Rossiya termasi tarixidagi eng yaxshi to'purar Aleksandr Kerjakov yangi ochilgan «Match TV» telekanali «yuzi»ga aylandi. Endi muxlislar uning ekspert sifatidagi xulosalarini TV orqali tinglashlari mumkin. Shu bahona quyida sport teleefiri yulduziga aylangan evropalik 5 nafar futbol yulduzini e'tirof etamiz.
Gari Nevill. Mamlakati: Angliya. Sobiq himoyachi naq 19 yil bitta jamoa - «MYu»da to'p surdi va ko'plab sovrinlarni qo'lga kiritdi, xususan, ChLda 2 bora g'oliblik nashidasini surdi. Ser Aleks Fergyuson unga bejiz sardorlik bog'ichini topshirmagan va «O'z davrining eng yaxshi o'ng qanot himoyachisi», deya maqtamagandi. Gari sermazmun faoliyatidan so'ng televidenieda ishlashni ma'-qul topdi. Dastlabki davrda Sku Sportsdagi chiqishlari muxlislar g'ashiga tegdi, ammo vaqt o'tgani sayin Nevillning nutqi ravonlashdi, fikrlari teranlashdi. Xullas, sobiq «qizil iblis» murabbiylik ishiga o'tishiga qadar chinakam TV-yulduzga aylanib ulgurdi.
Oliver Kan. Mamlakati: Germaniya. Bundesliganing ko'p karra chempioni, ChL g'olibi va futbol tarixidagi eng yaxshi darvozabonlardan biri. Faoliyatining yorqin jihatlari to'g'risida 2ta avtobiografik kitob chiqardi - Nummer Eins («1-raqam») va Ich. Erfolg kommt von innen («Men. Muvaffaqiyat o'zingga bog'liq») va ular muxlislarda katta qiziqish uyg'otdi. Umuman, Oliver «Bavariya»da o'ynagan oxirgi mavsumidayoq tijorat kanali -  Premiereda «Birinchi raqam - Kan yili» ko'rsatuvini olib bordi. Qo'lqoplarini mixga ilgach esa, Zaltsburg universitetida tahsil olib, MVA darajasiga erishdi va TVda to'laqonli faoliyatini boshladi. Afsonaviy posbon hozir ZDF kanali bilan shartnomaga ega. Uning asosiy vazifasi - Germaniya termasi va bundesliga o'yinlarini tahlil qilish.
Santyago Kanisares. Mamlakati: Ispaniya. Santya­go «Real» libosida maydonga tushishni orzu qilgandi, biroq sabri 10 yillik ijara kelishuvlariga etdi... Uning «Valensiya»ga o'tishi esa, klubning gullab-yashnagan davriga to'g'ri keldi: Ispaniyadagi g'alabalar, ChL finaliga 2 marta chiqish... Xullas, faoliyatining yakuniy bosqichini salmoqli natijalar bilan bezadi va futboldan ketgach, o'zini ralli va media olamiga urdi. Shunday qilib, oqsoch kiper bora-bora tematik tele va radiodasturlarga taklif qilinadigan oddiy ekspertdan TV boshlovchi hamda etuk sharhlovchiga aylandi. Shuningdek, turmush o'rtog'i bilan mamlakatda keng ommalashgan raqs shousida g'olib bo'ldi. Xulosa shuki, boshlovchi-Kanisares mashhurlik bobida futbolchi-Kanisares bilan bemalol raqobatlasha oladi.
Janluka Vialli. Mamlakati: Italiya. Viallini Genuya va Turinda ajoyib futbolchi sifatida eslashadi. Italiya termasi sobiq hujumchisi skudettoni yutish barobarida ChLda muvaffaqiyat qozondi. To'g'ri, u «Chelsi»da o'zini ko'rsatolmagan bo'lsa-da, aynan shu klubda murabbiy sifatida iqtidorini namoyish etib, bir nechta sovrin sohibi bo'ldi: Liga kubogi, Kubok egalari kubogi, Angliya kubogi va superkubogi, UEFA superkubogi. Vialli ke-yinchalik Sku Italia telekanalida oddiy ekspert sifatida ish boshlab, mutlaqo yangi darajaga ko'tarildi.
Ayniqsa, JCh-82 g'olibi Paolo Rossi bilan qaynoq musohabalari, do'stona fikr almashishlari, sharh davomidagi his-hayajoni ko'pchilikka ma'qul tushdi. Janluka hozirda asosan «A» seriyasi o'yinlarini sharhlab boradi. Shuningdek, Italiya jamoalari ishtirokidagi ChL bahslari ham unga topshiriladi. «Sampdoriya» sobiq hujumchisi yana Genuya klubining shaxsiy kanali - Samp TVda ham ko'rinish bermoqda.
Davomi Akmal Eshonxonov blogida.
— deya xabar beradi uff.uz nashri.