Ayni payt APL to'purarlari ro'yxatini boshqarib borayotgan «Lester» hujumchisi Jeymi Vardi atigi uch yil muqaddam beshinchi liga (!) klubida to'p surardi, desak, ko'pchilik ishonmasligi mumkin. Lekin bu - fakt. Quyidagi qiziqarli maqola Vardining uy qamog'idan Angliya terma jamoasigacha bo'lgan yo'lni qanday bosib o'tgani haqida.
Hayot sinovlari
Inson taqdiri juda murakkab. Chunonchi, ba'zida oddiygina bayram butunlay o'zgarib, kulfatga aylanishi yoxud uning hayotidagi eng yaxshi kun bo'lib qolishi hech gap emas. Masalan, 1982 yilning kuzida taniqli Kevin Kigan uni Daniyaga qarshi o'yinga chaqirmagani uchun arazlab, jurnalistlarga endi hech qachon terma jamoa qarorgohiga qadam bosmasligini aytgandi. Bu ko'ngilsizlik Angliya terma jamoasida biroz sarosima holatini yuzaga keltirdi va ikki yildan so'nggina Bobbi Robson hujum chizig'iga yangi etakchi - «Lester» forvardi Gari Linekerni topa oldi.
Oradan o'ttiz yil o'tdi va xuddi shu «Lester»ning yana bir a'zosi Jeymi Vardi may oyi o'rtalarida «Bahor kuni» bayrami munosabati bilan rafiqasi hamda qizlariga sovg'a xarid qilish uchun gul do'koniga kirdi. Vardi do'konda guldasta tanlab yurgan vaqtda uning telefoniga qisqa xabar keldi. Qizig'i shundaki, bu «sms» odatdagidan ko'ra uzunroq bo'lib, avval quyuq salomlashish bilan boshlanar, yakunda esa Jeymining terma jamoa qarorgohiga etib kelishi iltimos qilinardi. Xabar yuboruvchi shaxs sifatida Angliya terma jamoasi ma'muri Mishel Farrerning nomi ko'rsatilgandi. Tabiiyki, Vardi buni hazilga yo'yib, xabarni o'chirib yubordi va telefonni cho'ntagiga solgancha xaridni davom ettirdi. To'g'ri-da, 28 yoshga borib qolgan futbolchiga terma jamoada nima bor?!
Bayramdan «ertak» sari
Ammo oradan bir soat o'tgach, Jeymining telefoni ketma-ket qo'ng'iroqlardan yorilayozdi.Tanishlari uni terma jamoada to'p surish imkoniga ega bo'lgani bilan tabriklashar, epchil muxbirlar esa intervyu masalasida savol berishardi. Qisqasi, bu hech qanday hazil emasdi. Vardining do'sti va hamkasbi Endryu Menganning BBC xodimiga aytishicha, u o'shanda ilk bor Jeymining ko'zlarida yosh ko'ribdi. Farrerning xabaridan bir sutka o'tgach, Vardi «Lester» stadionida Daily Telegraph muxbiri Genri Uinter bilan termaga chorlov masalasida suhbatlashayotgandi. Shu tariqa, futbolchi bayramga tayyorlanayotib, «ertak»ka duch keldi: «Lester»ning 131 yillik tarixida faqatgina 16 nafar futbolchi terma jamoadan taklif olishgan va endi «King Pauer» o'yingohining kirish qismida Shilton, Benks, Lineker va boshqalar qatori, Jeymi Vardining ulkan surati paydo bo'ladi. Bu - bugungi voqealar. Endi sakkiz yil ilgari sodir bo'lgan hodisalarni yodga olsak...
Omadsiz kun
Sakkiz yil ilgari «bayram»ning aksi bo'lgandi: Vardi qulog'i og'irroq bir tanishi bilan Sheffilddagi tungi klubdan chiqib, uyga ketayotganida, ikki mast yigit ularga tashlanib qoladi. Bezorilar Jeymining qulog'iga maxsus apparat taqib olgan do'stini mazax qila boshlaydilar. Verdi ularga so'z bilan javob bermay, mushtlarini ishga soladi... Oqibatda u yarim yillik muddatga uy qamog'iga hukm qilinadi. «Yaxshiyamki, uyimda DVD disklarining ulkan kollektsiyasi bor edi», - dedi u Mirror nashriga bergan intervyusida.
Kim uchundir bu jazo juda azobli tuyulishi mumkin, lekin har holda, uy - Pentonvil turmasi emas va Vardi oqshomlari sakkizinchi ligadagi «Stoksbridj» nomli havaskorlar klubida to'p surib, kunduzi zavodda mehnat qildi. E'tiborlisi, Jeymi ishlagan zavodda imkoniyati cheklangan kishilar uchun maxsus jihozlar ishlab chiqarilardi. Vardi esa bu olijanob maqsad yo'lida astoydil ter to'kdi. O'shanda uning futbol klubidagi maoshi haftasiga 30(!) funt, zavoddagi haftalik mehnat haqi esa 70 funtni tashkil etgan. Vardi zavodda rezina mahsulotlarini pechda toblash bilan shug'ullanar, oqibatda kechga borib belida kuchli og'riq alomatlarini sezardi. Shuning uchun gohida futbolda orttirilgan jarohatni bahona qilib, bir kun-yarim kun dam olishga urinardi.
«Bilakuzuk» va sovuq dush
Uy qamog'ida yashash - unchalik oson emas. Shu bois, tez orada Vardining bilagida maxsus uskuna - elektron «bilakuzuk» paydo bo'ldi. Bu asbob uning qaerda turgani haqida politsiyaga ma'lumot berib turardi. Jeymiga nisbatan o'qilgan hukmga ko'ra, u kechgi soat 18:30dan ertalabki 06:30gacha uyda bo'lishi shart edi. Shuning uchun u jamoasining safar o'yinlarida faqat bir soat yoki bir bo'lim to'p surib, keyin uyga shoshilardi.
Vardi Daily Telegraph nashriga intervyu berar ekan, «Stoksbridj»dagi ajoyib xotiralarga ham to'xtalib o'tdi. Uning so'zlariga ko'ra, sakkizinchi ligada faqatgina shu jamoa boshqalaridan bir jihati bilan yaqqol ajralib turgan - o'yindan so'ng dushga ertaroq etib kelganlarga issiq suv nasib qilgan. Kechikkanlar esa doim sovuq suvda yuvinishga majbur bo'lishgan. Shuningdek, futbolchilar liboslarni o'zlari xarid qilib, o'zlari yuvishgan. Vardini esa o'sha paytlari bularning hammasi qoniqtirgan - axir u 2002 yili ham bir marta futboldan ketishga majbur bo'lgandi. Bu borada batafsil fikr yuritish uchun yanada ortga qaytib, uning tarjimai holiga nazar tashlash talab etiladi.
Davomi InterFUTBOL gazetasi blogida.
— deya xabar beradi uff.uz nashri.