2015 yilning 23 oktyabr – 1 noyabr kunlari Shotlandiyaning Glazgo shahrida sport gimnastikasi bo'yicha jahon chempionati bahslari o'tkaziladi.
“The SSE Hydro” sport saroyida o'tkaziladigan mazkur yirik musobaqada dunyoning bugungi kundagi eng kuchli sport gimnastikachilari aniqlanishi bilan birga, 2016 yili Rio-de-Janeyro shahri (Braziliya)da o'tkaziladigan XXXI yozgi Olimpiada o'yinlariga yo'llanma olgan sportchilar nomi ham ma'lum bo'ladi (sovrindorlar “Rio-2016” o'yinlari yo'llanmasiga ega bo'ladi).
Jahon chempionatida Vatanimiz sharafini Olimpiada o'yinlarining g'olib va sovrindorlari Oksana Chusovitina va Anton Fokin kabi tajribali sportchilarimiz bilan birga, qator xalqaro musobaqalarda sovrindor bo'lgan Dilnoza Abdusalimova, Elena Rega, Timur Qodirov hamda Eduard Shaulovlar himoya qilishadi (murabbiylar: Elvira Rakova, Nikolay Pak).
Ushbu dunyo birinchiligida, shuningdek, Lyudmila Li va Svetlana Svyatskaya kabi yurtdoshlarimiz hakamlar brigadasidan o'rin egallashgan.
Jahon chempionatida sportchilar alohida snaryadlarda, ko'pkurash va jamoaviy bahslarda o'z mahoratlarini namoyish etadilar. 23-26 oktyabr kunlari saralash bahslari o'tkazilsa, 27 oktyabrdan hal qiluvchi final musobaqalari boshlanadi.
Jumladan, 27-28 oktyabr kunlari jamoaviy musobaqalar bo'lib o'tsa, 29-30 oktyabrda ko'pkurash bo'yicha, 31 oktyabr – 1 noyabr kunlari esa alohida snaryadlarda final musobaqalar o'tkaziladi.
Ma'lumot uchun. Sport gimnastikasi bo'yicha jahon chempionati 1903 yildan buyon o'tkazilib kelinadi. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.