22 oktyabr, payshanba kuni «Dinamo» stadionining anjumanlar zalida «Dinamo» futbol klubi va jamoa muxlislari o'rtasida uchrashuv bo'lib o'tdi.
Ushbu yig'ilish Samarqand viloyat futbol Federatsiyasi, «Dinamo» PFK rahbariyati, murabbiylar va futbolchilar ishtirokida bo'lib o'tdi.
Ushbu tadbirdan asosiy maqsad klub va muxlislar o'rtasida yanada yaqin aloqalar o'rnatib, mavjud muammolarni birga bartaraf etish, uy stadionda bo'lgani kabi mehmondagi o'yingohlarda ham muxlislik madaniyatini yuksaltirish borasida bo'ldi. Shuningdek, tadbirda ishtirok etgan 50 nafarga yaqin ishqibozlar bosh murabbiy Bahrom Hakimov va bir qator futbolchilarga o'zlarini qiziqtirgan savollari bilan murojaat etishdi.
«Avvalambor, jamoamizni nafaqat Samarqanddagi bahslarda balki safar uchrashuvlarida ham tinmay qo'llab-quvvatlayotgan muxlislarimizga minnatdorchiligimizni bildiramiz. Ular har qanday holatda ham jamoa ruhini ko'tarishga intilishmoqda. Ammo aksariyat holatlarda ayrim muxlislar safardagi o'yinlarimizdan norozi bo'lishmoqda. Ularni tushunaman, ammo ular ham jamoa tarkibi qisqa fursat ichida shakllanib qolmasligini tushunishlari lozim. Chindan ham oldinda jamoamizni juda qiyin uchrashuvlar kutib turibdi. Ishonamanki, biz bu sinovlardan muvaffaqiyatli o'tamiz» - deydi Bahrom Hakimov.
Bu borada klub rahbariyati, futbolchilar va muxlislar ham chiqish qilib, jamoaga ishonishlarini ta'kidlashdi.
Qayd etish lozimki, bunday uchrashuvlar tobora an'ana tusiga kirmoqda. Joriy mavsum avvalida ham ikki marotaba mana shunday uchrashuv tashkil etilgan edi.
— deya xabar beradi uff.uz nashri.