Evro-2016 ishtirokchilarini olg'a undovchi shiorlar. UEFA o'tgan hafta Frantsiya mezbonlik qiluvchi va starti tobora yaqinlashayotgan qit'a chempionatiga boruvchi milliy jamoalarning rasmiy shiorlarini e'lon qildi. Ha, joriy yoz Frantsiya yo'llarida yorqin rangli avtobuslarni ko'rish mumkin.
Ular «ko'hna qit'a» futbolining asosiy turnirida qatnashuvchi 24ta milliy jamoa xizmatida bo'ladi. Har bir avtobus muayyan mamlakat milliy bayrog'i va jamoaning rasmiy shiori bilan bezatiladi. E'tiborli tomoni, jamoalar shior tanlash masalasini o'z muxlislariga qo'yib berishdi. Qisqasi, quyidagi da'vatnamo iboralarning barchasi muxlislarning ijod namunasidir. Ishtirokchilarning rasmiy avtobuslari keng jamoatchilik hukmiga hali rasman havola etilgani yo'q (Evropa chempionati boshlanishi arafasida taqdim qilinadi). Shunday ekan, hozircha futbolchilarni olg'a undovchi shiorlar bilan tanishib chiqamiz.
Avstriya - «Yana, yana va yana Avstriya!» (Immer wieder, immer wieder, immer wieder Osterreich)
Avstriya milliy jamoasi avtobusida muxlislarga juda tanish va qadrli iboralar joy oladi. Aytish joiz, avstriyalik fanatlar suyukli jamoalarini o'yinlar davomida aynan shu shiorni baralla aytish orqali o'zgacha olqishlaydilar. Evropa chempionati saralash bahslarida ham bu holat yaqqol ko'zga tashlandi va natijalarga qarasak, «Yana, yana va yana Avstriya»ning futbolchilarga ta'siri chakki emas.
Albaniya - «Oh, alban bo'lish qanday yaxshi-ya!» (O Sa Mire Me Qene Shqiptar!)
Bu iboralar albaniyalik xonanda Rozana Radining ehtirosli qo'shig'idan olingan. Bilasiz, Evro-2016 Albaniya terma jamoasi uchun tarixdagi ilk xalqaro turnir hisoblanadi. Xullas, hayajonli va to'lqinlantiruvchi voqelik, shunday bo'lgach, shior ham jamoani maksimal darajada shaylantirishi lozim. UEFA saytida albaniyalik muxlislarga yana 2ta variant havola etilgandi («Albaniya, menga g'urur bag'ishla» va «Burgutlar» parvozingiz baland bo'lsin»), lekin ular aynan mashhur qo'shiq satrlarini tanlashdi.
Angliya - «Bittajamoa, bittaorzu» (One team, one dream)
Braziliyada o'tgan jahon chempionatidagiga taqqoslaganda, Angliya terma jamoasi shiori nisbatan qisqartirildi. Mundialda inglizlar «Bitta jamoa orzusi - millionlarning yurak urishi» shiori ostida maydonga tushishgandi. Xullas, endi millionlarning yurak urishi yagona orzu bilan almashtirildi.
Belgiya - «Bitta jamoa - bitta maqsad» (1 team — 1 ambitie)
Bir necha jamoalarning shiorlari bir-biriga o'xshash va ularda asosan yakdillik, hamjihatlik va umumiy maqsad ruhi ufurib turadi. Xususan, belgiyaliklar ham aynan shunday ma'noli shiorni tanlashgan.
Vengriya - «Ria Ria Vengriya!» (Ria Ria Hungaria!)
Vengriyalik fanatlar bu shiorni «Faqat birgalikda g'alaba qozonamiz» va «Yigitlar, borimizni beramiz» iboralaridan ma'qulroq ko'rishdi. Tushunarliki, muxlislar bunda tribunalardan yaxshiroq yangraydigan ohangni e'tiborga olishgan.
Germaniya - «Biz uddalaymiz!» (Wir meistern das!)
Nemislarga havola etilgan yana bir shior mashhur velopoygani eslatuvchi go'zal iboralardan iborat edi: «Tur de Frans» - sovrin uchun imkoniyat». Biroq muxlislar yakunda «bundesmashina» ruhiga mos tushuvchi mantiqiy shiorga ko'proq ovoz berishdi.
Irlandiya - «Orzu qilish. Ishonish. Erishish» (Dream it. Believe it. Achieve it.)
Irlandiya termasi ancha sodda shior oldi, lekin u milliy jamoaga mutlaqo mos tushadi. Deylik, Martin O~Nil jamoasi bo'lajak qit'a chempionatida asosiy autsayder hisoblanmaydi, ammo unga past nazar bilan qarashadi, baribir. Shuning uchun ham, irlandlar turnirda g'olib bo'lish orzusini ehtiyotkorona ma'lum qilishyapti, chog'i.
Islandiya - «Olg'a, Islandiya» (Afram Island)
Ko'rinishidan, eng sodda shior uchun beriladigan sovrin Islandiyaning sovuq sohillariga ketadi, shekilli. Ehtimolki, da'vatnamo iboralar oddiyligini islandlarda yuqori saviyali turnirlarda ishtirok etish tajribasi yo'qligi bilan izohlash mumkindir... Axir Islandiya termasi -Evropa birinchiligi debyutanti.
Ispaniya - «Bitta rang, yagona ehtiros. Biz - «qizillar» (Un color, una pasion. Somos la Roja.)
Ispaniya termasi o'z odatidan yuz o'girishni istamadi va Braziliya-2014 mundialida yangragan shioriga o'xshash iboralarni tanladi. Eslatib o'tamiz, ispan muxlislari JChda«Qizil furiya»ni «Bizningqalbimizdachempionlarehtirosi» shiori ostida olqishlagandilar.
Italiya - «Olg'a, «moviylar»!» (Forza Azzurri!)
Italyanlar jahon chempionatida o'z jamoalarini «Mundialniko'krangbilanbezaymiz»,- deya olg'a boshlagandilar. Endi esa odatiy shior (Forza Azzurri!)ni yana tiklashga qaror qilishdi. Umuman olganda, Apennin yarim orolidagi mamlakat sharafini himoya etuvchi barcha jamoalar shunday shior ostida o'ynashadi.
Polsha - «Bizni futbol birlashtiradi» (Laczy nas pilka)
Polsha futbol federatsiyasining asosiy shiori Evro-2016 davomida milliy jamoaga «hamrohlik» qiladi. Demakki, PFF o'z brendidan maksimal darajada foydalanadi. Muxlislarga uncha manzur bo'lmagan yana 2ta shiorga kelsak, ular quyidagicha yangrardi: «Dovyurak! Birgalikda g'alaba uchun!» va «Qizil-oqlar» futbolda birlashinglar».
Portugaliya - «Bitta jamoa. Bitta tuyg'u. 11 million qalb.Olg'a, Portugaliya!» (uma equipa. uma paixao. 11 milhoes no coracao. forca Portugal!)
«Yagonaorzu, yagonamaqsad. Portugaliya - chempion!», «Buyuko'tmish, zafarlikelajak» — portugaliyalik muxlislar shunday shiorlardan voz kechib, jamoa va  mamlakatni sharaflaydigan iboralar foydasiga ovoz berishdi. Bitta savol bor -  portugaliyaliklar bunchalik uzun shiorni avtobusga qanday sig'dirisharkin?
Rossiya - «Bir kishi hamma uchun, hamma bir kishi uchun!»
Milliy jamoalar uchun ilgari surilgan shiorlarni obdon saralagan UEFA  Rossiya futbol ittifoqiga 5ta variantni tavsiya etdi va ulardan eng ma'qul topilgan 3tasi muxlislarga havola etildi. Saralash jarayonida Rossiya tomonidan RFI rahbari Vitaliy Mutko ishtirok etdi. «Bu yaxshi shior. Boshqalari qandaydir balandparvoz edi. Biz qiziqarli jamoaga egaligimiz, biroq barchamiz bir yoqadan bosh chiqarib, harakat qilsakkina u natijaga erishishi mumkinligini inobatga oldik. Tarkibimizda birinchi darajali megayulduzlar yo'q, shunday ekan, avvalo, jamoaviy ishga shaylanishimiz kerak. Agar hamjihat holda katta jonkuyarlik bilan kurashsak, imkoniyatimiz bo'ladi, albatta», — deya shiorga izoh berdi Vitaliy Leontevich.
Ruminiya - «3ta rang va millionlab yuraklarni birlashtirgan, Ruminiya uchun kurashadigan jamoa!» (O echipa, trei culori si milioane de inimi care bat pentru Romania!)
Ruminiya termasi shiorida xalqaro turnirlar xos jamoaviy ruh, milliy bayroq va  muxlislarga atalgan an'anaviy iboralar mujassam. Rumin jamoasi qit'a chempionatiga muntazam chiqmaydi. Shu ma'noda aytsak, ehtimolki, keyingi ishtiroklarda uning shiori nisbatan ixchamlashtirilar...
Slovakiya - «Bir xalq, bir yurak, bir orzu!» (Jeden narod, jedno srdce, jeden sen!)
Bo'lajak Evropa chempionatida qatnashadigan yana bir orzumand jamoa - bu Slovakiya termasi. Slovaklar ushbu shiorni «Bitta to'p, bitta ehtiros, bitta jamoa. Turnirni birgalikda zabt etamiz»dan ustun ko'rishdi. Ular shuningdek, «Xalq uchun, g'alaba uchun birgalikda» da'vatiga ham ovoz berishlari mumkin edi.
Turkiya - «Missiya hali bajarilmadi» (Biz Bitti Demeden Bitmez)
Fotih Terim jamoasining hali o'z so'zini aytmagani va qit'a birinchiligida raqiblar undan «syurpriz» kutishlari kerakligiga sha'ma. Ko'ramiz, turklar guruh bosqichida Chexiya, Xorvatiya va Ispaniya termalariga o'z so'zlarini nechog'li o'tkazisharkin?
Ukraina - «Orzu g'oliblarni tarbiyalaydi!» (Mrіya narodje peremojtsіv!)
Tanlov uchun yana 2ta shior bor edi: «Millionlab ukrain qalblari — sizlarning  12-o'yinchingiz», «Ukrainlar uchun o'ynaymiz! Orzu uchun kurashamiz». «Sariq-ko'klar» muxlislariga ma'qul kelgan da'vat mantiqqa mos, biroq unda milliy obraz yo'q.
Uels - «Ajdarlar qaytmoqdalar» (The dragons shall rise)
Bir qarashda, eng original va obrazli shior aynan Uels termasiga tegishli. U ajdar tasvirlangan milliy bayroqqa ham mos. Qizig'i, Uels futbol federatsiyasi avvalroq jamoani qo'llab-quvvatlashga qaratilgan harakatlarda boshqa shiordan foydalanayotgandi - «Birgalikda kuchliroq». Muxlislar hukmiga yana : «Ehtiros, g'urur, birdamlik» shiori ham havola etildi.
Davomi InterFUTBOL gazetasi blogida.
— deya xabar beradi uff.uz nashri.