Milandagi «San-Siro» («Juzeppe Meatstsa») stadioni Evropa Chempionlar Ligasi finalini o'tkazishga tayyorgarlik ko'rmoqda. To'g'ri, ushbu bahsda Italiya jamoalarining ishtirok etmasligi mahalliy muxlislarni ranjitishi tabiiy. Ammo baribir, mazkur turnirning hal qiluvchi o'yini barchada birdek qiziqish uyg'otadi. Quyida «Real» va «Atletiko» o'rtasida kechadigan finalga taalluqli ayrim ma'lumotlarni taqdim etamiz. 28 may kuni EChL tarixida ikkinchi marta finalda Madridning ikki klubi to'qnash keladi. Eslatib o'tamiz, 2014 yili Lissabonda o'tkazilgan hal qiluvchi o'yinda ham aynan «Real» va «Atletiko» to'qnash kelishgan, o'yinning asosiy qismi durang (1:1) bilan yakunlanganidan so'ng, qo'shimcha bo'limlarda «Qirollik klubi» yana uchta gol urgach, ushbu sovrinni o'ninchi marta o'ziniki qilib, rekord qayd etgandi. Umumiy hisobda, «Real» hisobida 14ta final mavjud bo'lsa, ulardan ikkitasida «Atletiko» raqiblik qilgan. Tarixga nazar tashlasak, 1974 yili «matraschilar» hal qiluvchi bahsda «Bavariya» bilan kuch sinashib, 1:1 hisobida durang o'ynashgan, javob o'yinida esa myunxenliklar raqibga hech qanday imkoniyat qoldirishmagandi - 4:0. EChLning 2015|2016 yillar mavsumini «A» guruhida boshlagan «Real» 16 ochko to'plab, «pley-off» yo'llanmasini qo'lga kiritdi. Keyingi bos­qichlarda «Roma» (2:0, 2:0), «Volfsburg» (0:2, 3:0) va «Manchester Siti» (1:0, 0:0) taslim etildi. O'z navbatida, «Atletiko» «S» guruhini g'olib sifatida yakunladi. 1|8 finalda Diego Simeone shogirdlari penaltilar seriyasi natijalariga ko'ra «Eynd­­xoven»ni turnirdan chiqarib yuborishdi (0:0, 0:0). Keyinchalik «matraschilar» qit'a grandlari - «Barselona» (1:2, 2:0) hamda «Bavariya» (1:0, 2:1)ni to'xtatishdi. Eslatib o'tamiz, Milandagi finalni angliyalik hakam Mark Klattenburg boshqarib boradi. Unga qanotlarda Saymon Bek va Jek Kollin, darvoza ortida esa Entoni Teylor hamda Andre Marriner yordam berishadi. To'rtinchi hakam - vengriyalik Viktor Koshshai. FINALNING AHAMIYaTI EChL-2015|2016 finalidagi g'alaba murabbiy va ayrim futbolchilar uchun shaxsiy yutuq keltirishi ham kutilmoqda. «Real» Zayniddin Zidan «Qirollik klubi» muvaffaqiyat qozonsa, Zidan ham futbolchi, ham murabbiylik davrida ushbu turnirda zafar quchganlar klubiga a'zo bo'ladi. Shuningdek, EChL-2001|2002 g'olibi mazkur nufuzli musobaqani murabbiy sifatida qo'lga kiritgan ilk frantsiyalikka aylanadi. 60-yillarda frantsuz Elenio Errera «Internatsional» bilan Chempionlar Kubogini qo'lga kiritgan, ammo bu mutaxassis Argentinada tug'ilgan. Keylor Navas UEFA finalida qatnashib, g'alaba qozongan ilk kosta-rikalikka aylanishi mumkin. Xames Rodriges EChL finalida o'ynaydigan ilk kolumbiyalikka aylanishi mumkin («Inter» himoyachisi Ivan Kordoba 2009|2010 yillar mavsumidagi hal qiluvchi o'yinni zaxira o'rindig'ida o'tkazgan). Shuningdek, Xamesda xalqaro klublar sovrinlari kollektsiyasiga ega bo'lish imkoniyati mavjud. U 2011 yili «Portu» safida Evropa Ligasida, 2014 yili «Real» bilan UEFA superkubogi va klublar o'rtasidagi jahon chempionatida zafar quchgan. Garet Beyl Bu toifa finalda to'p surgan beshinchi uelslikka aylangan Beyl mazkur turnirda ikki marta zafar quchgan ikki hamyurtiga tenglashib oladi. Avvalroq shunday sharaf «Liverpul» himoyachisi Jozef Jons (1977, 1978) hamda «MYu» xavbeki Rayan Giggz (1999, 2008)ga nasib qilgan. Martin Edegor Muntazam ravishda «zayavka»dan o'rin olib, ammo EChLning joriy mavsumida qatnashmagan futbolchi turnir finalida to'p surgan to'rtinchi norvegiyalikka aylanishi mumkin. Bunga qadar Ronni Yonsen hamda Ole-Gunnar Sulsher («MYu», 1999) va Yon-Arne Riise («Liverpul», 2005) hal qiluvchi bahsda o'ynashgan. Mabodo, Edegor maydonga tushib, «Real» bilan g'alabaga erishsa, u musobaqa tarixidagi eng yosh (17 yoshu 163 kun) g'olibga aylanadi. Bu boradagi rekord 1962 yili «Benfika» a'zosi Antoniu Simoesh (18 yoshu 139 kun) tomonidan o'rnatilgan. Krishtianu Ronaldu EChL kubogini uchinchi marta qo'lga kiritishi mumkin: Ronaldu 2008 yili «MYu», 2014 yili «Real» safida «shalpangquloq»ni boshi uzra ko'targandi. Shuningdek, Krishtianu Chempionlar Ligasining uchta finalida gol urgan dastlabki futbolchiga aylanish imkoniyatini saqlab turibdi. Hozircha portugaliyalik yulduzdan tashqari Lionel Messi («Barselona», 2009 va 2011), Raul («Real», 2000 va 2002) hamda Samuel Eto`O («Barselona», 2006 va 2009) ikkita uchrashuvda to'p kiritishgan. Umuman, bunday ko'rsatkichlar bobida Alfredo Di Stefanoga etadigani yo'q. Ushbu futbolchi evrokuboklarning beshta finalida qatnashib, ettita gol urgan. Darvoqe, ayni ko'rsatkich Ferents Pushkashga ham tegishli. «Atletiko» Diego Simeone Luis Karnilya («Real», 1958 va 1959) hamda Elenio Errera («Inter», 1964 va 1965)dan so'ng Argentinada tug'ilgan murabbiylar orasida EChLda g'olib chiqqan uchinchi mutaxassisga aylanishi mumkin. Shuningdek, Simeoneda ikkinchi marta evrosovringa ega chiqish imkoniyati mavjud, zero «Atletiko» bilan Evropa Ligasi-2011|2012da zafar quchgan. Bundan tash­qari, Simeone o'yinchi sifatida ko'hna qit'aning ikkita sovrinini qo'lga kiritgan («Inter», UEFA kubogi-1997|1998 va «Latsio», UEFA cuperkubogi-1999). Demak, bu kollektsiyani yana bitta sovrin bilan to'ldirishi mumkin. Davomi InterFUTBOL gazetasi blogida
— deya xabar beradi uff.uz nashri.