Qo'yilgan nomning ta'siri
Inson hayotida ism katta o'rin tutadi, deyishadi. Futbolda ham shunday ekan. Bizning poezd “pish-pish” qilganicha tezlikni olib, o'zi uchun tarixiy stantsiyaga etib oldi. Ishoning, hali bu boshlanishi... Kuni bilan - “Al-Hiloldan cho'chish kerak!” degan ishqibozlar bilan tortishib yurdim. Ularga Vadim Abramovning «Arab jamoalariga qarshi o'yinlarda O'zbekiston hech qachon qiynalmasligi kerak. Bu jamoalardan biz bir bosh ustunmiz» degan so'zlarini qayta-qayta takrorladim. Hayriyatki, “Loko” yuzimni yorug' qildi.
“Lokomotiv”cha o'yin uslubi
Ha, jamoada aniq maqsad yo'lidagi kiroyi uslub shakllanibdi. Klubda tajribali futbolchilar bilan bir vaqtda yosh shijoatli o'yinchilardan foydalanish a'lo darajada. Raqibni o'z hududidayoq bosim ostiga olish, oldindan o'ylangan kombinatsiyalarni shoshilmay ishonchli amalga oshirish, 90 daqiqa bor kuch bilan o'ynashga etarli jismoniy tayyorgarlik... Bularni bari -“Loko”da zo'r ish berganiga guvohmiz. Ayniqsa, standart vaziyatlardan samarali foydalanish foizi bizni quvontirdi. Jeparov, bejiz qit'ada eng zo'r bo'lmaganligini yana bir bor isbotladi. Timur Kopadze va Ignatiy Nesterov temiryo'lchilar orkestriga yaxshigina dirijyor vazifasini o'tashyapti. Yosh futbolchilar esa ko'z tegmasin yomon emas. So'ngi daqiqalargacha bor kuchini berib o'ynash “Loko”ning uslubi desam adashmagan bo'laman.
Buyog'iga ham omad
Dunyodagi eng tezyurar temir yo'l lokomotivi 1993 yili soatiga 271 km tezlikka chiqib, Ginnes kitobidan joy olgan ekan. Lekin,  u ham bu qadar shiddatga ancha yo'l bosib tezlab olgach so'ng erishgan. Nasib qilib, temiryo'lchilar keyingi bosqichga chiqishdi. Agar, jamoamiz finalga chiqsa ularni – “Uchar Loko” deb atashni taklif qilaman.   Buyog'iga poezdimizni yo'li ravon bo'lsin! Elmurod ERMATOV, Andijon
— deya xabar beradi uff.uz nashri.