Yan Oblakning mahorati tufayli «Atletiko» ChL finalchisiga aylandi, «Bavariya» esa Milandagi Madrid derbisini tomoshabin sifatida kuzatadigan omadsiz jamoalar safidan joy oldi. Shu bois, bundesliga grandini «quyosh»ga, uning o'ta qaynoq hujumlarini yo'qqa chiqargan mohir posbonni esa «bulut»ga qiyosladik.
Darhaqiqat, Ispaniya poytaxtidagi «matraschilar» tarafdorlari hozirda Yan Oblakni qo'lda ko'tarib yurishga shaylar. Vaholanki, yaqingacha u jamoaning omadi chopmayotgan o'yinchilari safida edi. Bolaligida uzun sochlari va yuvoshligi bilan qiz bolani eslatadigan posbon «Atletiko»ning so'nggi yillardagi an'anasi - albatta, mohir darvozabon bilan maydonga tushish tamoilini davom ettirmoqda. Oblakning o'tmishdoshlari - David De Xea va Tibo Kurtua tumanli o'lkada o'z o'rinlarini topib ulgurishdi. Statistikaga tayanib xulosa chiqaradigan bo'lsak, Yan o'z kasbdoshlaridan o'zib ketdi.
Mavsum davomida 23ta uchrashuvni «quruq» o'tkazish, ChL doirasida qatorasiga 2ta penaltilar seriyasida g'olib chiqish (shu paytga qadar birorta darvozabonga nasib etmagan natija), kasbdoshlariga qaraganda eng kam gol o'tkazib yuborish - maygacha Oblak bir qator yuksak natijalarni qayd etib ulgurdi. Primeroning eng yaxshi darvozaboniga atalgan «Zamora» sovrini uni intiqlik bilan kutib turibdi. «Atletiko»ning prezidenti bo'lmish kinoprodyuser Enrike Sereso bu kamtarin kiperni dunyoning ikkinchi darvozaboni sifatida e'tirof etishdan charchamayapti. To'g'ri, Oblakdan kuchliroq darvozabonning kimligini oshkor etmayapti. Ha, «Atletiko» fanatlari uchun Yan Oblak dahoga aylandi.
Bundan atigi 1,5 yil avval futbolchiga «To'rt tomoning qibla, istasang, Lissabonga yoki boshqa joyga jo'na, faqat pulni cho'z», deyishga tayyor edilar. «Benfika»ning EL finalidagi o'yinidan hamda Oblakning o'ziga bo'lgan ishonchidan to'g'ri xulosa chiqargan mutasaddilar uning timsolida Tibo Kurtuaning vorisini tasavvur qilishdi. Shu bois, mo'ljaldagidan ancha yuqoriroq ko'ringan bahodan ham cho'chishmadi. Bir qarashda jajji klubdek ko'ringan «Atletiko» so'ng­gi marra posboni uchun 16 mln. evrodan voz kechdi. Shu paytgacha Ispaniyada hech bir klub darvozabon uchun shuncha mablag' sarflagan emas.
Cheksiz orzu-umidlar bilan Madridga tashrif buyurgan Yan Oblak primeroda to'p surish azaliy orzusi ekanligini qayta-qayta ta'kidladi. Ilk kunlardanoq jarohatlanib, safdan chiqdi. Shu sababli sentyabrgacha kasbdoshi Migel Moyyaning o'yinlarini kuzatib o'tirishdan boshqasiga yaramadi. O'zini ko'rsatish imkonini Diego Simeone ChLda «Olimpiakos»ga qarshi safar uchrashuvida berdi. Biroq jamoa 2:3 hisobida imkoniyatni boy berdi. Aksiga olib, mezbonlar posboni Roberto o'sha oqshom o'ta ishonchli o'ynadi - hayratomuz harakatlari bilan sakkiz oyoqli mahluqni eslatardi. Taqdirning qaltis hazilini qarangki, Robertoning «Atletiko» tarbiyalanuvchisi ekanligi Oblak uchun qo'shimcha zarba bo'ldi.
Shundan so'ng yana zaxiraga «mixlandi». Faqatgina o'ta kuchsiz jamoalarga qarshi kubok bellashuvlarida maydonga tushishga izn berardilar. Sloveniyalik Yangi yil va Rojdestvoni kutib olish bilan band bo'lgan kunlarda Oblakning oilasi yangi mehmonni kutayotgandi. Yan biroz kechikib, 7 yanvar kuni tug'ildi. Uning kelajagi avvaldan ma'lum edi. Uning otasi - Matyaj Oblak professional darvozabon bo'lgani bois, o'g'lini ham sportsiz tasavvur qilolmasdi. Yan 6 yoshidan boshlab «Lochan» futbol maktabiga qatnay boshladi, to'p esa uning doimiy o'yin­chog'iga aylandi. 10 yoshigacha «Lochan»­da tahsil olgan bolakay kutilmaganda Lyublyananing «Olimpiya»siga o'tishini ma'lum qildi.
14 yoshida Oblak o'z tengdoshlari orasida etakchiga aylandi. «Olimpiya»ning sardori bo'ldi. Belgradda o'tkazilgan o'smirlar o'rtasidagi turnirda eng yaxshi darvozabon unvoniga sazovor bo'lgach, evropalik skautlar qurshovida qoldi. Xususan, «Empoli», «Fulxem» va «Liverpul» o'z safiga chorladi, «qizillar» qiziqishlari jiddiy ekanligini isbotlash maqsadida hatto uni «Enfild»­dagi «Chelsi»ga qarshi bahsga taklif etishdi. Yosh posbon o'z faoliyatini «Olimpiya»da boshlashini ma'lum qilib, fikrida qat'iy turib oldi.
Darvoqe, o'smirlik chog'idagi intervyularining birida hech qachon bolalikdagi orzusi amalga oshmasligini ma'lum qilgandi. Ammo «Olimpiya» murabbiyi Yani Pate tamoman boshqacha fikrda edi. Yandagi yuqori reaktsiya, sovuqqonlik, o'rganishga, taraqqiyotga bo'lgan kuchli ishtiyoqi uni lol qoldirardi. Har kuni 25 kilometrlik masofani velosipedda bosib o'tar, shu zayl mashg'ulotlarda qatnashardi. Sloveniya chempionatidagi debyutini 16 yoshida nishonlaganiga qaramay, atigi 3ta bellashuvni o'tkazib yubordi. Dastlabki marraga erishganidan ke­yingina «Benfika» taklifini qabul qildi.
Portugaliya grandi tarkibidan munosib joy olishning naqadar qi­yinligini futbolchilar yaxshi bilishadi. Ayniqsa, yosh iqtidor sohiblariga oson bo'lmasligi aniq. Chindan ham, 17 yoshli Oblakni «burgutlar» tarkibida hech kim ko'rmadi - u Lissabonga kelishi bilan «Beyra Mar»ga ijaraga berildi. Bu klubda bir marta maydonga tushishi bilanoq, «Olyanense»ga «surgun» qilindi. Mazkur jamoada umuman o'yinga tushirilmadi.
Davomi Akmal Eshonxonov blogida.
— deya xabar beradi uff.uz nashri.