Ibtidoning intihosi muqarrar. Evropa mamalakatlari birinchiliklari birin-ketin nihoyasiga etib bormoqda. Mavsum davomida qayd etilgan qiziqarli bellashuvlarni ko'pincha futbol spektakllariga qiyoslashadi. Football.HD.ru ijodkorlari, mana ikki yildirki, bu tasnifga zamonaviy ruh bag'ishlab, kinematograf ko'rinishida g'olib va sovrindorlarni o'z futbol «Oskar»lari bilan taqdirlamoqdalar. Taqdirlash marosimini Italiya «A» seriyasidan boshlaymiz. Eng yaxshi film: «Yuventus» Turin superklubi qatorasiga beshincha marta chempionatda g'olib chiqib, haqli ravishda mazkur mukofotga loyiq ko'rildi. Joriy mavsum stsenariysi dramatik tabiati bilan musobaqaga o'zgacha fayz kiritdi: «Keksa sinora» nafaqat yuksak mahorat, balki metindek mustahkam iroda sohibi ekanligini ham namoyish etdi. Vaholanki, startni jamoa o'ta qoniqarsiz boshlab, Neapol, Rim, Florentsiya va Milandagi muxlislar ko'nglida umid uchqunlarini yoqqandi. Neapolliklar oxirigacha kurashdilar, lekin hal qiluvchi bosqichda «Yuve»ning shiddatiga dosh berolmadilar. Turinliklar tomonidan bitilgan stsenariy 90-yillardagi jangovar filmni eslatadi. Eng yaxshi aktyor: Paulo Dibala («Yuventus») Mazkur nominatsiya g'olibi an'anaga ko'ra, skudettoni qo'lga kiritgan jamoa vakili orasidan tanlab olinishi avvaldan ma'lum edi. Biroq biz Dibala bilan Pogbadan ustunlikni kimga berish borasida jiddiy qiyinchiliklarga duch keldik. Nihoyat, Argentina vakilini g'oliblikka munosib ko'rdik. Frantsiyalik jamoadoshidan farqli o'laroq, Paulo «Yuve» uchun o'ta omadsiz kechgan dastlabki bellashuvlarda ham ishonchli harakat qildi. Umuman, Dibala top-klubdagi debyut mavsumini sermahsul o'tkazdi. «Yuve» kichik hisobda g'alaba qozongan o'yinlarda Pauloning gollari jamoa g'aznasini 10 ochkoga boyitdi. Bundan tashqari, hujumchi olti marta aynan g'alaba to'plariga mualliflik qildi, har 91 daqiqada samarali harakatni amalga oshirdi. Dibala «A» seriyasidagi hujumkor futbolchilarga ajratilgan bir qator nominatsiyalarda etakchi, Italiya futbolchilar kasaba uyushmasi tomonidan ta'sis etilgan «Yilning eng yaxshi o'yinchisi» sovrini uchun Pogbaning yagona raqobatchisi aynan u bo'lsa, ajabmas. Ikkinchi darajali rollarning eng yaxshi aktyori: Rikkardo Saponora («Empoli») Mazkur janr qoidalariga ko'ra, voqealar echimini bosh qahramonlar ochib beradilar, 2-darajali ijrochilar esa biroz chetda qolishadi. Ularning xizmatlarini e'tiborsiz qoldirish adolatdan emas. «Empoli»ning eng samarali o'yinchisi oraliq marragacha Evropaning eng sara pleymeykerlari qatorida keldi. Maydonni yaxshi ko'ra olish qobiliyati hamda yorqin driblingi uni serialning birinchi yarmi qahramoniga aylantirdi. Lekin bahorda Saponara tezlikni biroz pasaytirdi va samarali uzatmalar bo'yicha Pol Pogbani oldinga o'tkazib yubordi. Ehtimol, tez orada top-klubga o'tish unga xalal bergandir. Nima bo'lganda ham, Rikkardoning o'yinlari mavsumga alohida jilo berdi. Eng yaxshi rejissyor: Massimiliano Allegri («Yuventus») Allenator ikkinchi mavsum sindromi xastaligiga chalinganligini ishonchli tarzda isbotlab, «Milan»dagi omadsizlik u tufayli emas, balki jamoa bilan bog'liq ekanligini ko'rsatib qo'ydi. Albatta, «keksa sinora»ni jangovar holatga qaytarish murabbiy uchun oson bo'lmadi. Bir yo'la Vidal, Pirlo va Tevesdan judo bo'lgan klub musobaqa jarayonida o'zining Livornodagi taktik ishlanmalaridan unumli foydalandi. «Yuventus»ning ChL guruh bosqichi va «Bavariya»ga qarshi bahslarda namoyish etgan qudrati shundan dalolat beradiki, skudetto sohibi har qanday vaziyatda ham jahonning 5 nafar eng kuchli klublari safidan joy olishga haqli. Eng yaxshi debyut: Janluiji Donnarumma («Milan») Bu darvozabon nomdoshining o'rnini egallash yo'lida tinmay olg'a intilmoqda. Kuzda kichik Janluiji «A» seriyasi tarixidagi eng yosh darvozabonga aylanib, Buffonning bitta rekordini yo'qqa chiqardi. O'shanda u 17ga ham chiqmagandi. Bo'yi uzun yigitcha «Milan»ning asosiy tarkibidan mustahkam joy olib, har bir uchrashuvda o'rtacha 2,7ta «seyv»ni amalga oshirdi. Uning chaqqonligiga anchayin tajribali posbonlar ham havas qilsalar, arziydi. Davomi InterFUTBOL gazetasi blogida
— deya xabar beradi uff.uz nashri.