15-may kuni Germaniyada yashayotgan ko'pchilik  vatandoshlarimiz uchun yodda qoladigan kun bo'ldi desak mubolag'a bo'lmaydi. Aynan shu kuni Berlin shahrida an'anaga aylanib ulgurgan, Evropada davlatlarida istiqomat qilayotgan va o'qiyotgan 200 dan oshiq O'zbekistonliklar o'rtasida  to'rtinchi marotaba futbol turniri bo'lib o'tdi. Ushbu turnir „Davra“ o'zbek-nemis madaniy jamiyati tashabbusi va O'zbekiston Respublikasining Berlin shahridagi Elchixonasi ko'magi ostida yuqori saviyada tashkil qilindi. Jami 12 jamoadan iborat bo'lgan 2 guruhda , turnir kubogini qo'lga kiritish uchun shiddatli va qiziqarli bahslar bo'lib o'tdi. Turnirda Germaniya davlatining Myunxen, Dortmund, Frankfurt, Triesdorf va Berlin shahri jamoalaridan tashqari Chexiya davlatidan Praga jamoasi ham  ishtirok etdi. Musobaqada faxrli 3-o'rinni FC TIIM ( Toshkent Irrigatsiya va Melioratsiya Instituti) va FC Nihol  jamoalari, 2-o'rinni Rhein Main United jamoasi va turnir kubogini Myunxen jamoasi qo'lga kiritdi.
Jamoada Germaniya davlatining turli oliy o'quv yurtlarida  tahsil olayotgan  o'zbekistonlik talabalar va jamiyat a'zolari to'p surishdi. Jamiyatning o'z oldiga qo'ygan maqsadlaridan biri, sog'lom turmush tarziga yo'naltirilgan turli sport musobaqalarini tashkil etish va mazkur tadbirlarda faol ishtirok etishdan iborat.  Bundan tashqari tashkilotchilar tomonidan turnirning eng yaxshi darvozaboni va eng yaxshi o'yinchisiga aniqlanib, ularga  esdalik sovg'alari topshirildi.
FC Nihol  jamoasi yarim final bahsida turnir g'olibi Myunchen jamoasiga mag'lubiyatga uchragan bo'lsada, jamoaning bu yilgi natijasidan qoniqish hosil qilishdi. Mazkur futbol jamoasi Berlin shahrida tashkil etilgan „Nihol“ o'zbek-nemis madaniy va ilmiy jamiyati negizida tashkil qilindi.
Bundan tashqari „Nihol“ jamiyati ilmiy yo'nalishda Germaniya davlatining oliy o'quv yurtlarida tahsil olayotgan O'zbekistonlik talabalar, ilmiy izlanish olib borayotgan yosh olimlarni har xil seminar va konferentsiyalar tashkil qilish orqali ilmiy-amaliy fikr almashinuviniga ko'maklashish, turli madaniy tadbirlarda ishtirok etib, yurtimizning boy tarixi, madaniyatini targ'ib qilish kabi vazifalarni ham qamrab olgan.
Turnir so'ngida qatnashchilar uchun o'zbek milliy taomi osh tortiq qilindi.
— deya xabar beradi uff.uz nashri.