Mamlakatimizda mehmon bo'lib turgan Birlashgan Arab Amirligi velosport federatsiyasi prezidenti Osama Ahmad al-Shafat boshchiligidagi delegatsiya bugun kunning ikkinchi yarmida O'zbekiston Milliy olimpiya qo'mitasiga tashrif buyurdi.
O'zbekiston Milliy olimpiya qo'mitasida mehmonlarni Madaniyat va sport ishlari vazirining birinchi o'rinbosari Murod Aliev, Milliy olimpiya qo'mitasi vitse-prezidenti Farhod Turdiev hamda O'zbekiston velosport federatsiyasi raisining birinchi o'rinbosari Elena Chernikova kutib oldilar.
Dastavval mehmonlar qo'mita muzeyida bo'lib, bu er o'rnatilgan turli eksponatlar, kubok hamda medallarni ko'zdan kechirdi. Shundan so'ng, O'zbekiston Milliy olimpiya qo'mitasi xuzuridagi Respublika sport tibbiyoti ilmiy amaliy markazida bo'lib, markaz faoliyati bilan yaqindan tanishdilar.
Madaniyat va sport ishlari vazirining birinchi o'rinbosari Murod Aliev, Milliy olimpiya qo'mitasi vitse-prezidenti Farhod Turdiev hamda O'zbekiston velosport federatsiyasi rahbariyati bilan bo'lib o'tgan muzokaralar chog'ida mamlakatimizda jismoniy tarbiya va sportga, xususan, bolalar sportini rivojlantirishga Davlatimiz hamda xukumatimiz rahbariyati tomonidan qaratilayotgan alohida e'tibor, yaratilayotgan shart-sharoitlar haqida atroflicha so'z yuritildi. Shuningdek, yurtimizda velosport turi mamlakatimizda Ustuvor sport turlaridan biri hisoblanishini va bugungi kunda Respublikamizning barcha xududlarida viloyat federatsiyalari tashkil etilib, ommaviylik darajasi yil sayin yuksalib borayotganligini mamnuniyat bilan ta'kidlab o'tildi.
O'z navbatida BAA velosport federatsiyasi prezidenti Osama Ahmad al-Shafat O'zbekistonda sport sohasini taraqqiy ettirish borasida amalga oshirilayotgan sa'y-harakatlarni yuqori baholadi va bu kabi uchrashuvlar o'zaro hamkorlik rishtalarini yanada keng quloch yozishiga xizmat qilishini ta'kidlab o'tdi.
“O'zbekistonda sog'lom turmush tarzini shakllantirish hamda kelajak egalarini har tomonlama barkamol qilib voyaga etkazish borasida amalga oshirilayotgan ishlar har qancha taxsinga sazovor. Yurtingizda, shuningdek, Olimpiya harakatini rivojlantirish yo'lida amalga oshirilayotgan sa'y-harakatlarni ko'rib, ochig'i xayratga tushdim. Mening bu safargi tashrifimdan ko'zlangan asosiy maqsad o'zaro hamkorlik rishtalarini yangi bosqichga olib chiqishdan iborat. Xabaringiz bor, bizda “Abu-Dabi tur”, “Tur Dubay” va “Tur Sharja” kabi xalqaro velopoygalar muntazam ravishda o'tkazilib turadi. Agarda O'zbekiston jamoasi ham ana shu velopoygalarda ishtirok etsa, nur ustiga a'lo nur bo'lardi. Bundan tashqari O'zbekistonda va BAAlarida hamkorlikda o'quv-mashg'ulot yig'inlari tashkil etish taklifini ham ilgari surmoqchimiz. Shuni ishonch bilan ayta olamanki, hamkorlikda o'tkaziladigan o'quv-mashg'ulot yig'inlari har ikki tomonga ham ijobiy natija beradi”, - dedi BAA velosport federatsiyasi rahbari.
Tashrif so'ngida mehmonlarga Madaniyat va sport ishlari vazirligi hamda Milliy olimpiya qo'mitasining esdalik sovg'alari topshirildi.
Shavkat Jalilov
O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.