Xabaringiz bor, shu yilning 10 iyun kuni Frantsiyada futbol bo'yicha Evropa chempionati bahslari start oladi.
"Evro-2016" uchrashuvlarini O'zbekiston bo'ylab translyatsiya qilishning eksklyuziv huquqiga ega bo'lgan “UzReport TV” telekanali ana shu musobaqa oldidan yurtimizda futbolni ommaviy namoyish qiluvchi bir qator restoran, kafe va barlar vakillari bilan uchrashuv o'tkazdi.
Uchrashuvdan ko'zlangan asosiy maqsad Evro-2016 musobaqasi paytida o'zaro manfaatli hamkorlik dasturini yo'lga qo'yish bo'yicha kelishuvga erishishdan iborat bo'ldi.
Ma'lumot uchun, “UzReport TV” telekanali Evro-2016 musobaqasining barcha 51ta uchrashuvini namoyish qiladi. Shulardan 45tasi to'g'ridan-to'g'ri efirda namoyish etilsa, 3-turning parallel ravishda o'tadigan 6ta o'yini yozib olingan holda efirga uzatiladi. Bundan tashqari, 7ta pley-off uchrashuvlari (1/4, 1/2 va final) “UzReport TV” telekanalida takroran ham namoyish etiladi.
Restoratorlar bilan o'tkazilgan uchrashuvda dastlab “UzReport TV” telekanali rahbariyati so'z olib, O'zbekiston hududida Evro-2016 o'yinlaring eksklyuziv translyatsiyasi huquqiga egalik qiluvchi tomon sifatida, Evropa chempionati bahslarini restoran, kafe va barlarda ommaviy namoyish etish bepul ekanini e'lon qildi.
Bundan tashqari, musobaqa vaqtida “UzReport TV” telekanali bilan o'zaro hamkorlikni yo'lga qo'yib, Evro-2016 bahslarini ushbu telekanal orqali namoyish etadigan restoran, kafe va barlarni informatsion qo'llab-quvvatlash bo'yicha sa'y-harakatlar amalga oshirilishi haqida gap bordi.
Jumladan, o'sha restoran va kafelarning nomi va manzili “UzReport TV” telekanali tomonidan “Evro-2016”ga bag'ishlab maxsus chop etiladigan, futbol bo'yicha Evropa chempionati o'yinlarining taqvimi joylashtirilgan bukletlarda ko'rsatib o'tiladi. Ushbu bukletlar yurtimizdagi “Korzinka” savdo tarmog'i orqali hamda “UzReport TV” bilan hamkorlikni yo'lga qo'ygan muassaslarga tashrif buyuruvchilarga bepul tarqatiladi.
Shuningdek, futbol muxlislari Evro-2016 o'yinlarini o'sha restoran, kafe va barlarda qay tarzda tomosha qilishayotgani, tomosha qilish jarayonidagi ishqibozlarning his-hayajonlari, golni nishonlash paytidagi quvonch va shodliklari aks etgan videoreportajlar tayyorlanib, ushbu videoreportajlar musobaqa vaqtida bir oy davomida “UzReport TV” telkanalida namoyish etiladi.
Bundan tashqari, Evro-2016 bo'yicha “UzReport TV” bilan hamkorlik qilayotgan restoran va kafelarning nomlari o'yinlarning qisqacha sharhiga bag'ishlangan maxsus “Xaylayts” dasturlarida ekran ostidagi yozuvlarda aks etishi ham ko'zda tutilgan.
O'z o'rnida yig'ilishda qatnashgan restoratorlar ham bunday taklifdan juda xursand ekanliklarini, futbol uchrashuvlarini qonuniy translyatsiyalar orqali tomosha qilishni qo'llab-quvvatlashlarini ma'lum qilishdi.
«Ushbu hamkorlik dasturimiz har tomonlama manfaatli va qiziqarli bo'lishiga umid qilib qolamiz. “Evro-2016” uchrashuvlarini ommaviy namoyish etishni rejalashtirayotgan boshqa muassasa vakillarini ham biz bilan hamkorlik qilishga chorlab qolamiz» - deya uchrashuvni ko'tarinki ruhda yakunlashdi «UZREPORT TV» telekanali vakillari. UzReportTV blogidan olindi.
— deya xabar beradi uff.uz nashri.