Poytaxt viloyatining «Olmaliq» jamoasi futzal bo'yicha klublar o'rtasidagi Osiyo chempionatiga tayyorgarlikni boshladi. Aleksandr Petrov shogirdlari tog'li hududda mashg'ulot olib borishadi. Yig'in doirasida o'rtoqlik uchrashuvlari o'tkazilishi ham rejalashtirilgan.
Yaqinda Tailand poytaxti Bangkok shahrida Osiyo chempionatining final bosqichiga qur'a tashlanib, unga ko'ra, «Olmaliq»ning guruhdagi raqiblari ma'lum bo'lgandi. Qit'amizning eng kuchli 12 klubi 4ta guruhga bo'lingan holda bosh mukofot uchun kurash olib borishadi. O'zbekiston chempioni «B» guruhida musobaqaning amaldagi g'olibi - Eronning «Tasisat Daryoi» hamda Livanning «Al-Mayadin» klublariga qarshi bahs olib boradi. Guruhda dastlabki ikki o'rinni egallagan jamoalar chorak finalga yo'l olishadi. Osiyo chempionati 15-23 iyul kunlari Bangkokda bo'lib o'tadi. Biz nufuzli musobaqa oldidan «Olmaliq» sardori Rustam Umarovdan intervyu oldik.
- Rustam, qur'ani jamoadoshlaringiz bilan qanday qabul qildinglar?
- Guruhimizga kuchli raqiblar tushishdi. Livan va Eron futzali juda kuchli. Ichki chempionatda saviyasi yuqori jamoalar o'ynashadi. «Tasisat Daryoi» klubi Osiyo chempionatining amaldagi g'olibi hisoblanadi. Tabiiyki, ular o'z unvonlarini himoya qilishga urinadilar. Tan olish kerak, ikkinchi yo'llanma uchun Livan klubi bilan kurashamiz. Chorak final taqdiri «Al-Mayadin» bilan o'yinda hal bo'lsa, bundan ajablanmayman. Qolaversa, guruhdan chiqqan taqdirimizda ham bizni jiddiy raqiblar qarshi olishadi. «A» guruhida Tailandning «Chonburi Blyuveyv» hamda Yaponiyaning «Nagoya Oushens» klublari ikki yo'llanma uchun asosiy da'vogarlar hisoblanishadi. Avstraliyaning «Vik Vipers» jamoasi ham osonlikcha taslim bo'lmaydi. «Nagoya» va «Chonburi» klublar o'rtasidagi Osiyo chempionati finalida maydonga tushishgan. Demak, har ikki jamoa bu yilgi musobaqada g'oliblikka da'vogarlik qilishadi. Hali qit'a chempionati boshlanguncha ancha vaqt bor. Raqiblarni o'rganish, o'zimiz ham bevosita o'yinlarga tayyorgarlik ko'rishimiz uchun fursat etarli, deb o'ylayman.
- Demak, qur'a jamoangiz uchun omadsiz kelibdi-da?
- Xuddi shunday. Nafaqat biz, balki Tailand klubi ham xuddi shunday holatga tushdi. Mezbonlar o'z ishtiroklarini chorak finaldayoq to'xtatmaslik uchun guruhda yapon jamoasini ortda qoldirib, birinchi o'rinni egallashlari shart. Osiyoda futzal saviyasi oshyapti. Oldin Eron klublari qit'ada etakchilik qilishgan bo'lsa, bugunga kelib qolgan mamlakatlar jamoalari ham daraja bobida etakchilarga tenglashib olishdi. Endilikda hech bir g'alaba osonlikcha qo'lga kiritilmaydi.
- Osiyo chempionatiga tayyorgarlik rejasi ishlab chiqildimi?
- Mahalliy musobaqalar yakunlandi. Endi bor e'tibor Osiyo chempionati taraddudiga qaratiladi. Murabbiylar shtabi jamoamizga 10 iyungacha dam berishdi. Qisqa muddatli hordiqdan so'ng musobaqaga to'laqonli tayyorgarlik boshlanadi. Aynan 10 iyun kuni Toshkent viloyatining tog'li hududida o'quv-mashg'ulot yig'ini o'tkazish uchun yig'ilamiz. Bu erda asosan tiklanish va jismoniy tayyorgarlikka yo'naltirilgan mashg'ulotlar tashkil etiladi. Tailandga jo'nab ketish oldidan o'z bazamizda, ya'ni sport zalida shug'ullanamiz. Tabiiyki, o'rtoqlik uchrashuvlari o'tkazish ham rejalashtirilgan. O'z navbatida, tarkibda ba'zi o'zgarishlar ro'y berishi mumkin.
Davomi InterFUTBOL gazetasi blogida.
— deya xabar beradi uff.uz nashri.