O'tgan hafta O'zbekiston birinchiligida ikkinchi bosqichning 12-tur uchrashuvlari bo'lib o'tdi. Yana to'rt turdan so'ng musobaqaga yakun yasaladi. Shu ketish bo'lsa, oliy liga yo'llanmasini qo'lga kiritgan jamoa nomini kelasi oy avvalida bilib olamiz shekilli? Boisi, mazkur turda asosiy da'vogarlar g'alaba nashidasini surdi. Natijada peshqadamlar orasidagi ochkolar farqli saqlanib qoldi.
“Bo'yoqchilar”ga besh daqiqa ko'p va kamlik qildi!
Turning markaziy uchrashuvi Toshkentda bo'lib o'tdi. “O'zDongJu”ni qabul qilgan “Obod” gollar shousida mehmonlarni “taslim” qilishning uddasidan chiqdi. Mezbonlarning ikkita goliga munosib tarzda javob qaytargan “bo'yoqchilar”ga uchinchi goldan so'ng vaqt etmay qoldi yoki vaqt ko'plik ham qildi. Ya'ni, o'yin 85-daqiqada tugaganida mehmonlar poytaxtdan o'ta muhim ochkoni qo'lga kiritib qaytardi. Agar vaqt sal ko'proq bo'lganida balki uchinchi golni ham urisharmidi? Xullas, Toshkentda 3:2 hisobida yutqazgan “O'zDongJu” yo'llanma uchun bo'layotgan kurashda “Obod”ni oldinga o'tkazib yubordi. Bu yog'iga jamoalarni besh ochko ajratib turibdi. Qolgan to'rt turda mazkur farq yo'qqa chiqishi uchun “bo'yoqchilar”ning o'zlari ham ochko yo'qotmasligi kerak, qolaversa, poytaxtliklar ham ochko yo'qotishi shart!
Lekin bunga ishonish qiyin, ammo chempionatning deyarli har bir turida kutilmagan natijalar qayd etilayotgani ham barchaga ma'lum. Avvalgi maqolamizda aytib o'tganimizdek, “Obod”ni ketma-ket uchta muhim o'yin kutib turgandi. Bobur Zuhriddinov shogirdlari birinchi to'siqdan eson-omon o'tishning uddasidan chiqa olishdi. Endi Farg'onaning ikki klubi bilan hisob-kitob qilishadi. Bu bellashuvlarda ham poytaxtliklarga xuddi “bo'yoqchilar” bilan bo'lgani singari oson bo'lmaydi. Agar jamoa shu to'siqlardan ham yo'qotishlarsiz o'tsa, mavsumni kamida ikkinchi o'rinda yakunlaydi. Mabodo peshqadam “Oq-tepa” ochko yo'qotadigan bo'lsa, birinchi o'ringa ham chiqib olish uchun imkoniyat paydo bo'ladi. Lekin Ildar Sakaev boshchiligidagi “Oq-tepa” yo'l qo'yarmikan? Sababi, turdan-turga yanada yaxshi o'yin namoyish qilayotgan peshqadam bu safar Qarshida “Nasaf-2”ni “yanchib” tashladi.
“Nasaf”ning asosiy jamoasi Jizzaxda O'zbekiston Kubogining final uchrashuvida o'ynaydigan kun yosh “ajdarlar” o'z uyida birinchi liga peshqadamini qabul qilib, tajribali raqib oldida ojiz qoldi. Vaholanki, Nurali Sultonov shogirdlari Toshkentdagi uchrashuvda mezbonlarga juda jiddiy qarshilik ko'rsatgan edi. Qarshida bunga guvoh bo'lmadik. Bu natijada ham o'z aksini topdi – 0:5. Ahamiyatlisi, to'purarlar bahsida ham “Obod” va “Oq-tepa” jamoalari a'zolari peshqadamlik qilmoqda. Mazkur turda Temur Hakimov dublga erishgan bo'lsa, to'purarlar Alisher Azizov va Shohruz Norxonov esa, o'z hisobiga bittadan gol yozib qo'ydi. Qolgan to'rt turda ham bu hujumchilar faollikni to'xtatmasa, to'purarlik shu futbolchilarning biriga nasib qilishi hech gap emas!
Ketma-ket beshinchi uchrashuvda g'alaba nashidasini surayotgan “Zomin” 12-turdan keyin to'plar nisbatiga ko'ra, turnir jadvalida uchinchi o'ringa ko'tarilib oldi. Ahamiyatlisi, so'nggi besh turda faqat “Zomin” g'alaba qozongan. Hatto peshqadamlarning hisobida ham bittadan mag'lubiyat bor. Albatta bu e'tiborga molik natija. “Zomin” oxirgi marta 14 sentyabrda (7-tur) Toshkentda “Oq-tepa”ga yirik hisobda yutqazgandi. Jamoa shundan beri hatto durang neligini ham bilmay kelmoqda. Kerak bo'lsa, peshqadamning o'zi ham Zomindan ochkosiz qaytdi. Ko'ramiz, ishtahasi ochilgan “Zomin”ning “qorni qachon to'yar ekan?” Yoki qachon mag'lubiyatsiz seriyasiga nuqta qo'yar ekan?
Ikkinchi bosqich boshlanganida oliy ligaga chiqishga asosiy da'vogar deya e'tirof etilgan “Xorazm” endi rostkamiga kurashdan chiqdi, shekilli? Boisi, Vali Sultonov shogirdlari bu turda moliyaviy holati o'zlaridan-da, yomonroq bo'lgan “Yozyovon-Lochinlari”ni qabul qilib, nursiz durangga erishdi. Qoyil qoladigani shuki, yozyovonliklar Respublikamizning ikki uzoq hududiga uyushtirgan safarlaridan to'rt ochko olishning uddasidan chiqdi. Buni uncha-buncha jamoa uddalay olmayotgan bir vaqtda “Yozyovon-Lochinlari”ga qoyil qolish kerak. “Xorazm”ga kelsak, jamoani peshqadam bilan 10 ochko ajratib turibdi. Garchi “Oq-tepa” so'nggi turni Xorazmda o'tkazsa-da, katta ehtimol bilan mazkur o'yin “oliy chiptasi uchun uchrashuvga” aylanmaydi. Chunki qolgan turlarda toshkentliklarning ochko yo'qotishini taxmin qilish qiyin. Boz ustiga, “Xorazm” ham oxirgi o'yinga qadar faqat g'alaba qozonishiga ishonish mushkul. Xullas, jamoa endi kelasi yil oliy liga haqida o'ylab ko'radiganga o'xshaydi.
12-turda dilni xira qiladigan voqea ham ro'y berdi. 1-liganing mustahakam klublaridan biri “Kosonsoy” ham moliyaviy muammolarga o'ralashib qolgan shekilli, jamoa o'tgan hafta Nukusga bora olmadi. Natijada jamoaga texnik mag'lubiyat yozildi. Yuqori o'rinlarni ko'zlayotgan “Tsementchi” o'tgan turda muhim ochkolarni boy berib, tepaga chiqish imkoniyatini deyarli yo'qqa chiqardi. Muborakda “Mash'al-2” mehmoni bo'lgan quvasoyliklar durangga erishishdi. Chempionatning haqiqiy autsayderi “G'ijduvon” o'tgan hafta o'zining eng yirik g'alabasini qo'lga kiritdi. “Xotira-79” G'ijduvonda 5:0 hisobida yutqazib qo'ydi. Ketma-ket «Obod» va “Zomin”ga yutqazgan “NBU-Osiyo” bor alamini “Lokomotiv-BFK”dan oldi. “Temiryo'lchilar” esa, ketma-ket ikkinchi uchrashuvda o'z darvozasidan to'rttadan gol olib chiqmoqda. Mavsum yakunlanishiga 4ta tur qolganida shunga guvoh bo'lyapmizki, buyog'iga peshqadamlar qandaydir kutilmagan xatolarga yo'l qo'ymasa, endi ularga etib olish mushkul. Xususan, “Oq-tepa”dan birinchi o'rinni tortib olish qiyin. “Obod” ham boshqa xato qilmaslikka harakat qiladi. Qolganlar ularni quvishda davom etadi.
13-tur oldidan
13-tur bizga bir qator qiziqarli uchrashuvlarni taqdim qiladi. Turning uchta markaziy uchrashuvining hammasi vodiyda o'tkaziladi. Turnir jadvalida yonma-yon turgan klublar o'zaro hisob-kitob qilishadi. Jumladan, Payshanba kuni “Zomin”ning besh o'yinlik g'alabali seriyasi to'xtatish mumkin. Sababi, jamoa 13-turda Andijonda “O'zDongJu” mehmoni bo'ladi. Mabodo “bo'yoqchilar” ham zominliklar yo'lini to'sa olmasa, unda “Zomin” uchinchi o'rinni deyarli naqd qiladi. Agar aksincha bo'lsa, “bo'yoqchilar” oliy liga yo'llanmasi uchun kurashga yana qo'shiladi va uchinchi o'ringa ham mustahkam joylashadi. Mazkur o'yin ham qiziqarli kechishiga shubha yo'q.
Turnir jadvalida 5-6 – o'rinlarni egallab turgan “Xorazm” va “Tsementchi” payshanba kuni Quvasoyda maydonga chiqishadi. Yuqori o'rinlarni egallash uchun biroz kechikkan quvasoyliklar payshanba kuni o'z uyida ochko yo'qotadigan bo'lsa, yuqoridagilardan deyarli ortda qolib ketadi. Aksincha, g'alaba qozonadigan bo'lsa, ochkolar bo'yicha “Xorazm”ga etib olishdan tashqari, kurashda davom etadi.
Peshqadamlardan biri “Obod” o'z uyida uncha-buncha raqibga ochko bermaydigan “Yozyovon-Lochinlari” mehmoni bo'ladi. Yodingizda bo'lsa, birinchi davrada poytaxtliklar Toshkentda yirik hisobda g'alaba qozongandi. Yozyovonliklar shu mag'lubiyat alamini olish uchun ham payshanba kuni g'alaba qozonishga majbur. Qolaversa, “Yozyovon-Lochinlari” 13-turda matonatlarini ko'rsatadigan bo'lsa, bundan nafaqat mezbonlar, balki “Oq-tepa”, “Zomin”, “O'zDongJu”, “Xorazm” manfaatdor bo'ladi.
Borgan sari oliy ligaga yaqinlashib borayotgan “Oq-tepa” payshanba kuni “Orol”ni qabul qiladi. Bu raqiblarning Nukusdagi o'yinida toshkentliklar g'alaba nashidasini surgandi. Bugun bo'lib o'tadigan bellashuvda ham katta ehtimol bilan mezbonlar g'alaba qozonadi. Garchi “Oq-tepa”ni ham mazkur o'yinda xato qilishga haqqi bo'lmasa-da, turning markaziy o'yinlari yuqoridagi uch bahs bo'lishiga hech qanday shubha yo'q. Mabodo Ildar Sakaev shogirdlari kutilmaganda “Orol” bilan bo'ladigan bellashuvda ochko yo'qotadigan bo'lsa, chempionatning kelasi turlari yanada qiziqarli kechishiga shubha yo'q.
13-tur. 22 oktyabr (payshanba)
O'ZDONGJU – ZOMIN
YoZYoVON-LOChINLARI – OBOD
TsEMENTChI – XORAZM
XOTIRA-79 – MASh'AL-2
KOSONSOY – G'IJDUVON
OQ-TEPA – OROL
NBU-OSIYo – NASAF-2
23 oktyabr (juma)
PAXTAKOR-2 – LOKOMOTIV-BFK.
Manba: arena.uz
— deya xabar beradi uff.uz nashri.