Avval xabar berib o'tganimizdek, 30 may kuni Oliy liga 10-turida Toshkentning “Lokomotiv” klubi Qo'qonda “Qo'qon-1912” mehmoni bo'ladi. Ushbu jamoalarning o'zaro o'yinlari haqida ma'lumot berib o'tamiz.
O'zaro o'yinlar
“Lokomotiv” va “Qo'qon-1912” klublari bundan oldin oliy ligada faqat ikki marta to'qnash kelishgan. Ushbu o'yin 2015 yilda bo'lib o'tgan. Toshkentdagi “Lokomotiv” stadionida bo'lib o'tgan uchrashuvda Temurxo'ja Abduxoliqovning urgan yagona goli o'yin taqdirini hal qilgandi – 1:0.
Qo'qonda o'tkazilgan bahsda esa 2:2 hisob qayd etilgan. O'sha o'yinda Otabek Haydarov dublga erishgan. Hozirgacha o'tkazilgan o'yinlarda “Loko” to'rt ochkoni qo'lga kiritgan bo'lsa, jamoamiz hisobida bitta ochko mavjud. To'plar nisbati – 3:2 “Loko” foydasiga.
Hakamlar
Oliy liga 10-tur uchrashuvlarini boshqarib boradigan hakamlar ma'lum bo'ldi. Unga ko'ra, 30 may kuni Qo'qondagi “Markaziy” o'yingohda bo'lib o'tadigan “Qo'qon-1912” – “Lokomotiv” uchrashuvi Sherzod Qosimov boshchiligidagi hakamlarga topshirildi.
Sherzod Qosimov o'tgan mavsumda jamoamiz ishtirokidagi ikkita uchrashuvni boshqargan.
Oliy liga
10-tur
«Qo'qon-1912» (Qo'qon) – «Lokomotiv» (Toshkent)
Hakamlar: Sh. Qosimov (Toshkent), N. Ro'zimov (Toshkent), O. Jumaev (Navoiy), D. Akmalov (Toshkent)
Nazoratchi: O. Dachev (Toshkent).
O'zPFL vakili: N. Lutfullin.
Boshlanish vaqtlari
Mazkur uchrashuv 30 may kuni soat 17:30da boshlanish rejalashtirilgan. O'rinbosarlar bahsi esa 29 may kuni soat 17:00da boshlanadi. Barcha futbol muxlislarni stadionga chorlab qolamiz.
— deya xabar beradi uff.uz nashri.