22 oktyabr kuni Evropa Ligasi guruh bosqichining 3-tur o'yinlari bo'lib o'tdi va unda O'zbekiston milliy terma jamoasi a'zolari ham ishtirok etdi.
O'zbekiston milliy terma jamoasi yarim himoyachisi Odil Ahmedov faoliyat olib boradigan Rossiyaning “Krasnodar” klubi Gretsiyaning PAOK jamoasi maydoniga safar qilib, durang natija qayd etdi. Uchrashuvda hisob ochilmadi va jamoalarning har biri ochkolari sonini bittaga oshirib oldi. Ahmedov uchrashuvda 65 daqiqa davomida harakat qildi.
“Krasnodar” ushbu durangdan keyin 4 ochko bilan guruhda ikkinchi o'rinda bormoqda. “S” guruhi peshqadami esa Dortmundning “Borussiya” jamoasi. Nemis jamoasi hisobida 7 ochko bor.
Moskvaning “Lokomotiv” klubida faoliyat olib borayotgan Vitaliy Denisov esa jamoasining “Beshiktosh”ga qarshi uchrashuvida maydonga tushib, o'yini to'liq o'tkazdi. “Lokomotiv” turk jamoasi bilan o'yinda 1:1 hisobida durang o'ynadi. O'tkazilgan 3 o'yindan keyin Moskva jamoasi hisobida 7 ochko bor va ular guruhda birinchi o'rinni egallab turibdi.
Evropa Ligasi guruh bosqichining navbatdagi tur o'yinlari 5 noyabr kuni bo'lib o'tadi.
Shuningdek, Qatar Yulduzlar Ligasining "Al-Jaish" klubi sharafini himoya qilayotgan O'zbekiston milliy terma jamoasi yarim himoyachisi Sardor Rashidov mahalliy chempionatning 6-turida "Laxviya"ga qarshi o'yinda maydonga tushib, 54 daqiqa harakat qildi. O'yin "Al-Jaish"ning 2:0 hisobidagi g'alabasi bilan yakunlandi. Rashidovning jamoasi ayni vaqtda chempionatning 2-o'rinida bormoqda.
— deya xabar beradi uff.uz nashri.