Futbol – shubhasiz, dunyoning eng ommabop sport turi sanaladi. Kino, musiqa, umuman, shou-biznes orqali dovrug' qozongan yulduzlar ham millionlar o'yiniga befarq emas. Ayniqsa, ularning muayyan bir jamoaga muxlislik qilishi ishqibozlar diqqatini o'ziga jalb etadi. Ayrimlari esa tez-tez stadionlarda ko'rinish beradilar. Quyida o'z san'ati orqali omma e'tiboriga tushgan ayrim mashhur shaxslarning futbolga munosabatlari, ularning sevimli jamoalari haqida so'z boradi. Beyons Amerikalik qo'shiqchi bir yil avval Evropa chempionlar ligasi guruh bosqichidan o'rin olgan «PSJ»-«Barselona» bahsida ko'rinish berdi. Xonanda mazkur o'yinni Devid Bekxem, Patrik Klyuyvert hamda Fabio Kannavaro singari futbol yulduzlari bilan birga kuzatdi. Beyonsning qallig'i Jey-Zi hamrohligida tashrif buyurishi jurnalistlarning e'tiboridan chetda qolmadi. Sharliz Teron «Futbolni yoqtirishim va «Chelsi»ga muxlislik qilishimni ko'pchilik yaxshi biladi. Bu klubning ashaddiy fanatiman, deyish fikridan yiroqman. Lekin vaqt topib, Londonga borgudek bo'lsam, albatta, «Stemford Brij»ga kirmay qo'ymayman», deydi amerikalik kinoaktrisa intervyusi chog'ida. Jastin Timberleyk Hollivud aktyori hamda pop yo'nalishida ijod qiluvchi ushbu qo'shiqchi «Manchester Yunayted»ga befarq emasligini bir necha bor ta'kidlagan. Umid qilamizki, bu borada «qizil iblislar»ga sodiq qoladi. Zero, Timberleyk fikrini tez-tez o'zgartirib turishiga ko'pchilik ko'nikkan. Tom Xenks Aynan shu aktyor boshqa hamkasblaridan alohida ajralib turadi. Ajoyib rollari orqali shuhrat qozongan Xenksning «Aston Villa»ga ishqibozlik qilishini hamma ham bilavermasa kerak. Xuddi shunday — «Aston Villa». Tomni tez-tez Birmingem jamoasining o'yinlarida ko'rishgan. Hattoki, bir gal film premerasiga sevimli klubining sharfini taqqan holda tashrif buyurgan. Rianna Yaqinda Internet sahifalarida Riannaning «PSJ» darvozaboni Kevin Trapp bilan tushgan surati paydo bo'ldi. O'shanda qo'shiqchi parijliklarning «Marsel»ga qarshi o'yinini bevosita kuzatish maqsadida stadionga tashrif buyurgandi. Umuman olganda, Rianna avvalroq jahon chempionati finalida ham ko'rinish bergandi. Keti Perri, Rassel Brend MTV EMA taqdirlash marosimiga tashrif buyurgan xonandaning libosida «Vest Xem» ramzi yaqqol ko'rinib turardi. London klubining moliyaviy masalalar bo'yicha mutasaddilari buni darhol payqab, shu ko'rinishdagi kiyimlarni ishlab chiqarishga bel bog'ladilar. Darvoqe, Ketining turmush o'rtog'i — britaniyalik komik aktyor Rassel Brend ham aynan «Vest Xem» muxlisi. Davomi ushbu havolada.
— deya xabar beradi uff.uz nashri.