Birinchi Liganing 11-turida "NBU-Osiyo" jamoasi safarda "Lokomotiv-BFK"ga qarshi bahs yuritdi. Qiziqarli kechgan o'yinda tomonlar 2:2 hisobida durang natija qayd etishdi. Uchrashuv poyoniga etganidan so'ng "bankirlar" ustozi Rufat Akramxo'jaev UFF.uz internet portaliga o'z fikrlarini bildirib o'tdi.
- Bellashuv qiziqarli kechdi, - deb gap boshladi Akramxo'jev. O'tkazib yuborilgan gollar himoyachilarimizning ishonchsiz harakatlari sabab yuzaga keldi. Birinchisida markaziy himoyachilar katta xato qilgan bo'lsa, ikkinchisida darvozabonimiz kutmagan holatda kiritildi. Hisobni tenglashtirgan bo'lsak-da, g'alaba qozonishimiz uchun omad etishmadi. Bir qator vaziyatlar yuzaga kelganiga qaramay, ulardan foydalana olmadik.
- Umuman olganda, jamoangizni barqaror o'yin ko'rsatishiga nima to'siq bo'lyapti?
- Tarkib yoshlar bilan shakllanganligi sababli, natija ko'rsatishga qiynalmoqdamiz. Rosti, tajriba etishmayapti. Bilasizmi, bu yilgi mavsumdagi tarkib "NBU-Osiyo" tarixidagi eng yoshi hisoblanadi. O'zim ham futbolchi sifatida to'p surgan vaqtimda bunchalik yoshlar bo'lmagandi. Shu ham sabab bo'lmoqda.
— deya xabar beradi uff.uz nashri.