Xalqaro o'q otish federatsiyasi prezidentining qaroriga ko'ra o'q otish bo'yicha O'zbekiston terma jamoasi a'zosi Vadim Skorovarov joriy yilning 5-21 avgust kunlari Braziliyaning Rio-de-Janeyro shahrida o'tkaziladigan XXXI yozgi Olimpiada o'yinlarida qatnashish xuquqini beruvchi yo'llanmaga ega bo'ldi. Bu haqida, Xalqaro o'q otish federatsiyasidan O'zbekiston Milliy olimpiya qo'mitasiga kelgan maktubda ma'lum qilindi.
Ma'lumki, tajribali sportchimiz Quvayt hamda Hindistonda Olimpiada o'yinlarining yo'llanmalari o'ynalgan Osiyo saralash musobaqalarida munosib ishtirok etib, VP-6 (pnevmatik miltiq) mashqida yuqori natijalarni qayd etgan edi. Shu bois, Xalqaro o'q otish federatsiyasi Vadim Skorovarovga Olimpiada o'yinlarida qatnashish xuquqini beruvchi yo'llanmani berishga qaror qilgan.
Shunday qilib, XXXI yozgi Olimpiada o'yinlariga yo'llanma olgan sportchilarimiz soni 56taga etdi.
Olimpiada o'yinlariga qadar sportning qator turlari bo'yicha yana bir necha litsenzion musobaqalar o'tkaziladi. Umid qilamizki, mazkur musobaqalarda ham sportchilarimiz o'zlariga bildirilgan ishonchni a'lo darajada oqlaydilar va “Rio-2016” Olimpiada o'yinlariga yo'l oladigan delegatsiyamiz safi yanada kengayadi. Bu yo'lda hamyurtlarimizga omad va zafarlar tilab qolamiz. Shavkat Jalilov
Manzil: O'zbekiston Milliy Olimpiya qo'mitasi matbuot xizmati

— deya xabar beradi uff.uz nashri.