Yakub Blashikovskini tanimagan futbol muxlisi bugungi kunda oramizda topilmasa kerak. Uning hayoti bilan yaxshi tanish bo'lmagan kishilarga Kuba juda baxtiyor inson bo'lib tuyulsa, ajabmas. Aslida esa, sira ham unday emas. Blashikovskining bolaligi qanday o'tgani, u hayoti davomida qanday mashaqqatlarga duch kelganini bilishni istasangiz, quyidagi maqolani oxirigacha mutolaa qiling. Yakub ettinchi sinfda o'qib yurgan vaqtida sud oldida javob berishiga to'g'ri keldi. Bunga sabab bo'lgan voqeaning qisqacha bayoni quyidagicha: o'rtog'i bilan tanaffusda garov bog'lashib, kubik o'ynashadi. O'rtaga esa rezina saqich va 20 groshdan iborat dov tikilgandi. Garovni Kuba yutib oladi, ammo o'rtog'i buni g'irromlikka yo'yadi. Ana undan keyin o'rtada janjal chiqib, Yakub nomard o'rtog'ini do'pposladi. Oqibatda, jabrlanuvchining onasi politsiyaga arz qiladi. Maktab direktori esa ayolni qo'llab-quvvatladi. Xayriyatki, sudya anchagina tushungan odam bo'lib chiqib, bolalar o'rtasida uchraydigan odatiy holatga kengroq qaradi va kattalarni «pashshadan fil yasamaslik»ka chaqirib, Yakubni jarima bilan jazoladi, xolos. Buvisining puli evaziga noxushlik o'tib ketdi. 16 yoshga to'lganida, oshnalari bilan ko'chada ketayotib, oddiy holatda to'palon chiqardi va 28 yoshli erkakni rosa savaladi. Yakub-ku, raqibidan ustun keldi, ammo uning do'sti Radek janjal vaqtida jarohat olib, miya chayqalishi tashxisi bilan kasalxonada ikki hafta davolanib chiqdi. Eng yomoni, mazkur voqeadan keyin bechora Radek gapirish va ko'rish qobiliyatlarini sezilarli darajada pasaytirib oldi. 90-yillar oxirida Kuba tog'asi - Polsha terma jamoasining sardori Eji Bjechekning yordami bilan anchagina taniqli bo'lgan «Gurnik» klubi maktab-internatiga qabul qilindi. Lekin u erdagi qiziqarli hayot atigi uch oy davom etdi, xolos. Keyin Kuba internat qochib ketdi. Chunki maktabning yuqori sinf o'quvchilari doim kichik gavdali Kubaning pullarini tortib olishar, kechalari unga uyqu bermay, mazax qilishardi. Shu bois, Kuba Chenstoxova shahriga qaytib, 16 yoshida to'rtinchi ligadagi klub safida o'ynay boshladi. Tabiiyki, uning hamma yaqinlari bundan norozi bo'lishdi. Ayniqsa, Yakubning akasi David o'zini qo'yarga joy topolmay qoldi: «Qanday qilib to'rtinchi ligada o'ynash uchun «Gurnik»dek jamoani tashlab ketish mumkin-a?!». Kuba jarohat tufayli futboldan ketgan akasidan farqli ravishda, juda sho'x, o'yinqaroq edi. Masalan, Blashikovskilar oilasi qurib bitkazilayotgan yangi uyga ko'chib o'tgan vaqtlarida Kuba balkondan pastga, ag'darib qo'­yilgan bir uyum qum ustiga sakraydi va peshonasi bilan erga qattiq urilib, boshi yoriladi. Bolakay kattalarning tanbehidan qo'rqib, bir chetga yashirinib oladi va qon to'xtashini kutadi. Jarohat esa o'zidan asorat qoldiradi. Ko'z ustidagi bu chandiq haliyam sezilib turadi. Yakub sakkiz yoshga to'lganida, shisha sinig'i ustiga yiqilib, tizzasidan pastrog'ini kesib oladi. Ertasiga esa uni futbol maktabidagi birinchi mashg'ulot kutayotgandi. Yaxshiyamki, bint bilan bog'langan jarohat mashqlarda bolakayga xalal bermadi. 14 yoshga to'lganida esa, uydan qochib ketadi. Zero, u futbol o'ynashni ham, umuman, yashashni ham istamasdi. Mayli, bu haqda keyinroq.. Xullas, ana shunday betayin va kulguli sarguzashtlar bilan «Gurnik»dan qochib ketgach, bir muddat to'rtinchi ligada to'p suradi. Keyin Avstriyaga yo'l oladi. Jonkuyar tog'a (Eji Bjichek) uni o'zi bir vaqtlar o'ynagan «Tirole» klubiga joylaydi. Biroq Kuba ilk mash­g'ulotdayoq ko'rikdan o'ta olmaydi. Chunki u safar oldidan tizzasini shikastlab olgan, ammo bu haqda hech kimga indamagandi. Shundan so'ng o'ziga xos kasting boshlanadi: Kuba «Belxatuva» murabbiylariga yoqmaydi, «Lexa»da esa maosh borasida kelisha olishmaydi. Sarson-sargardonlik tog'aning ham joniga tekkach, so'nggi chorani ishga solib, yaqin do'sti, Krakovning «Visla» klubi sport direktori Gjegosh Milcharskiga qo'ng'iroq qiladi: «Uni o'smirlar terma jamoasiga chaqirishgan. Sen ham bir ko'r-chi!». Sinab ko'rishsa, yosh futbolchi chakki emas. Lekin shu erda ham «Lexa»da bo'lgani kabi, maoshga bog'liq muammo chiqadi: - Eji, menda shunday taassurot paydo bo'lyaptiki, biz xuddi biron-bir yulduzning maoshi haqida gaplashayotgandekmiz, - dedi «Visla» prezidenti Kubaning tog'asiga. - Lekin u maoshining yarmidan ko'pini soliqqa, kvartiraga, ovqatiga sarflaydi. - Bo'pti, mavsumdagi o'yinlarning yarmidan ko'pida maydonga tushsa, bonus oladi. - Faqat buning yoniga termadagi besh o'yin uchun beriladigan bonusni ham qo'shing. - Nima, qanaqa terma jamoa? - hayron bo'ladi prezident. Atrofdagilar esa kulib yuborishadi. To'g'ri-da, tanish-bilishchilik qilib, zo'rg'a klubga joylangan futbolchi qanday qilib terma jamoaga chaqiriladi?! O'sha vaqtlari «Visla»da mamlakat terma jamoasining etti futbolchisi to'p surardi. Lekin Kuba shunday futbolchilar bilan tengma-teng raqobatlasha oldi. Qisqasi, klubdagi start chakki chiqmadi, biroq bosh murabbiy Engel Kubaning tog'asini yoqtirmagani uchun bechorani asosiy tarkibga qo'ymasdi: «Sen asosiy tarkib uchun hali g'o'rlik qilasan». Ahvol shu zayl uzoq davom etishi mumkin edi-yu, Kubaning baxtiga ChLning «Panatinaikos»ga qarshi o'yini oldidan o'ng qanot himoyachisi kutilmagan jarohatga yo'liqdi. Ilojsiz qolgan murabbiy esa bu joyni Blashikovskiga topshirishga majbur bo'ldi. Muhimi, Kuba o'yinda ishonchli to'p surdi va hatto, muxlislar olqishiga sazovor bo'ldi. Lekin birinchi bo'limda raqiblardan biri uning oyog'iga qattiq tepgani uchun tanaffusda og'riq qoldiruvchi ukoldan foydalanishga to'g'ri keldi. Oqibatda, omadsiz yosh iqtidor yana uch oy o'yin amaliyotisiz qolib ketdi. Shu tariqa, birinchi bonus amalda unutildi, lekin bahorda Kuba tuzalib, safga qaytgach, sakkiz o'yinda besh marta sheriklarini golli «pas»­lar bilan ta'minlagani uchun Polsha terma jamoasidan chaqiruv oldi. Xuddi shu vaqtda «Zenit» Kuba uchun bir yarim million evro taklif qildi. «Visla» rahbarlari esa uch million so'rashdi. Bu narx kutilmaganda paydo bo'lgan xaridor - «Borussiya»ni to'la qanoatlantirardi va Kuba 2007 yili Dortmundga ko'chib o'tdi. Germaniyaga kelganida, Kuba nemis tilida birorta so'z ayta olmasdi. Oradan besh yil o'tganidan keyin esa «Borussiya» ruhshunosi mana bunday dedi: «Kuba boshqacha. Qachonki u so'zlashni boshlasa, hamma nafasini ichiga yutib, jim bo'lib qoladi». Davomi InterFUTBOL gazetasi blogida
— deya xabar beradi uff.uz nashri.