Bugun Osiyo Chempionlar Ligasi 1|8 final bosqichi javob uchrashuvlariga start beriladi. Turnirda ishtirokini davom ettirayotgan yagona jamoamiz - «Lokomotiv» poytaxtimizdagi o'yin orqali chorak final yo'llanmasini olishga urinib ko'radi.
«Temiryo'lchilar» raqibi ancha jiddiy - Saudiya Arabis­tonining eng sovrindor klublaridan biri «Al-Hilol». Bu ikki jamoaning bir hafta avval Ar-Riyod shahrida o'tkazilgan ilk o'yinida hisob ochilmagandi. Bugun esa jamoalardan birining ko'chasida bayram bo'lishi aniq. Ana shu shodlik onlari «Lokomotiv»ga nasib etishini chin dildan istaymiz. «Bunyodkor» stadionida kechadigan uchrashuvni FIFA referisi Benjamin Uilyams boshchiligidagi avstraliya­lik hakamlar brigadasi boshqarib boradi.
Bugungi bahs ikki raqibning hisob bo'yicha o'zaro 4-to'qnashuvi sifatida tarixga muhrlanadi. Ular o'tgan yilgi OChL guruh bosqichida ham bir-birlariga ro'baro' kelishgandi. Lekin har ikki o'yinda «Al-Hilol» jamoasi zafar quchgandi. Umid qilamizki, «Lokomotiv» ushbu noxush an'anaga nihoyat, chek qo'yib, «Hilol»ni ilk marta engadi. Bo'lajak uchrashuvga qiziqish yuqoriligini nazarda tutib, yakshanba kuni «Lokomotiv» vitse-sardori Server Jeparovdan eksklyuziv intervyu oldik.
- «Loko» seshanba oqshomida o'tkaziladigan «Al-Hilol» bilan o'yin­ga qanday tayyorgarlik ko'ryapti? Odatdagidekmi yoki..?
- Tabiiyki, o'ta jiddiy tarzda tayyorgarlik ko'ryapmiz. Raqib juda-juda kuchli. Qolaversa, biz OChL «pley-off» bosqichidagi o'yinda maydonga tushamiz. O'rtaga chorak final chiptasi qo'yilgan. Shunday ekan, bizdan alohida va jiddiy yondashuv talab etiladi.
- Ar-Riyoddagi ilk o'yin haqida nima deya olasiz? Uning vaziyatlarini tahlil qildinglarmi?
- Sir emas, issiq ob-havo sharoitida o'ynash oson emas. Shunga qaramay, yigitlar yaxshi o'yin namoyish etishdi. Ta'bir joiz bo'lsa, xarakter ko'rsatishdi.
- Biroq hisob ochilmadi. Ayting­chi, 0:0 javob uchrashuvi oldidan yaxshi natijami?
- Hisob  biz uchun yaxshi yoki aksincha ekanligini aynan hozir aytish noo'rin. Agar keyingi bosqichga chiqsakkina safarda kerakli natijaga erishgan hisoblanamiz. Har qanday holatda ham, maydonga faqat g'alabani ko'zlab tushamiz. Zero, boshqa natija bizni chorak finalga olib chiqolmaydi.
- Siz Saudiya Arabistonining «Al-Shabab» klubida ham to'p surgansiz. O'tgan vaqt bilan taqqoslaganda, u erda nimalar o'zgaribdi?
- Nafaqat o'ynaganman, balki chempion ham bo'lganman (kuladi). Lekin bu safargi tashrif bor-yo'g'i 2 kunga cho'zildi. Xullas, qisqa fursat ichida biror tayinli o'zgarishni payqamadim.
- Balki safar chog'i eski tanishlaringizni uchratgandirsiz...
- Faqat sobiq tarjimonim bilan ko'rishdim. O'zaro biroz  gaplashdik ham.
- Seshanba kuni jamoangiz o'zining jonajon stadionida o'ynamaydi. «Bun­yodkor»da o'tkaziladigan o'yin sizlarga noqulayliklar keltirib chiqarmaydimi?
- Fakt shuki, raqibni Toshkentda qabul qilamiz. Shu kuni bizni nafaqat poytaxtliklar, balki viloyatlardagi muxlislar ham chin yurakdan qo'llasalar kerak. Shuni unutmagan holda maydonga tushishimiz kerak. Menimcha, stadionning farqi yo'q.
- G'olib penaltilar seriyasida aniqlanishi ham mumkin. Bunga tayyormisizlar?
- Yo'llanma  taqdirini asosiy vaqt­da hal qilsak yaxshiroq bo'lardi. Lekin ish mabodo penaltilar seriyasigacha etib borsa, bunga ham tayyormiz. Bilasiz, OChL qit'mizning klublar miqyosidagi eng nufuzli musobaqasi hisoblanadi. Unda «pley-off»ga etib kelgan har bir jamoa g'olib chiqib, kubokni qo'lga kiritishni xohlaydi. Xususan, bizda ham, «Al-Hilol»da ham shunday istak bor.
- Shaxsan siz uchun bu yilgi OChL qanday ahamiyatga ega?
- «Lokomotiv» ilk bor guruhdan chiqdi. Shuning o'ziyoq katta ahamiyat kasb etadi. Endi yurishni davom ettirishimiz kerak. Shundagina ahamiyati oshib boraveradi.
Davomi InterFUTBOL gazetasi blogida.
— deya xabar beradi uff.uz nashri.