“Universiada-2016” sport o'yinlarining futbol bo'yicha o'tkazilayotgan musobaqasida bosh sovrin sohibi ma'lum bo'ldi. Finalda Toshkent shahri termasi Farg'ona viloyati terma jamoasini 2:0 hisobida mag'lubiyatga uchratdi. Uchrashuv toshkentlik futbolchilar uchun omadli boshlandi. Birinchi bo'lim boshida Muhsin Ubaydullaev jarima to'pini aniq amalga oshirib, hisobni ochdi. Oradan hech qancha o'tmay, yana o'sha himoyachi belgilangan jarima to'pidan unumli foydalanib, hisob oshirdi – 0:2. Goldan keyin farg'onaliklar katta kuch bilan oldinga tashlanishdi. Pavel Smolyachenko, Sardor Mirzaevlardan bir necha bor qulay imkoniyat vujudga keldi. Ammo tanaffusga qadar hisobni o'zgartirish hech kimga nasib etmadi. Ikkinchi bo'limda maydon egalari raqib darvozasiga katta bosim o'tkazishdi. Lekin barcha urinishlar besamar ketdi va o'yin oxiriga qadar hisob o'zgarmay qoldi. Shunday qilib, Farg'onada o'tkazilgan “Universiada-2016” sport musobaqalarining futbol turi bo'yicha bo'lib o'tgan bahslarida Toshkent shahri jamoasi oltin medalni qo'lga kiritdi. Kumush medali esa Farg'ona viloyati terma jamoasiga nasib etdi. Samarqandlik talaba futbolchilar esa uylariga bronza medali bilan qaytadigan bo'lishdi. G'olib va sovrindorlar munosib tarzda taqdirlanishdi. “Universiada-2016” musobaqasi . Futbol – Final Farg'ona viloyati terma jamoasi – Toshkent shahri terma jamoasi - 0:2
Gollar: Muhsin Ubaydullaev 2 ta
Bosh hakam: Ravshan Ermatov.
Farg'ona viloyati terma jamoasi: Doston Mirzaraimov, Bobur Aminjonov, Muhamadsulton Fozilov, Dilyor Ermatov, Faxriyor O'rinboev, Iqbol Malikjonov, Pavel Smolyachenko, Nodir Kamolov, Riza Ayvezov, Sardor Mirzaev.
Zaxira: Iqbol Boboxonov, Alisher Nuraliev, Xayrullo Madaminov, Ulug'bek Olimov.
Toshkent viloyati terma jamoasi: Akbar To'raev, Azamat Isroilov, Muhsin Ubaydullaev, Abror Husainov, Doniyor Hasanov, Zoxir Pirimov, Sardor Sobirxo'jaev, Sunatillo Mamadaliev, Abbos Maxsitaliev, Jamshid Hasanov, Alibobo Rahmatullaev.
Zaxira: Tolib Ochilov, Shoxrux Musurmonov. Abror Dehqonov
— deya xabar beradi uff.uz nashri.