Osiyo chempionlar ligasining nimchorak finalida “Al Hilol”ni musobaqadan chiqarib yuborgan “Lokomotiv” endi bor e'tiborini oliy ligaga qaratadi. Jamoamiz 30 may kuni safarda “Qo'qon-1912″ga qarshi maydonga tushadi.
Jamoamiz mazkur bahsga tayyorgarlikni bugundan boshlaydi. “Lokomotiv” ayni paytda 25 ochko bilan oliy liga turnir jadvalida birinchi o'rinni egallab turibdi. “Qo'qon-1912″ hisobida esa hozircha 6 ochko mavjud va bu jamoa 14-o'rinda bormoqda.
“Lokomotiv” shuningdek, bu yilgi oliy ligada hali mag'lubiyatga uchramagan ikkita jamoadan biri bo'lib turibdi. Xuddi “Loko” singari “Bunyodkor” ham yutqazmagan. “Qo'qon-1912″ga kelsak, bu jamoa oxirgi oltita o'yinda mag'lub bo'ldi.
Shunga qaramay, qo'qonliklardan ehtiyot bo'lish kerak. “Lokomotiv” o'tgan yil Qo'qonda kechgan uchrashuvni hali unutgani yo'q. O'shanda jamoamiz 2:0 hisobida oldinda borayotib, yakunda durang o'ynagandi. Shunday ekan, oliy ligadagi har bir raqib bilan ehtiyot bo'lib o'ynashga to'g'ri keladi.
“Qo'qon-1912″ – “Lokomotiv” bahsini Sherzod Qosimov boshqarib boradi. Unga qanotlarda Nabi Ro'zimov bilan Obid Jumaev ko'mak berishadi. Sobiq hakam Oleg Dachev nazoratchi vazifasini bajaradi.
— deya xabar beradi uff.uz nashri.