Mittivoylar va albinoslar klublari haqida eshitganmisiz? Ehtimol, Vatikan termasi borligini ham bilardirsiz? Mabodo, bulardan hamon bexabar bo'lsangiz, quyidagi maqolani o'qishni tavsiya etamiz. Bugun jahonda faoliyat yuritayotgan o'ziga xos havaskorlar jamoalari to'g'risida so'z yuritmoqchimiz.
«Gigantes du Norti»
Mitti odam(karlik)lar futboli - yangilik emas. Ang­liyada past bo'yli o'yinchilar o'rtasida chempionat ham o'tkaziladi: mini-futbol ko'rinishidagi turnirda bir jamoada 7 nafar futbolchi to'p suradi. Hattoki, 2005 va 2009 yillarda mazkur toifa bo'yicha jahon chempionati ham tashkil etilgan. Braziliyaliklar sportning bu turiga o'ziga xos yangilik kiritishgach, mahalliy birinchilikda «Gigantes du Norti» (portugalchadan tarjima qilganda «Shaharlik gigantlar» ma'nosini bildiradi) deb nomlanuvchi jamoa qatnasha boshladi. Klubga asos solishdan maqsad - tug'ma nuqsonlar kamsitish va jirkanishga sabab bo'lmasligini isbotlashdan iborat edi. Dastlab «gigantlar»ni ko'pchilik jiddiy qabul qilmadi, ammo hozirga kelib ularni hech kim mazax qilmay qo'ygan. 28 yoshli Kazemiro Ribeyro jamoa yulduzi sanaladi. Bo'yi 139 santimetr bo'lgan ushbu futbolchiga o'yin uslubiga mos ravishda «Vagner Lav» taxallusi berilgan.
«Poytaxt politsiyasi»
Angliyaning Ist-Molisi grafligidagi shahar - Surrey birinchiligida «Poytaxt politsiyasi» deb nomlanuvchi jamoa qatnashadi. Mazkur klubda kimlar to'p surishini anglash qiyin emas - faqat huquq-tartibot vakillari. Bosh murabbiylik vazifasini mahalliy terrorchilikka qarshi bo'linma rahbari Jimmi Kuper bajaradi. «O'yinlar payti bizni kamdan-kam hollarda qo'llab-quvvatlashadi, - deydi u. - Tribunalardan turli noxush hayqiriqlar eshitiladi, o'sha tomonga qarashimiz hamono muxlislar jim bo'lib qolishadi. Umuman, uchrashuv davomida qandaydir tartibsizlik sodir etilsa, qonunbuzar bilan o'zimiz gaplashib qo'yamiz».
«Koa Bosko»
2010 yili Italiyaning Rozarno shahrida afrikalik ikki kishining o'ldirilishi mamlakatda tartibsizliklarni keltirib chiqardi. Shunda mahalliy ruhoniy Roberto Meduri murakkab vaziyatdan chiqib ketish chorasini topdi: u qora qit'adan tashrif buyurgan migrantlardan tuzilgan «Koa Bosko» jamoasiga asos soldi. Ular italiyalik aholidan tuzilgan terma bilan o'rtoqlik uchrashuvi o'tkazishdi va shu tariqa, ixtilofga barham berildi. Hozirda «Koa Bosko» Italiyaning ettinchi divizionida ishtirok etmoqda. Roberto Meduri esa sport har qanday nizolarni bartaraf etishga qodir soha ekanligini alohida ta'kidladi.
«Albinos Yunayted»
Tanzaniyada istiqomat qiluvchi albinoslardan tuzilgan jamoa - «Albinos Yunayted» turli xurofotlar va irqchilikka qarshi futbol bilan javob qaytarishni ma'qul biladi. Zero, ular o'zlari yashayotgan mamlakatda tez-tez tajovuzlarga giriftor bo'lishadi. «Butun umrim shu bilan o'tdi, - deydi klubning 22 yoshli yarim himoyachisi Yosin. - Mahalliy fuqarolarning bizni ko'rgani ko'zlari yo'q, doimo kalaka qilishadi. Mag'lubiyatga uchrasak, «G'alaba qozona olmasliklari tayin edi, axir ular odam emas-ku», deyishardi. Ammo zafar quchsak, ko'zlari ochilib, aslida noto'g'ri fikr yuritishgani, barcha jabhada hech kimdan qolishmasligimizni tushunib etardilar. Aynan shunday holatlar uchun ham futbol o'ynaymiz». Tanzaniya hukumati jamoani qo'llab-quvvatlash maqsadida har oy mablag' ajratadi. Yaqinda «Albinos Yunayted» mamlakat uchinchi divizionida ishtirok etishga ruxsat oldi.
«Avliyo Jon Dif»
Ispaniyada har yili kar-soqovlar o'rtasida chempionat o'tkazib kelinadi. So'nggi uchta turnirda Angliyaning «Avliyo Jon Dif» klubi g'alaba qozondi. Garchi futbolchilarda tug'ma nuqson bo'lsada, bir-birlarini tushunish va ajoyib hamjihatlikni namoyish etishadi. «Oddiy futbolchilar bilan taqqoslaganda, shogirdlarimga nisbatan qiyinroq, - deydi bosh murabbiy Metyu Benk. - Karlar maydonda o'zaro suhbatlashish imkoniyatidan mosuvolar, shunga qaramay, hech qachon hakam bilan tortishishmaydi. Umuman, har bir o'yinimiz do'stona va iliq tarzda kechadi».
Vatikan termasi
Jahon miqyosida tan olingan davlatlardan biri - Vatikanning futbol bo'yicha milliy jamoasi FIFA a'zosi sanalmaydi. Mamlakat termasi shveytsariyalik gvardiyachilar, muzeychilar va albatta, ruhoniylardan tashkil topgan. Ular o'z tarixlarida to'rt marta xalqaro o'rtoqlik uchrashuvi o'tkazishgan bo'lsa, har gal raqib sifatida Monakoni tanlashgan. Italiyalik jurnalistlarning ta'kidlashlaricha, sobiq pontifik Ioann Pavel II o'smirligida ajoyib darvozabon bo'lgan, keyinchalik Genuya arxiepiskopligiga tayinlanganidan keyin TV orqali o'yinlarni sharhlagan. «Kelajakda Vatikan termasi ham yuksak darajada futbol o'ynab, «Roma» va «Inter»dan kam emasligini isbotlaydi», - deya o'z fikr­lari bilan o'rtoqlashdi Vatikan davlat kotibi, kardinal Tarchizio Bertone.
«Santa Klaus»
Ha, Finlyandiya uchinchi divizionida xuddi shunday nom bilan ataluvchi jamoa bor. Unda to'p suruvchi futbolchilar tanaffuslar paytida mahalliy bolakaylarning Santa Klausga yozgan maktublarini o'qib, ularda yozilgan istaklarni ro'yobga chiqarishga intilishadi. Klubda, hattoki, xayriyaga yo'naltirilgan maxsus xarajatlar bo'limi mavjud.
Davomi InterFUTBOL gazetasi blogida.
— deya xabar beradi uff.uz nashri.