Xabaringiz bor, shu kunlarda Toshkent viloyatida joylashgan “Do'stlik” stadionida Regbi-15 bo'yicha Osiyo chempionati ikkinchi divizion bahslari o'tkazilmoqda. Ushbu musobaqada O'zbekiston, BAA, Tailand va Guam erkaklar terma jamoalari birinchi divizion yo'llanmasi uchun kurash olib borishyapti.
Mazkur musobaqalarni bevosita kuzatish maqsadida Xalqaro regbi uyushmasi mediya menejeri Jeyms Fijerald hamda Osiyo regbi federatsiyasi ijroqo'm a'zosi Aga Xusayn tashrif buyurishgan.
Bugun kunning birinchi yarmida O'zbekiston Milliy olimpiya qo'mitasida bo'lib o'tgan matbuot anjumanida yuqorida nomlari zikr etilgan mehmonlar hamda O'zbekiston Milliy olimpiya qo'mitasi va Respublika regbi federatsiyasi rahbariyati ishtirok etishdi.
Matbuot anjumani avvalida O'zbekistonda barcha sport turlari kabi Regbi sport turini rivojlantirishga Davlatimiz hamda xukumatimiz rahbariyati tomonidan qaratilayotgan e'tibor, zarur shart-sharoitlarni yaratilganligi O'zbekiston Regbi maktabini xalqaro maydondagi mavqei yil sayin yuksalishida muhim omil bo'layotganligini mamnuniyat bilan ta'kidlab o'tdilar.
“Bugungi kunda Osiyo regbi federatsiyasiga 32 davlat a'zo bo'lsa, O'zbekiston ana shu davlatlar orasida kuchli oltilikda mustahkam o'rin egallab turibdi. Ana shu ko'rsatkichning o'zi ham yurtingizda regbi sport turi qay darajada taraqqiy etib borayotganligidan dalolat beradi. Yana bir asosiy jihati, O'zbekiston regbi maktabi o'ziga xos tarixga ega va bugungi kunda ham uning ommaviylik darajasi yuqori. Qaerdaki ommaviylik yuqori bo'lsa, o'sha joyda raqobat muhiti kuchli bo'ladi. Raqobat muhiti yuksalgan joyda muvaffaqiyatlar ham yuksaklik sari bo'y cho'zib boraveradi”, - dedi Osiyo regbi federatsiyasi ijroqo'm a'zosi Aga Husayn.
“Avvalo taklif uchun o'z minnatdorchiligimni bildirmoqchiman. Men O'zbekistonga kelganimdan juda ham xursandman. Regbi sport turi Osiyo qit'asida yildan-yilga rivojlanib boryapti. 2019 yilgi jahon chempionatini Yaponiyada o'tkazilishi ham bejiz emas. Siz ko'rib turgan mana bu Jahon kubogi Markaziy Osiyo davlatlari orasida birinchi bo'lib O'zbekistonga olib kelindi. Yurtingizga tashrifim davomida shunga yana bir bora amin bo'ldimki, O'zbekiston Regbi maktabi katta salohiyatga ega va umid qilamanki yaqin kelajakda O'zbekiston olimpiya shon-shuhrati muzeyida Regbi sport turi bo'yicha ham nufuzli musobaqalarning kubok hamda medallari o'rin egallaydi. Fursatdan foydalanib, Osiyo ikkinchi divizion musobaqalarining tashkilotchilariga o'z minnatdorchiligimni bildirib qolmoqchiman”, - dedi Xalqaro regbi uyushmasi mediya menejeri Jeyms Fijerald.
Matbuot anjumanida jurnalistlar, shuningdek, O'zbekiston Regbi federatsiyasi tomonidan amalga oshirilgan ishlar hamda istiqboldagi rejalar haqida ham batafsil ma'lumotga ega bo'ldilar.
Shavkat Jalilov
O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.