Milandagi «San-Siro» stadioni navbatdagi derbiga tayyorgarlik ko'rmoqda. Faqat bu safar maydonda «Milan» va «Inter» emas, balki «Real» va «Atletiko» saf tortishadi. Mazkur bahs o'zining ayrim jihatlari orqali muxlislar e'tiborini o'ziga tortishi mumkin. Quyida beriladigan 7ta fakt aynan Madridning ikki klubi to'qnashuvi bilan bog'liq.
1. 275 marta yuzma-yuz
«Real» va «Atletiko» o'rtasidagi dastlabki bahs uzoq 1928 yili bo'lib o'tgan. O'shanda Ispaniya kubogida «Qirollik klubi» 3:0 hisobida g'alaba qozongan. Shundan so'ng jamoalar 275 marta kuch sinashishdi: 145ta o'yinda «qaymoqranglilar», 69tasida esa «matraschilar» zafar quchishgan, qolgan 61ta uchrashuv durang bilan xotima topgan. To'plar nisbati - 494-356, «Real» foydasiga. Oxirgi marta bu klublar joriy yilning fevralida o'zaro to'qnash kelishdi. Primero 26-turida «Atletiko» «Santyago Bernabeu»dan 1:0 hisobidagi g'alaba bilan qaytdi.
2. To'purarlar
Madrid derbisining eng yaxshi to'purarlari sifatida Alfredo di Stefano va Santyago Bernabeu tilga olinadi. «Real» sharafini himoya qilgan bu futbolchilar «Atletiko» darvozasini 17 martadan ishg'ol qilishgan. Bernabeu mazkur natijani 19ta o'yin davomida qayd etgan bo'lsa, di Stefanoga buning uchun 26ta uchrashuv o'tkazish talab etilgan. «Atletiko»dan esa bunday sharafga Pako Kampos erishgan. Uning hisobida 12ta gol bor. Hozir to'p surayotgan futbolchilar orasida esa Krishtianu Ronaldu «Poytaxt derbisi»ning eng yaxshi to'purari bo'lib turibdi. Portugaliyalik yulduz «matraschilar»ga qarshi kechgan bahslarning 21tasida maydonga tushib, 15ta gol urgan.
3. Uch yilda ikkinchi marta
2014 yili Lissabonda o'tkazilgan EChL finalida Madridning aynan shu ikki jamoasi bahs yuritishgan, asosiy vaqt 1:1 hisobida yakunlangach, g'olib nomini aniqlash maqsadida hakamlar qo'shimcha bo'limlarga murojaat etishgandi. O'shanda «Real» Kurtua qo'riqlayotgan darvozani yana uch marta ishg'ol qilib, sovrinni o'ziniki qilgandi. Shuningdek, bu klublar Ispaniya kubogi (yoki Ispaniya liga kubogi) finalida ham olti marta to'qnash kelishgan. Mazkur qarama-qarshiliklarda to'rt marta «Atletiko» zafar quchgan.
4. «Atletiko»da mudofaa... «Real»da hujum...
Garchi Chempionlar Ligasining hal qiluvchi bahsida bir mamlakat, bir shahar sharafini himoya qiladigan jamoalar ishtirok etishsada, ularning uslubi butunlay bir-biridan farq qiladi. «Atletiko» himoyaviy taktika tarafdori. Hozirga kelib, Simeone shogirdlari chempionatda eng kam to'p o'tkazib yuborishgan - 16ta gol («Real»da bu ko'rsatkich ikki baravar ko'pni tashkil etadi). O'z navbatida, la-ligada raqiblar darvozasini eng ko'p ishg'ol qilish bo'yicha «Qirollik klubi»ga teng keladigani yo'q - 105ta gol («Atletiko»da - 60ta).
5. Noqulay raqib
Diego Simeone «Atletiko» bosh­qaruviga kelgach, «Real»ga eng ko'p tashvishni aynan shu jamoa tug'dirishi odat tusiga kirdi. Bunga ishonish qiyin, ammo statistika shuni tasdiqlamoqda: butun 90 daqiqa hisobga olinganda, so'nggi 12ta bahs(barcha turnirlar hisobga olingan)ning atigi bittasida «Real» «matraschilar»dan ustun kelgan. Mayli, EChL-2014 finalining qo'shimcha daqiqalarida qo'lga kiritilgan g'alabani ham hisobladik, deylik. Baribir, so'nggi 12ta o'yinning faqat 2tasini «qaymoqrang­lilar» hisobiga yozish mumkin bo'ladi.
Davomi Akmal Eshonxonov blogida.
— deya xabar beradi uff.uz nashri.