugungi  muhim o'yin oldidan doimiy ekspertimizga aylanib borayotgan Azamat Abduraimovning fikrlari bilan qiziqdik.
- «Lokomotiv» haqli ravishda guruhdan chiqdi. Aslida boshqacha bo'lishi ham mumkin emasdi. Hattoki, o'tgan yili ham jamoa «pley-off»da kurashni davom ettirishi shart edi. Harqalay, tarkib bir yil oldin ham kuchsiz emasdi. Fikrimcha, o'sha payt murabbiylar almashinuvi xalal berdi. Bundan tashqari, jamoaviy o'yin ham yaxshi yo'lga qo'yilmagandi. O'sha tarkibda yig'ilgan futbolchilar mahoratiga shubha yo'q edi. Faqat, ular yagona taktika asosida o'ynay olishmadi. Boshqacha ayt­ganda, futbolchilar bir-birlari bilan o'yin uslubi bo'yicha mutanosib kelishmadi. Mana shu omillar bir bo'lib, «Lokomotiv»ning guruhdan chiqishiga to'sqinlik qilgandi. Bu yil vaziyat tamomila o'zgardi. Mavsumlar oralig'ida klub rahbariyati samarali selektsiya ishini olib bordi.
Jamoa tarkibida ism-shariflari katta harflar bilan yoziladigan futbolchilar ko'p. Nafaqat tajribali, balki etakchilikni o'z qo'llariga oladigan futbolchilar bilan shartnomalar imzolandi. Avvalo, bir necha yillik tanaffusdan so'ng o'zimizga qaytgan Server Jeparovni aytish joiz. Bu futbolchi hamon g'alabaga chanqoq va o'ynagan deyarli barcha klublarida qaysidir mamlakat chempioni bo'lgan. Uning xarakterida mag'lublik tushunchasining o'zi yo'q. Shuningdek, yana bir tajribali futbolchi Kaxi Maxaradzeni ham ro'yxatning yuqori qismiga qo'shish kerak. Gruziyalik legioner «Paxtakor»dagi muvaffaqiyatlardan so'ng «Lokomo­tiv»ga qaytdi. Unda ham xuddi Serverdagi kabi chempionlik xarakteri kuchli. Maydonning istalgan nuqtasida o'ynay oladi. Mana, universal futbolchining «Lokomotiv» g'alabalarida hissasi katta bo'lyapti. Bundan tashqari, Temur Kapadze, Sanjar Shoahmedov, Jasur Hasanov, Marat Bikmaev, Temurxo'ja Abduxoliqov singari yigitlar «Lokomotiv»ning bugungi kundagi etakchi bo'g'iniga aylanishdi.
Shu o'rinda murabbiylar olib borayotgan ishni ham alohida tilga olish joiz. Mirko Yelichich va Andrey Miklyaev boshchiligidagi shtab darhaqiqat, sekin-astalik bilan o'z qarashlari va taktik chizmalarini jamoa o'yinida shakllantirib boryapti. Bugunga kelib, «Lokomotiv» klublarimiz orasida yaqqol ajralib qoldi. Deylik, himoyada deyarli bexato o'ynayapti. Ignatiy Nesterov yana avvalgi sport formasiga kirib oldi. Darvozani oldingidek sovuqqonlik bilan ishonchli qo'riqlayapti. Hujum chizig'i haqida ham yaxshi fikrdaman. Bilasizmi, jamoaning hujumlari tobora rang-barang chiqyapti.
Lekin «Lokomotiv»ning o'ziga yarasha kamchiliklari ham yo'q emas. Buni «Paxtakor»ga qarshi kechgan ichki chempionat o'yini ko'rsatib qo'ydi. «Temiryo'lchilar» xususan, ikkinchi bo'limda ishonchsiz harakat qilishdi. Ya'ni barcha chiziqlar tashabbusni raqibga topshirib qo'ydi. Go'yoki, futbolchilar o'yinni   umuman tashlab yuborishdi. Bundan xulosa qilish mumkinki, murabbiylar shtabining jamoada qiladigan ishi hali ko'p ekan. To'g'ri, «Lokomotiv» oliy ligada yaqqol ustunlikka ega. Har holda, boshidanoq chempionatda etakchilikni qo'lga oldi. Lekin bu ustunlik OChL «pley-off» bahslarida jamoaga kamlik qilishi mumkin. Chunonchi, OChL, boz ustiga, «pley-off» o'yinlarining saviyasi umuman boshqacha.
Davomi InterFUTBOL gazetasi blogida.
— deya xabar beradi uff.uz nashri.